1Wasephendula uJobe esithi
2Impela yini elingabantu,
lokuhlakanipha kuzakufa lani.
3Kodwa lami ngilengqondo njengani,
kalingedluli ngalutho.
Ngubani ongazaziyo izinto ezinje na?
4Ngiyinhlekisa kubangane bami.
Mina engangikhuleka kuNkulunkulu, angiphendule,
umuntu olungileyo ongelasici,
sengiyinhlekisa.
5Emicabangweni yomuntu ohlezi kuhle ingozi iyadeleleka,
ilungiselwe abalenyawo ezitshelelayo.
6Kanti amathente abaphangi alokuthula,
labamthukuthelisayo uNkulunkulu bahlala kuhle,
abenza amandla abo abe ngunkulunkulu wabo.
7Kodwa ake ubuze inyamazana, zizakukufundisa,
lenyoni zaphezulu, zizakukutshela,
8lezinto ezihahabayo zikufundise,
inhlanzi zolwandle, zikulandisele.
9Nguwuphi ongaziyo phakathi kwakho konke lokhu
ukuba isandla sikaNkulunkulu sikwenzile lokhu na?
10Ukuphila kwakho konke okuphilayo
kusesandleni sakhe, kanye lemimoya yabantu bonke.
11Indlebe kayiwahloli yini amazwi
njengolwanga lunambitha ukudla na?
12Ubudala bulokuhlakanipha,
lokuphila okude kuletha ukuqedisisa.
13Kodwa kunkulunkulu kukhona ukuhlakanipha lamandla,
ulecebo kanye lokuqedisisa.
14Uba ediliza, kakho ongakha futhi;
uba evalela umuntu, kakho ongamvulela.
15Uba evimbela amanzi, ayatsha;
uba ewavulela, ayagcwala emhlabeni.
16Kuye kukhona amandla lokuhlakanipha;
oduhisiweyo lomduhisi bangabakhe.
17Uphendula abaluleki babe yiziphukuphuku,
aphendule abahluleli babe yizithutha.
18Uqeda amandla amakhosi,
awabophe enkalweni ngamaketane.
19Uphendula abapristi babe yiziphukuphuku,
awise abalamandla;
20abathembekileyo abaphendule babe yizimungulu,
asuse ukuhlakanipha kwabadala.
21Uthela izikhulu ngehlazo,
aqede amandla ababusayo.
22Uyambula imfihlakalo esemnyameni,
alethe ukukhanya emnyameni omkhulu;
23enze izizwe zibe zinkulu, abuye azichithe,
andise izizwe, abuye azisuse.
24Uyasusa ukuhlakanipha ezikhulwini zabantu bomhlaba,
aziduhise enkangala engelandlela,
25ziphumputhe emnyameni ongelakukhanya,
ziyende njengomuntu odakiweyo.
Who We AreWhat We EelieveWhat We Do
2025 by iamachristian.org,Inc All rights reserved.
