Zaga 1 - Ndebele Bible (iBhayibhili Elingcwele) 1978

Izaga zilosizo

1Nanzi izaga zikaSolomoni, indodana kaDavida, inkosi yakoIsrayeli,

2ukuba abantu bazuze ukuhlakanipha lokufundiswa,

bazwisise amazwi aletha ukuqedisisa,

3bafundiswe ukuhlakanipha lokulunga lokufaneleyo leqiniso;

4abangelalwazi banikwe ukuhlakanipha,

lamajaha anikwe ukwazi lengqondo ehlakaniphileyo.

5Uba ohlakaniphileyo elalela, uzaqhubeka ekufundeni,

loqedisisayo uzakuba lokwazi

6ukuba aqedisise izaga lezimfihlakalo,

lamazwi abahlakaniphileyo lamalibho abo.

7Ukuyesaba iNkosi kuyikuqala kokwazi,

kodwa izithutha ziyadelela ukuhlakanipha lokufundiswa.Izeluleko kumajaha

8Mntanami, zwana ukufundisa kukayihlo,

ungakwali ukufundisa kukanyoko;

9ngoba kuzakuba ngumqhele omuhle ekhanda lakho,

lomgaxo omuhle entanyeni yakho.

10Mntanami, uba izoni zikuhuga, ungavumi;

11uba zisithi: Woza, siyecathamela ukuchitha igazi lomuntu,

sijume umuntu ongelacala;

12sizabaginya bephila njengendawo yabafileyo,

babe njengabehlela egodini.

13Sizazuza impahla ezinengi eziligugu,

sigcwalise izindlu zethu ngempango;

14ngakhoke hlangana lathi,

isikhwama sethu semali sibe sinye.

15Mntanami, ungahambi lazo,

uzinqande ekuhambeni endleleni zazo;

16ngoba zona zigijimela ebubini,

ziphangisa ukuchitha igazi.

17Kakusizi ukwendlala imbule uba inyoni ilibona.

18Lababantu bayacathamela ukuchitha elabo igazi,

bajume okwabo ukuphila.

19Kunjalo ukuphela kwabo bonke abazuza inzuzo ngokuphanga,

kuyachitha ukuphila kwabayizuzayo.

Ukuhlakanipha kuyamemeza

20UkuHlakanipha kuyamameza endleleni,

kuyezwakalisa ilizwi lakho emidangeni,

21kuyamemeza phezu kwemiduli,

kuyatshumayela ngasemasangweni omuzi kusithi;

22Koze kube nini lithanda ubuthutha, lina zithutha na?

Koze kube nini izideleli zithokoza ngokudelela kwazo,

leziphukuphuku zizonda ukwazi na?

23Lalelani ukukhuza kwami;

sengizakulitshela imicabango yami,

ngikhulume amazwi ami ahlakaniphileyo kini.

24Ngibizile, kodwa lina lala ukulalela;

ngancenga, kodwa kakho owananzayo;

25ladelela konke ukweluleka kwami,

kalivumanga ukukhuza kwami;

26ngakho minake ngizahleka lapho lifikelwa yikuhlupheka,

ngiliklolodele lapho lisehlelwa yikwesaba,

27lapho ukwesaba kulehlela njengesiphepha,

lokuhlupheka kwenu kufika njengesivunguzane,

yebo, lapho lisehlelwa yibuhlungu losizi.

28Ng’khona bazangibiza, kodwa kangiyikusabela;

Bazangifunisisa, kodwa kabayikungifumana.

29Ngoba babezonda ukwazi,

bengakhethanga ukwesaba iNkosi,

30bengavumanga ukweluleka kwami,

bedelela konke ukukhuza kwami;

31ngakhoke bazakudla izithelo zokuhamba kwabo,

basuthiswe ngamacebo abo.

32Ngoba abayizithutha bayabulawa yikungaqapheli kwabo,

labayiziphukuphuku bayabhujiswa yikungananzi kwabo.

33Kodwa ongilalelayo uzakuhlala evikelekile,

achelese, angabi lavalo ngokubi.