Mark 3 - Ndebele Bible (iBhayibhili Elingcwele) 1978

UJesu usilisa ngeSabatha(Mat 12:9–14; Luka 6:6–11)

1Wabuya wangena esinagogeni. Kwakukhona lapho umuntu olesandla esitshwabheneyo.

2Bamqaphela ukuba uzakumsilisa ngeSabatha, ukuze bambeke icala.

3Wathi kumuntu olesandla esitshwabheneyo: Sukuma, ume phakathi.

4Wathi kubo: Kuvunyelwe yini ngeSabatha ukwenza okulungileyo ingabe ukwenza okungalunganga, ukusilisa ingabe ukubulala na? Bathula.

5Wabathalaza ngokuthukuthela, edabukile ngobulukhuni benhliziyo zabo; wathi kulowomuntu: Yelula isandla sakho. Waselula, isandla sakhe sasiliswa.

6AbaFarisi baphuma, bacebisana masinyane labakaHerodi ukuba bangambulala kanjani uJesu.

UJesu usilisa abanye abantu

7UJesu waphuma labafundi bakhe, waya ngasolwandle; ixuku elikhulu lamlandela livela eGalili laseJudiya,

8laseJerusalema, laseIdumiya, langaphetsheya kweJordani, lasemimangweni yaseTire leSidoni; ixuku elikhulu selizwile konke akwenzayo, leza kuye.

9Watshela abafundi bakhe ukuba bamlungisele umkolo ngenxa yexuku, ukuze lingamcindezeli.Mark 4:1; Luka 5:1–3

10Ngoba wayesilisa abantu abanengi, baze bawela phezu kwakhe bonke abalezifo ukuze bamthinte.

11Omoya ababi babesithi bembona, bawe phansi phambi kwakhe, bakhale bathi: Wena uyiNdodana kaNkulunkulu.

12Wabalayisisa ukuba bangamvezi.

Ukukhethwa kwabaphostoli(Mat 10:1–4; Luka 6:12–16)

13Wenyukela entabeni, wabizela kuye labo ayebafuna; beza kuye.

14Wamisa abalitshumi lambili ukuze babe laye abathume ukuyatshumayela,

15babe lamandla okukhupha omoya ababi.

16Wamisa abalitshumi lambili; uSimoni amutha ibizo lokuthi nguPetro,

17loJakobe indodana kaZebediya, loJohane, umfowabo kaJakobe, wabatha wathi ngoBowanegesi okuyikuthi amadodana okuduma;

18loAndreya loFiliphu, loBartolomewu, loMathewu, loTomasi, loJakobe indodana kaAlfewu, loTadewu, loSimoni umKanani,

19loJudasi uIskariyothi owamnikelayo.

Isono sokuhlambaza(Mat 12:22–37; Luka 11:14–23; 12:10)

20Wangena endlini; ixuku labuthana futhi, baze baswela lethuba lokudla.

21Abakibo sebezwile lokhu baphuma ukuyambamba, ngoba bathi uyahlanya.

22Lababhali abavela eJerusalema bathi: UloBelezebule, uyakhupha omoya ababi ngenkosi yomoya ababi.Mat 9:34; 10:25

23Wababizela kuye, wakhuluma labo ngemifanekiso wathi: USathane angakhupha kanjani uSathane na?

24Uba umbuso wahlukene phakathi, lowombuso ungeme.

25Lendlu uba yahlukene phakathi, leyondlu ingeme.

26LoSathane, uba ezivukela yena, ahlukane phakathi, angeme, kodwa uyaphela.

27Yebo, kakho ongangena endlini yesiqhwaga, aphange impahla yaso, uba engasibophi isiqhwaga kuqala, anduba aphange indlu yaso.

28Ngiqinisile ngithi kini: Zonke izono zizakuthethelelwa abantu lokuhlambaza abahlambaza ngakho.

29Kodwa lowo ohlambaza uMoya oNgewele kalakuthethelelwa lanini, kodwa ulecala lesono esingapheliyo.Luka 12:10

30Watsho lokhu ngoba bathi ulomoya omubi.

Izihlobo zikaJesu eziyizo(Mat 12:46–50; Luka 8:19–21)

31Kwafika unina labafowabo bema ngaphandle, bathumela kuye bembiza.

32Ixuku lalimphahlile; bathi kuye: Khangela, unyoko labafowenu bangaphandle bayakufuna.

33Waphendula wathi: Ngubani umama labafowethu na?

34Wathalaza labo ababehlezi bemphahlile, wathi: Khangelani, nangu umama labafowethu.

35Ngoba ilowo lalowo owenza intando kaNkulunkulu nguye ongumfowethu lodadewethu lomama.