Roma 3 - Ndebele Bible (iBhayibhili Elingcwele) 1978

AbaJuda balelungelo kulabanye ngoba banikiwe umlayo

1Phoke, kuyini umJuda adlula abanye ngakho na? Ukusoka kulokusiza bani na?

2Kukhulu ngezindlela zonke. Kuqala, ngoba abaJuda baphathisiwe amazwi kaNkulunkulu.

3Uba abanye bengathembekanga, kunjani pho? Ukungathembeki kwabo kuzakwenza ize ukuthembeka kukaNkulunkulu na?

4Phinde! Kakube yikuthi uNkulunkulu uqinisile loba wonke umuntu eqamba amanga, njengokulotshiweyo ukuthi:

Ukuze ubonwe ukuthi ulungile emazwini akho,

unqobe ekuthonisisweni kwakho.

5Kodwa uba ukungalungi kwethu kubonakalisa ukulunga kukaNkulunkulu, sizakuthini na? UNkulunkulu kalunganga yini ngokwehlisela ulaka phezu kwethu na? Ngikhulumisa okomuntu.

6Phinde! Ngoba uNkulunkulu angawuthonisisa umhlaba kanjani na?

7Futhike, uba iqiniso likaNkulunkulu landisile udumo lwakhe ngamanga ami, ngisathonisiselwani njengesoni na?

8Pho, kungani singenzi okubi ukuze kuvele okuhle, njengalokhu abanye abasigconayo besithi sitsho njalo na? Ukulahlwa kwabo kubafanele.

AbaJuda balesono njengabanye

9Phoke, thina esingabaJuda singcono na? Atshi, kasingcono lakanye. Ngoba sesitshilo ukuthi abantu bonke, abaJuda lamaGriki, basemandleni esono,

10njengokulotshiweyo ukuthi:

Kakho olungileyo, kakho loyedwa;

11kakho oqedisisayo, kakho ofuna uNkulunkulu.

12Bonke baphambukile, bonakele bonkana;

kakho owenza okuhle, kakho loyedwa.

13Umphimbo wabo uliliba elivulekileyo,

bakhohlisa ngenlimi zabo;

ubuhlungu bezinyoka busendebeni zabo,

14umlomo wabo ugcwele ukuthuka lokubaba.

15Inyawo zabo ziphangisela ukuchitha igazi,

16incithakalo losizi kusendleleni zabo,

17indlela yokuthula kabayazi.

18Ukwesaba uNkulunkulu kakukho engqondweni abo.

19Siyazi ukuthi lokho okutshoyo umlayo, ukukhuluma kibo abangaphansi komlayo, ukuba yonke imilomo ivinjelwe, lokuba umhlaba wonke ube ngaphansi kokuthonisisa kukaNkulunkulu.

20Ngoba ngemisebenzi yomlayo kakho ozakulungisiswa phambi kwakhe, lokhu ngomlayo kuvela ukwazi isono kuphela.Umuntu ulungisiswa ngoJesu Kristu

21Kodwa sekubonakalisiwe ukulunga kukaNkulunkulu ngaphandle komlayo, lanxa kufakazelwa ngumlayo labaprofethi,

22ngitsho ukulunga kukaNkulunkulu okungokukholwa kuKristu kibo bonke abakholwayo. Ngoba kawukho umahluko.Gal 2:16

23Bonke bonile, basilele enkazimulweni kaNkulunkulu.

24Balungisiswa ngesihle ngomusa wakhe, ngokuhlengwa okukuKristu Jesu

25ammisayo uNkulunkulu ukuba abe yinhlawulo ngegazi lakhe, emukelwe ngokukholwa. UNkulunkulu wakwenza lokhu ukuba abonakalise ukulunga kwakhe, ngoba ngokubekezela kwakhe wayekela izono ezenziwa ngaphambili;

26wafisa ukubonakalisa ukulunga kwakhe kulesisikhathi, ukuze azibonakalise ukuthi yena ulungile lokuthi uyamlungisisa lowo okholwa kuJesu.

27Ngakhoke kungaphi ukuzincoma kwethu na? Kuvalelwe phandle. Ngomthetho bani? Ngokwemisebenzi na? Atshi bo, kodwa ngomthetho wokukholwa.

28Ngoba sithi umuntu ulungisiswa ngokukholwa ngaphandle kwemisebenzi yomlayo.

29Kambe uNkulunkulu unguNkulunkulu wabaJuda kuphela na? Kasuye uNkulunkulu lowabezizwe na? Yebo, lowabezizwe,

30lokhu uNkulunkulu emunye. Uzakulungisisa abasokileyo ngokukholwa kwabo labangasokanga ngokukholwa.Dute 6:4; Gal 3:20

31Ngakhoke siyawenza umlayo ube yize ngokukholwa na? Phinde! Kodwa siyawuqinisa umlayo.