2 Lan 34 - Ndebele Bible (iBhayibhili Elingcwele) 1978

Imvuselelo kaJosiya

1UJosiya wayeleminyaka eficaminwembili lapho eqalisa ukubusa; wabusa iminyaka engamatshumi amathathu lanye eJerusalema.Jer 3:6

2Wenza okulungileyo phambi kweNkosi, walandela indlela zikaDavida ukhokho wakhe, kaphambukelanga ngakwesokunene loba kwesokhohlo.

3Ngomnyaka wesificaminwembili wokubusa kwakhe esesengumfana waqala ukumdinga uNkulunkulu kaDavida ukhokho wakhe; ngomnyaka wetshumi lambili waqala ukuhlambulula uJuda leJerusalema, wavala indawo eziphakemeyo zokukhonzela, wadiliza insika zikankulunkulukazi uAshera, wasusa izithombe ezibaziweyo lezibunjiweyo.

4Wadiliza ama‐altare aboBali, wadilizela phansi ama‐altare okutshisela impepha ayemi ngaphezu kwawo, wadiliza insika zikankulunkulukazi uAshera, wabulala izithombe ezibaziweyo lezibunjiweyo, wazenza zaba yimpuphu, wayichithela phezu kwamaliba alabo ababenikele imihlatshelo kizo.2 Kho 21:3; 2 Lan 33:3

5Watshisela amathambo abapristi phezu kwama‐altare abo, wahlambulula uJuda leJerusalema.1 Kho 13:2

6Emizini yakoManase leyakoEfrayimi leyakoSimeyoni kuze kufike koNafitali lemanxiweni akhona

7wadiliza ama‐altare, lensika zikankulunkulukazi uAshera wazibulala lezithombe zaze zaba yimpuphu, wadilizela phansi ama‐altare empepha kulo lonke ilizwe lakoIsrayeli. Wasebuyela eJerusalema.

UJosiya lencwadi yomlayo

8Kwathi ngomnyaka wetshumi lesificaminwembili wokubusa kwakhe, eselihlambulule ilizwe lethempeli, wathuma uShafani indodana kaAzaliya loMahaseya umbusi womuzi loJowa indodana kaJowahazi umbhali ukuba balungise indlu yeNkosi uNkulunkulu wakhe. 2 Kho 22:3–20

9Bafika kuHilikiya umpristi omkhulu, bamnika imali eyayilethwe endlini kaNkulunkulu, amaLevi ayelondoloza umnyango ayeyiqoqe koManase lakoEfrayimi lakubo bonke abaseleyo koIsrayeli labo bonke abakoJuda labakoBenjamini labaseJerusalema.

10Bayinika abaphathi bezisebenzi ababewukhangela umsebenzi wethempeli ukuba balungise indlu ngayo;

11bayinika ababazi labakhi ukuba bathenge amatshe abaziweyo lentungo lezigodo zezindlu amakhosi akoJuda ayeziyekele zadilika.

12Abantu bawenza umsebenzi ngobuqotho bephethwe nguJahathi loObadiya amaLevi, abakoMerari, loZekariya loMeshulamu, abakoKohathi. AmaLevi wonke ayekwazi ukutshaya izinto zokuhlabelela

13ayephethe abantu bokuthwala imithwalo labo bonke ababesebenza imisebenzi yenhlobo ezinengi; amanye amaLevi ayengababhali, amanye engabaphathi, lamanye engabagcini bamasango.

14Kwathi bekhupha imali eyayilethwe ethempelini, uHilikiya umpristi wafumanisa ugwalo lomlayo weNkosi owawunikwe ngoMose.

15UHilikiya wasesithi kuShafani umabhalane: Sengifumene ugwalo lomlayo ethempelini. UHilikiya waselunika uShafani

16owaluletha enkosini, wabika kuyo wathi: Konke okwakunikelwe inceku zakho ziyakwenza;

17scziyikhuphile imali ebisethempelini, zayinika abaphathi lezisebenzi.

18UShafani umabhalane wasesithi enkosini: UHilikiya umpristi unginike ugwalo Waseyibalela ugwalo inkosi.

19Kwathi inkosi isiwazwile amazwi omlayo yadabula izigqoko zayo.

20Yasilaya oHilikiya loAhikamu indodana kaShafani loAbidoni indodana kaMika loShafani umabhalane loAsaya inceku yenkosi, yathi:

21Hambani liyesibuzela eNkosini uNkulunkulu mina lalabo abaseleyo koIsrayeli lakoJuda mayelana lamazwi alolugwalo olufunyenweyo; ngoba lukhulu ulaka lweNkosi olusehleleyo, ngoba obaba kabaligcinanga ilizwi layo ukuba benze njengokulotshiweyo kulolugwalo.

22Ngakho uHilikiya lalabo ayethunywe labo yinkosi baya kuHulida umprofethikazi, umkaShaluma indodana kaTokhathi kaHasira, umgcini wezigqoko; yena wayehlala eJerusalema esigabeni sesibili. Bambikela ngalindaba.

23UHulida wathi kibo: INkosi uNkulunkulu kaIsrayeli ithi: Tshelani umuntu olithume kimi

24ukuthi iNkosi ithi: Ngizakwehlisela ububi kulindawo laphezu kwabahlala kiyo, zonke iziqalekiso ezigwaliweyo ogwalweni olubalelwe inkosi yakoJuda.

25Ngoba bangidelile, batshisela abanye onkulunkulu impepha, ukuze bangithukuthelise ngezithombe zabo abazenzayo; ngakho ulaka lwami luzakwehlela phezu kwalindawo, lungadedi.

26Kodwa inkosi yakoJuda elithumileyo ukubuza kimi liyitshele ukuthi iNkosi uNkulunkulu kaIsrayeli ithi: Mayelana lamazwi owazwileyo,

27ngoba inhliziyo yakho izisolile, wazithoba phambi kwami lapho usizwa amazwi ami ngalindawo langabahlala kiyo, uzithoba phambi kwami, wadabula izigqoko zakho wakhala, lami ngikuzwile.

28Khangela, uzakuya kwabaphansi, ubekwe elibeni lakho ngokuthula, amehlo akho kawayikubona konke okubi engizakukwehlisela kulindawo laphezu kwabahlala kiyo. Bakubika lokhu enkosini.

29Inkosi yasibuthanisa bonke abadala bakoJuda labaseJerusalema.

30Yaya ethempelini kanye labo bonke abakoJuda labaseJerusalema labapristi lamaLevi, bonke abantu abakhulu labancinyane; yababalela wonke amazwi ogwalo lwesivumelwano olwalufunyenwe ethempelini.

31Inkosi yema endaweni yayo, yenza isivumelwano phambi kweNkosi ukuba izayilalela, igcine imilayo yayo lemithetho yayo ngenhliziyo yayo yonke langomoya wayo wonke, yenze okutshiwo ngamazwi esivumelwano ayelotshiwe kulolugwalo.

32Yasibafungisa bonke ababekhona eJerusalema ukusigcina. AbaseJerusalema basebesenza njengokutsho kwesivumelwano sikaNkulunkulu, uNkulunkulu wabokhokho babo.

33UJosiya wasesusa wonke amanyala ayekhona elizweni lakoIsrayeli, wabenza bonke ababehlala koIsrayeli bayikhonze iNkosi uNkulunkulu wabo. Ngensuku zakhe zonke kabaphambukanga ekuyilandeleni iNkosi, uNkulunkulu wabokhokho babo.