Isa 47 - Ndebele Bible (iBhayibhili Elingcwele) 1978

Ukuwa kweBabiloni

1INkosi ithi: Yehla, uhlale othulini, wena Babiloni;

yehlani esihlalweni sobukhosi lihlale phansi,

lina maKaladiya.

Ngoba kawusayikubizwa ngokuthi uthambile, ubuthakathaka.

2Thatha amatshe okuchola, uchole impuphu,

wambule isimbombozo sakho,

ukhumule isigqoko sakho, uveze imilenze yakho,

udabule phakathi kwamanzi.

3Ubunqunu bakho buzavela obala,

kubonakale ihlazo lakho.

Ngizaphindisela, ngingayekeli muntu,

4utsho njalo oNgcwele kaIsrayeli,

uMhlengi wethu obizwa ngokuthi yiNkosi yamabandla.

5Hlala uzithulele, ungene emnyameni,

wena Kaladiya;

ngoba kawusayikubizwa ngokuthi uyinkosikazi yemibuso.

6Ngabathukuthelela abantu bami, ngabayangisa,

ngabanikela esandleni sakho, kawubahawukelanga;

walenza laba nzima ijogwe lakho phezu kwabadala.

7Wathi: Ngizakuba yinkosikazi kuze kube nininini;

kawuzikhathazanga ngalezizinto,

kawukhumbulanga ukucina kwazo.

8Zwanake lokhu, wena othanda ukuzithokozisa,

ohlala uvikelekile,

othi enhliziyweni yakho:

Yimi, kakho omunye ngaphandle kwami;

kangiyikuba ngumfelwakazi,

kangiyikufelwa langabantwana.

9Kodwa lokho kokubili kuzakukwehlela masinyane ngasuku lunye;

ukufelwa ngabantwana lobufelwakazi kwehlele

phezu kwakho ngokugcweleyo,

phakathi kwabo ubuthakathi bakho,

laphakathi kwamandla amakhulu amalumbo akho.

10Wathembela ebubini bakho,

wathi: Kakho ongibonayo.

Ukuhlakanipha kwakho lolwazi lwakho kwakuduhisa,

wathi enhliziyweni yakho:

Yimi, kakho omunye ngaphandle kwami.

11Kodwa ububi buzakwehlela,

ongayikwazi ukubuvika;

lengozi izakukwehlela, ongayikuyivika;

lokuchitheka obungakukaphele kukujume.

12Qhubekake ngamalumbo akho langobuthakathi bakho okusebenzise kusukela ebutsheni bakho;

mhlawumbe ungasizakala ngakho,

mhlawumbe wethusele ngakho.

13Kawulamandla lanxa ulabeluleki abanengi;

kabasondele bakusize, abeluleki bakho,

labo abafunda izinkanyezi,

abahlola iphezulu bekubikela inyanga ngenyanga konke okuzakwenzakala.

14Khangela, bazakuba njengamabibi atshiswa ngumlilo;

kabayikuzophula emalangabini.

Kakusimalahle okothiwa la,

kakusiwo umlilo wokotha.

15Banjaloke labo osebenze labo,

ababambisana lawe kusukela ebutsheni bakho;

bayazulazula, kube yilowo lalowo ngendlela yakhe;

kungabi khona okusizayo.