Hez 11 - Ndebele Bible (iBhayibhili Elingcwele) 1978

AbaseJerusalema bazathonisiswa

1Umoya wangiphakamisa, wangisa ngasesangweni lendlu yeNkosi elingasempumalanga, elikhangele ngasempumalanga. Emnyango wesango kwakukhona amadoda angamatshumi amabili lanhlanu; phakathi kwawo ngabona uJazaniya indodana kaAzuri, loPelatiya indodana kaBenaya, izikhulu zabantu.

2INkosi yathi kimi: Ndoda, yiwo la amadoda enza amacebo amabi, anika izelukeko ezimbi kulumuzi,

3athi: Isikhathi kasikafiki sokuba kwakhiwe izindlu; lumuzi uyimbiza, thina siyinyama.

4Ngakhoke tshumayela ngawo, tshumayela wena ndoda.

5Umoya weNkosi wehlela kimi, iNkosi yangitshela ukuba ngithi: INkosi ithi: Litsho njalo, lina bakoIsrayeli, ngoba ngiyakwazi okusengqondweni zenu.

6Libulele abantu abanengi kulumuzi, lagcwalisa indlela zawo ngezidumbu.

7Ngakhoke iNkosi uNkulunkulu ithi: Izidumbu zabakini elizibeke phakathi kwawo yizo eziyinyama, lumuzi uyimbiza; kodwa lina lizakhutshwa phakathi kwawo.

8Liwesabile umkhonto, ngizalilethela wona, kutsho iNkosi uNkulunkulu.

9Ngizalikhupha phakathi kwalumuzi, ngilinikele ezandleni zabezizwe, ngilithonisise.

10Lizabulawa yimpi, ngilithonisise emikhawuleni yakoIsrayeli; lizakwazi ukuba ngiyiNkosi.

11Lumuzi kawuyikuba yimbiza yenu, lani kaliyikuba yinyama phakathi kwayo. Ngizalithonisisa emikhawulweni yakoIsrayeli.

12Lizakwazi ukuba ngiyiNkosi. Ngoba kalihambanga ngezimiso zami, lemithetho yami kaliyenzanga, kodwa lenze imithetho yezizwe ezilihanqileyo.

13Kwathi lokhu ngisatshumayela, uPelatiya indodana kaBenaya wafa. Ngasengisithi mbo ngobuso phansi, ngamemeza ngelizwi elikhulu ngathi: Hawu, Nkosi uNkulunkulu! Uzabaqeda abaseleyo koIsrayeli na?

INkosi ithembisa ukubuyisa abathunjiweyo

14Ilizwi leNkosi lafika kimi lathi:

15Ndoda, abafowenu, yebo abafowenu abayizihlobo zakho, wonke uIsrayeli, yibo abatshelwe ngabakhileyo eJerusalema ukuthi: Selikhatshana leNkosi. Ilizwe selinikwe thina ukuba libe yilifa lethu.

16Ngakho iNkosi uNkulunkulu ithi: Loba ngibese khatshana phakathi kwezizwe, ngabachithachithela emazweni, kanti ngibe yindlu engcwele kibo okwesikhatshana emazweni engabachithachithela kiwo.

17Ngakhoke tshono uthi iNkosi uNkulunkulu ithi: Ngizabaqoqa ezizweni, ngibabuthe emazweni engibachithachithele kiwo, ngibanike ilizwe lakoIsrayeli.

18Lapho befika kulo, bazasusa lapho konke okunengisayo kwalo, lawo wonke amanyala alo.

19Ngizabanika inhliziyonye, ngifake umoya omutsha phakathi kwabo, ngikhuphe inhliziyo elukhuni kibo, ngibanike inhliziyo ebuthakathaka,Hez 36:26–28

20ukuba bahambe ngezimiso zami, bagcine imithetho yami bayilalele; bazakuba ngabantu bami, lami ngibe nguNkulunkulu wabo.

21Kodwa labo abanhliziyo zabo zithanda okunengisayo kwabo lamanyala abo, ngizaphindisela izenzo zabo phezu kwabo, kutsho iNkosi uNkulunkulu.

22 Amakherubi asephakamisa impiko zawo, amavili asuka lawo; inkazimulo kaNkulunkulu kaIsrayeli yayingaphezu kwawo.Hez 43:2–5

23Inkazimulo yeNkosi yasuka phakathi komuzi, yema phezu kwentaba engasempumalanga komuzi.

24Umoya wangiphakamisa, wangisa kwabathunjiweyo eKaladiya. Konke lokhu kwafika ngombono owawuthunywe ngumoya kaNkulunkulu; kwathi umbono engangiwubonile wasusuka kimi.

25Ngasengibatshela abathunjiweyo zonke izinto iNkosi eyayingitshengise zona.