1 Lan 17 - Ndebele Bible (iBhayibhili Elingcwele) 1978

Isivumelwano sikaNkulunkulu loDavida

1Kwathi lapho uDavida esehlala endlini yakhe, wathi kuNathani umprofethi: Akuboneke, mina ngihlala endlini yemikusu, kodwa umtshokotsho wesivumelwano seNkosi uhlala ethenteni.2 Sam 7:1–29

2UNathani wathi kuDavida: Yenza konke okusenhliziyweni yakho, ngoba uNkulunkulu ulawe.

3Kodwa kwathi ngabona lobobusuku ilizwi leNkosi uNkulunkulu lafika kuNathani,

4lathi: Hamba uyetshela inceku yami uDavida ukuthi iNkosi ithi: Kawuyikungakhela indlu ukuba ngihlale kuyo.

5Ngoba kangizanga ngihlale endlini kusukela osukwini engakhupha ngalo uIsrayeli kuze kube lamhla, kodwa ngahlala ethenteni ngihamba kundawo ngendawo.

6Endaweni zonke engihambe kuzo labo bonke abakoIsrayeli ngake ngakhuluma ilizwi yini komunye wabahluleli bakoIsrayeli, engabalaya ukwalusa abantu bami ngathi: Yini lingangakhelanga indlu yemikusu na?

7Ngakhoke uzakutsho encekwini yami uDavida uthi: INkosi yamabandla ithi: Ngakuthatha ekwaluseni izimvu egangeni ukuba ube ngumbusi wabantu bami uIsrayeli;

8ngaba lawe lapho uya khona, ngachitha zonke izitha zakho ngaphambi kwakho; ngizakwenzela ibizo elikhulu phakathi kwabakhulu basemhlabeni.

9Ngizabamisela indawo abantu bami uIsrayeli, ngibagxumeke ukuba bahlale endaweni yabo, bangabe besakhathazwa futhi; labantu ababi kabasayikubacindezela futhi njengakuqala,

10kusukela esikhathini engamisa ngaso abahluleli ebantwini bami uIsrayeli; ngizakunqoba zonke izitha zakho, ngikwenze ube mkhulu, ngiqinise indlu yakho.

11Kuzakuthi lapho insuku zakho seziphelile, usuyile kwabaphansi, ngimise omunye wabantwana bakho ukuba abe yinkosi esikhundleni sakho, ngiqinise umbuso wakhe.

12Yena uzakungakhela indlu, ngizakuqinisa umbuso wakhe kuze kube nininini.

13Mina ngizakuba nguyise, yena abe yindodana yami; kangiyikususa uthando lwami olungapheliyo kuye njengoba ngalususa kulowo owayengaphambi kwakho,2 Kor 6:18; Heb 1:5

14kodwa ngizamqinisa yena endlini yami lasembusweni wami kuze kube nininini, lombuso wakhe uzakuma kokuphela.

15UNathani wamtshela uDavida konke lokho ayekutsheliwe, lakho konke ayekutshengisiwe.

16Inkosi uDavida yasingena ihlala phambi kweNkosi, yathi: Kambe mina ngingubani, Nkosi Nkulunkulu, lendlu yami iyini, ukuze ungifikise lapha na?

17Kanti lokhu kuyinto encinyane nje emehlweni akho, Nkulunkulu; usukhulumile futhi ngendlu yenceku yakho ngokwesikhathi esikhatshana esizayo, wangitshengisa lezizukulwana ezizayo.

18Phoke, mina nginguDavida nje ngigabe ngisathini kuwe ngodumo olunike inceku yakho na? Ngoba uyayazi inceku yakho.

19Ngenxa yenceku yakho, Nkosi, langokwenhliziyo yakho wenzile konke lokhu okukhulu ukuba uveze zonke lezizinto ezinkulu.

20Kakho onjengawe, Nkosi, kakho uNkulunkulu ngaphandle kwakho, ngakho konke esikuzwileyo ngendlebe zethu.

21Yisiphi isizwe emhlabeni esinjengabantu bakho uIsrayeli, Nkulunkulu, owazihlengela bona babe ngabantu bakho, wazenzela udumo ngezenzo ezinkulu lezesabekayo ngokuxotsha izizwe ngaphambi kwabantu bakho owabahlenga eGibithe na?

22Wazimisela abantu bakho uIsrayeli ukuba babe ngabakho kuze kube nini lanini: wena Nkosi, waba nguNkulunkulu wabo.

23Khathesike, Nkosi, akuqinise ilizwi owalikhuluma ngenceku yakho langendlu yayo kuze kube nininini, wenze njengokukhuluma kwakho.

24Ibizo lakho kaliqiniswe libe likhulu kuze kube nininini, ukuba abantu bathi: INkosi yamabandla inguNkulunkulu kaIsrayeli, nguNkulunkulu koIsrayeli. Lendlu yenceku yakho uDavida izamiswa phambi kwakho.

25Ngoba wena, Nkulunkulu wami, uyambulele inceku yakho ukuthi uzamisa indlu yayo; ngakho inceku yakho ilesibindi sokukhuleka phambi kwakho.

26Yebo, Nkosi, wena unguNkulunkulu, uyithembisile inceku yakho lokho okuhle.

27Ngakhoke akuyibusise indlu yenceku yakho ukuze ibe phambi kwakho kuze kube nininini; ngoba, wena Nkosi, lokho okubusisayo kubusisiwe kuze kube nini lanini.