Hubo 52 - Ndebele Bible (iBhayibhili Elingcwele) 1978

Ubuze bokuzincoma ngokwenza okubi

1Uzincomelani ngokubi okwenziwa phezu kolungileyo,

wena qhawe na?

2Usuku lonke wenza amacebo okubhubhisa,

ulimi lwakho lunjengensingo,

wena owenza inkohliso.

3Uthanda okubi kulokuhle,

lokuqamba amanga kulokukhuluma iqiniso;

4uthanda amazwi achithayo, wena olenkohliso.

5Kodwa uNkulunkulu uzakukubhidliza kokuphela,

uzakukuhluthuna akukhuphe ethenteni lakho,

akususe elizweni labaphilayo.

6Abalungileyo bazakubona besabe,

bazakumhleka besithi:

7Khangelani, nangu umuntu ongamenzanga uNkulunkulu abe yisiphephelo sakhe,

kodwa wathemba inotho yakhe enkulu,

wathembela ekwenzeni okubi.

8Kodwa mina nginjengesihlahla esiluhlaza esithiwa ioliva

esisendlini kaNkulunkulu.

Ngiyathemba othandweni olungapheliyo lukaNkulunkulu

kuze kube nininini.

9Ngizakukudumisa kuze kube nini lanini ngokwenza kwakho, Nkulunkulu.

Ngizakulitshumayela ibizo lakho phambi kwabangcwele,

ngoba lihle.