uEzra 7 - Ndebele Bible (iBhayibhili Elingcwele) 1978

UEzra uya eJerusalema

1Emva kwalokho, kusabusa uAtakisekisi inkosi yasePerisiya, kwasuka uEzra owayeyindodana kaSeraya kaAzariya kaHilikiya

2kaShaluma kaZadoki kaAhitubi

3kaAmariya kaAzariya kaMerayothi

4kaZerahiya kaUzi kaBuki

5kaAbishuwa kaFiniyasi kaEleyazare kaAroni umpristi omkhulu.

6Wayengumbhali owaziyo umlayo kaMose owawunikwe yiNkosi, uNkulunkulu kaIsrayeli. Inkosi yamnika konke ayekucelile, ngoba iNkosi uNkulunkulu wakhe yayilaye.

7Ngomnyaka wesikhombisa wokubusa kwenkosi uAtakisekisi abanye abakoIsrayeli labapristi lamaLevi labahlabeleli labalindi bamasango lezinceku zasethempelini bahamba laye eJerusalema.

8Wafika eJerusalema ngenyanga yesihlanu ngomnyaka wesikhombisa wokubusa kwenkosi.

9Wasuka eBabiloni ngosuku lokuqala lwenyanga yokuqala, wayafika eJerusalema ngosuku lokuqala lwenyanga yesihlanu; ngoba uNkulunkulu wakhe wayelaye.

10UEzra wayezimisele ukuwufunda umlayo weNkosi lokuwenza lokufundisa imithetho lezimiso koIsrayeli.

11Nansi incwadi inkosi uAtakisekisi eyayinika uEzra umpristi umbhali owaziyo imilayo yeNkosi lemithetho yayo eyabekwa koIsrayeli.

12Mina Atakisekisi inkosi yamakhosi ngithi kuEzra umpristi, umbhali womlayo kaNkulunkulu ophezulu:

13Ngiyamisa umthetho wokuthi bonke abantu bakoIsrayeli labapristi babo lamaLevi abakhona embusweni wami abazithandelayo ukuya eJerusalema bangahamba lawe.

14Ngoba uthunyiwe yinkosi lezikhulu zayo eziyisikhombisa ukuba uyehlolisisa ngoJuda langeJerusalema ngokufanele umlayo kaNkulunkulu wakho owuphetheyo,

15lokusa khona igolide lesiliva okunikelwe ngesihle yinkosi lezikhulu zayo kuNkulunkulu kaIsrayeli ohlala eJerusalema,

16kanye laso sonke isiliva legolide ongakuzuza elizweni lonke laseBabiloni leminikelo yesihle yabantu labapristi abayinikelela indlu kaNkulunkulu wabo eseJerusalema.

17Ngalimali uthenge kuphela izinkunzi lezinqama lamawundlu kanye leminikelo yabo yempuphu leyokunathwayo, ukunikele phezu kwealtare lendlu kaNkulunkulu wenu eseJerusalema.

18Isiliva legolide eliseleyo lizakwenza ngakho wena labafowenu elikubona kulungile lokufanele intando kaNkulunkulu wenu.

19Izitsha ozinikelwe umsebenzi wendlu kaNkulunkulu wenu uzazibeka phambi kukaNkulunkulu waseJerusalema.

20Loba kuyini okuswelekayo endlini kaNkulunkulu wenu okudingeka ukwenze uzakukuhlawulela ngemali yenotho yenkosi.

21Mina Atakisekisi, inkosi, ngiyabamisela lumlayo bonke abaphathi bezikhwama abaselizweni elingaphetsheya komfula iYufrathi ngithi: Loba kuyini uEzra umpristi, umbhali womlayo kaNkulunkulu waphezulu, acela ukuba limnike khona, limnike konke

22kuze kufike kumathalenta esiliva alikhulu, lamasaka angamakhulu amabili amabele, lamatanka alikhulu ewayini, lamatanka alikhulu amafutha, letshwayi elingelakulinganiswa.

23Konke okufunwa nguNkulunkulu ophezulu kwenzelwe indlu kaNkulunkulu ophezulu ngokupheleyo, funa ulaka lwakhe lube phezu kombuso wenkosi lamadodana ayo.

24Futhi siyalitshela ukuthi kungaphandle komthetho ukuthelisa abapristi lamaLevi labahlabeleli labalindi bamasango lezinceku zasethempelini lezinye inceku zalindlu kaNkulunkulu.

25Laweke Ezra, ngokuhlakanipha olakho okuvela kuNkulunkulu wakho beka abathonisisi labehluleli abazakwahlulela bonke abantu abaselizweni elingaphetsheya kweYufrathi, bonke abayaziyo imilayo kaNkulunkulu wakho; labo abangayaziyo uzabafundisa.

26Abangayikulalela umlayo kaNkulunkulu wakho lomiayo wenkosi kabathonisiswe ngokupheleleyo, ukuze babulawe loba baxotshwe loba bathathelwe impahla zabo loba bafakwe entolongweni.

27UEzra wasesithi: Kayibongwe iNkosi uNkulunkulu wabokhokho eyafaka into enjengale enhliziyweni yenkosi ukuba ithempeli eliseJerusalema libe lodumo,

28yenza inkosi lezikhulu zayo lazo zonke iziphathamandla zayo zibe lomusa kimi. Ngaba lesibindi ngoba iNkosi uNkulunkulu wami yayilami, ngabuthanisa izikhulu zakoIsrayeli ukuhamba lami.