Isa 66 - Ndebele Bible (iBhayibhili Elingcwele) 1978

INkosi izakwahlulela izizwe; izabusisa iZiyone

1INkosi ithi:

Izulu liyisihlalo sami sobukhosi,

lomhlaba uyisigcabha senyawo zami;

ngenjani leyondlu ebelizakungakhela yona,

ngenjani lendawo yami yokuphumula na?

2Zonke lezizinto zenziwe yizandla zami,

ngakho zonke lezizinto ngezami, kutsho iNkosi.

Kodwa umuntu engimqaphelisayo yilowo othobekileyo,

olomoya odabukileyo, olesabayo ilizwi lami.

3Ohlaba inkabi unjengobulala umuntu;

onikela umhlatshelo ngewundlu unjengowephula intamo yenja;

onikela umnikelo wempuphu unjengonikela umnikelo ngegazi lengulube;

otshisa impepha kube ngumnikelo wesikhumbuzo unjengodumisa isithombe.

Konke lokhu kuyizenzo abantu abazikhethela zona,

labo abazithokozisa ngezinengiso zabo.

4Ngakhoke ngizakubakhethela inhlupheko,

ngibehlisele lokho abakwesabayo;

ngoba ekubizweni kwami kakho owasabelayo,

lasekukhulumeni kwami kabalalelanga;

kodwa benza okubi emehlweni ami,

bakhetha lokho engingakuthandiyo.

5Zwanini ilizwi leNkosi,

lina elithuthumela ngelizwi layo elokuthi:

Abafowenu abalizondayo, abalixotsha ngenxa yebizo lami, bathi:

Kayibe lodumo iNkosi, ukuze sibone intokozo yenu;

kodwake yibo abazakuyangeka.

6Zwanini umsindo phakathi komuzi;

umsindo ophuma ethempelini

ngumsindo wokuphindisela kweNkosi ezitheni zayo.

7IZiyone lingahelelwanga labeletha,

lingakehlelwa yibuhlungu labeletha indodana.

8Ngubani owake wezwa okunje na?

Ngubani owake wabona okunje na?

Kambe ilizwe lingazalwa ngosuku olulodwa na?

Lesizwe singabelethwa ngesikhatshana na?

Ngoba iZiyone lithe lisahelelwa,

lazala abantwana balo.

9Ngizavula isizalo kodwa ngingenzi ukuba kuzalwe na?

kutsho iNkosi.

Kuzakuthi mina engenza ukuba kuzalwe, ngibuye ngivale isizalo na?

utsho uNkulunkulu wakho.

10Thokozani kanye leJerusalema,

lilithabele, lina lonke elilithandayo;

jabulani kanye lalo khathesi,

lina lonke elilililelayo;

11ukuze limunye, lisuthe emabeleni alo anika induduzo,

lokuze lithokoze ngochago lwalo olunengi.

12Ngoba iNkosi ithi:

Khangelani, ngizalinika ukuthula okuzagelezela kini njengomfula,

lenotho yezizwe enjengesifula esigcweleyo;

lani lizakumunya, liphathwe emathangazini alo,

liphathwe ngothando.

13Njengonina eduduza umntwana wakhe, lami ngizaliduduza lina,

liduduzeke eJerusalema.

14Lizakubona lokhu, lenhliziyo yenu ithokoze;

lemizimba yenu ikhule iqine;

kuzakwaziwa ukuthi isandla seNkosi sesisencekwini zayo,

izithukuthelele izitha zayo.

15Ngoba iNkosi izafika ngomlilo,

izinqola zayo zibe njengesivunguzane,

ukwehlisela intukuthelo yayo ngokufutheka,

lokukhuza kwayo ngamalangabi omlilo.

16Ngoba iNkosi izakwahlulela ngomlilo langomkhonto wayo bonke abantu,

banengi ezakubabulala.

17Labo abazahlukanisela ukungena ensimini yokukhonzela, bezihlambulula, belandelana, besidla inyama yezingulube, lesinengiso, lamagundwane, imisebenzi yabo lemicabango yabo izakuphela, kutsho iNkosi.

18Ngiyeza ukubutha zonke izizwe lemihlobo yonke, kuzafika, kubone ubukhulu bami.

19Ngizabeka isibonakaliso phakathi kwazo, ngithumele abaseleyo ezizweni, eTarshishi, lasePuti, laseLudi, laseMesheki, laseTubali, laseJavani, lasemazweni angasolwandle akhatshana angakezwa udumo lwami, ezingakaboni ubukhulu bami; bazalandisa ngodumo lwami phakathi kwezizwe.

20Bazabuyisa bonke abafowenu bebakhupha kuzo zonke izizwe, babe yisipho eNkosini; bazababuyisa ngamabhiza langezinqola zokulwa, langamathala, langezimbongolo, langamakamela, entabeni yami engcwele iJerusalema, kutsho iNkosi, njengabakoIsrayeli beletha iminikelo yabo yempuphu ngezitsha zabo ezihlambulukileyo endlini yeNkosi.

21Abanye babo ngizabenza babe ngabapristi lamaLevi, itsho iNkosi.

22Njengalokhu iphezulu elitsha lomhlaba omutsha

engizakukwenza kuzakuma kokuphela phambi kwami, kutsho iNkosi,

ngokunjaloke inzalo yakho lebizo lakho kuzakuma kokuphela.

23Inyanga ngenyanga ekuthwaseni kwenyanga,

ngeviki ngeviki ngeSabatha,

bonke abantu bazakuza, badumise phambi kwami,

itsho iNkosi.

24Bazakuphuma, babone izidumbu zabantu abangivukelayo; impethu edla izidumbu kayiyikufa, lomlilo ozitshisayo kawuyikucima; bazakuba yisinengiso kubo bonke abantu.