uRuthe 3 - Ndebele Bible (iBhayibhili Elingcwele) 1978

URuthe loBowasi baya esizeni

1UNawomi uninazala wathi kuye: Mntanami, ngingakudingeli umuntu yini ongakuthatha ukuba uhlale kuhle laye na?

2Nango uBowasi isihlobo sethu obusebenza lamantombazana akhe. Uyabhula ibhali lakhe ngalobubusuku esizeni sakhe.

3Geza ugcobe, ucece ngezigqoko zakho ezinhle, uye khona esizeni; kodwa ungazivezi kuye aze aqede ukudla lokunatha.

4Kodwa kuthi lapho eselala, uqaphelise indawo alala kiyo, ungene, ubususambula inyawo zakhe, ulale phansi, yena uzakukutshela ofanele ukwenze.

5URuthe wasesithi: Konke okutshoyo ngizakukwenza.

6Wasesiya khona esizeni, wenza njengokutshelwa kwakhe nguninazala.

7Kwathi lapho uBowasi esedlile wanatha, waba lomdlozela, wasuka wayalala phansi ekucineni kwenqumbi yamabele. URuthe wasenyenya, wambula inyawo zakhe, walala phansi.

8Phakathi kobusuku uBowasi wethuka, waphenduka, wabona owesifazana elele ngasenyaweni zakhe.

9Wathi: Ungubani wena? Yena waphendula wathi: NginguRuthe incekukazi yakho; yembesa incekukazi yakho ngengubo yakho, ngoba wena uyisihlobo sethu esiseduze kithi, ufanele ukungilondoloza.

10Yena wathi: INkosi ikubusise, mntanami, ngoba usuwenze lumusa wakho ube mkhulu kulowokuqala, kawuyanga ensizweni ezingabayanga loba ezinothileyo.

11Ngakho, mntanami, ungesabi, ngizakukwenzela okucelayo, ngoba bonke abantu bomuzi wakithi bayazi ukuthi ungowesifazana oqotho.

12Yebo, kuliqiniso ukuba ngiyisihlobo esiseduze, kanti kukhona isihlobo esiseduze kakhulu kulami.Ruthe 2:20

13Hlala lapha lobubusuku; kuzakuthi ekuseni uba yena ethanda ukungena esikhundleni sesihlobo esiseduze, kulungile; kodwa uba engathandi, ngizakukwenza lokho mina, ngifunga iNkosi. Lalake kuze kuse.

14URuthe walala ngasezinyaweni zakhe kwaze kwasa, wavuka ekuseni abantu bengakabonani; uBowasi wathi: Kakungaziwa muntu ukuba owesifazana ufikile lapha esizeni.

15Wasesithi: Letha ingubo leyo oyembetheyo, uyendlale. URuthe waseyendlala. Yena wasemthelela ibhali elingamagokoko amathathu, wasemethwesa yona; uRuthe wabuyela ekhaya.

16Kwathi esefikile kuninazala, yena wathi: Uqhube njani, mntanami? URuthe wasemtshela konke lowomuntu ayemenzele khona,

17wathi: UBowasi unginike lamagokoko amathathu ebhali, ngoba wathi: Ungabuyeli kunyokozala ungelalutho.

18UNawomi waphendula wathi: Hlala, mntanami, uze wazi ukuba lindaba izaphetha ngani, ngoba lowomuntu kayikuphumula, engakayilungisi indaba lamhla.