Isa 27 - Ndebele Bible (iBhayibhili Elingcwele) 1978

1Ngalolosuku iNkosi izakutshaya uLeviyathani,

inyoka ephaphayo, inyoka ethandelayo,

imtshaye ngomhedla wayo olukhuni lomkhulu lolamandla,

ibulale lumgobho osolwandle.

2Ngalolosuku iNkosi izakuthi: Hlabelani ngesivini esihle.

3Mina Nkosi, ngingumlondolozi waso,

ngiyasithelela isikhathi sonke;

ngisilondoloze ebusuku lemini,

funa kube khona osonayo.

4Ukuthukuthela kakusekho kimi.

Kungathi kungaba khona ameva lokhula!

bengizakukusukela ngilwe lakho, ngikutshise.

5Uba izitha zethu zifuna ukuvikela kwami

kazenze ukuthula lami,

yebo, kazenze ukuthula lami.

6Kuzakuthi ensukwini ezizayo uJakobe agxumeke,

loIsrayeli ahlume, akhahlele,

agcwalise umhlaba wonke ngezithelo.

7INkosi ibatshayile abantu bayo njengokutshaya kwayo ababatshayayo na?

Babulewe njengokubulawa kwabababulalayo na?

8Ngokubaxotsha langokubasa ekuthunjweni ibatshayile abantu bayo;

yabasusa ngomoya wayo olamandla ngokuphephetha komoya wasempumalanga.

9Ngalokhu uJakobe uzathethelelwa okubi kwakhe;

lokhu kuzakuba yisibonakaliso sokususwa kwesono sakhe,

lapho esenza ukuba wonke amatshe ealtare avuthuzeke njengekalaga,

kungabe kusamiswa insika ezimiselwe unkulunkulukazi uAshera lama‐altare empepha.

10Umuzi obiyelweyo usulunxiwa,

usuyindawo engelalutho, esele iyinkangala;

lapho ithole lidla khona, lilale khona,

lidle liqede lamahlamvu awo.

11Lapho ingatsha zawo sezomile ziyephulwa;

abesifazana beze bazibuse.

Ngoba laba ngabantu abangelakuqonda;

ngakhoke lowo owabenzayo kayikubahawukela,

lowababumbayo kayikubenzela umusa.

12Kuzakuthi ngalolosuku iNkosi ibhule amabele,

kusukela emfuleni iYufrathi kuze kube semfuleni waseGibithe;

lizakubuthwa ngamunye ngamunye, lina bakoIsrayeli.

13Kuzakuthi ngalolosuku kutshaywe uphondo olukhulu,

lalabo ababelahlekile elizweni laseAsiriya

labaxotshelwe elizweni laseGibithe bazakuza,

bayikhonze iNkosi entabeni engcwele eJerusalema.