Zaga 21 - Ndebele Bible (iBhayibhili Elingcwele) 1978

1INkosi iphatha inhliziyo yombusi,

imqondisa njengokuthanda kwayo

njengokuqondisa kwayo imifula yamanzi.

2Zonke indlela zomuntu zilungile kuye,

kodwa iNkosi ihlola inhliziyo.

3Ukwenza ukulunga lokufaneleyo

kuyithokozisa iNkosi kakhulu kulemihlatshelo.

4Ukuzikhukhumeza lokuzigqaja kuyizono ezibusa ababi.

5Ukulungiselela kwabakhutheleyo kuveza okunengi,

bonke abalamawala bazakuswela.

6Inotho ezuzwa ngokuqamba amanga injengomoya odlulayo,

futhi ingumjibila wokufa.

7Isihluku sababi sizabakhukhula,

ngoba besala ukwenza okulungileyo.

8Abalamacala bahamba ngendlela engaqondanga,

abamsulwa benza okulungileyo.

9Kungcono ukuhlala ophahleni

kulokuhlala endlini lowesifazana ohluphayo.

10Omubi ufisa ukwenza okubi,

kalasihawu kumakhelwana wakhe.

11Nxa isideleli sitshaywa, umuntu ongelalwazi uyahlakanipha;

kodwa ohlakaniphileyo uyafunda nxa elaywa.

12UNkulunkulu olungileyo uyaqaphelisa indlu yomubi,

amchithe omubi.

13Ovala indlebe zakhe ekukhaleni kwabayanga

laye kayikusatshelwa ekukhaleni kwakhe.

14Isiphiwo esinikwa ensitha sidambisa intukuthelo,

lomvuzo wokuthengwa onikwa ensitha udambisa ulaka oluvuthayo.

15Lapho ukulunga kusenziwa, abalungileyo bayathokoza,

kodwa ababi bayachitheka.

16Umuntu oduha endleleni yokuhlakanipha

uzahlala endaweni yabafileyo.

17Othanda ukuzithokozisa uzakuba ngumyanga,

lothanda iwayini lezibondlo kayikunotha.

18Abantu ababi bazehlisela ububi

abazama ukubehlisela kwabalungileyo.

19Kungcono ukuhlala enkangala

kulokuhlala lowesifazana ohluphayo lothethayo.

20Indlu yohlakaniphileyo igcwele inotho,

kodwa oyisithutha uyayichitha inotho yakhe.

21Odinga ukulunga lomusa

uzakuthola ukuphila lodumo.

22Ohlakaniphileyo anganqoba umuzi wamaqhawe,

adilizele phansi inqaba ayithembileyo.

23Onqanda umlomo wakhe lolimi lwakhe uyazivikela enhluphekweni.

24Umuntu ozigqajayo, lozikhukhumezayo, lohamba ngokuziqakisa,

kuthiwa uyisideleli.

25Izifiso zevila ziyalibhubhisa ngoba kalithandi ukusebenza;

26usuku lonke liyafisa izinto;

kodwa olungileyo uyaphana, kancitshani.

27Umhlatshelo wababi uyisinengiso eNkosini,

ikakhulu nxa bewuletha ngenhliziyo ezimbi.

28Ufakazi wamanga uzakubhubha,

kodwa ilizwi lolalelayo lizalalelwa.

29Omubi uzitshaya olesibindi,

kodwa olungileyo uqinile ekuhambeni kwakhe.

30Ukuhlakanipha lokuqedisisa lokweluleka

kakusilutho phambi kweNkosi.

31Ibhiza lingalungiselwa usuku lokulwa,

kodwa yiNkosi enika ukunqoba.