Isa 29 - Ndebele Bible (iBhayibhili Elingcwele) 1978

Okuzakwenzeka eJerusalema

1Maye kulo iAriyeli,

umuzi lapho uDavida ayehlala khona!

Yengezelela umnyaka emnyakeni,

lemikhosi iqhubeke ngokumiswa kwayo;

2emva kwalokhu ngizakuwuhlupha umuzi othiwa yiAriyeli,

kube khona ukulila lokukhala;

ngizawenza ugcwale igazi njengealtare.

3Wena muzi, ngizakukuhlasela inxa zonke ngempi,

ngikuzingelezele ngezinqaba,

ngikumisele imithangala yokuvimbezela.

4Uzadilizelwa phansi, ukhulume usemhlabathini,

amazwi akho azavela phansi othulini,

lelizwi lakho livele phansi njengelizwi lesipuku,

ukukhuluma kwakho kunyenyeze othulini.

5Kodwe ixuku lezitha zakho lizakuba njengobhuqu olucholekileyo,

lexuku labalesihluku libe njengamakhoba adlulayo.

Masinyane ngesikhatshana nje.

6iNkosi yamabandla izakukuhambela ngokuduma langokuzamazama komhlaba langomsindo omkhulu,

ifike ngesivunguzane lesiphepha,

langelangabi lomlilo oqothulayo.

7Ixuku lezizwe zonke ezilwa lomuzi othiwa yiAriyeli,

lazo zonke izinto zazo zokulwa lezinqaba zazo,

zizakuba njengephupho, lombono wasebusuku.

8Kuzakuba njengomuntu olambileyo ephupha ukuthi uyadla,

kodwa aphaphame abe lokhu esalambile,

loba njengomuntu owomileyo ephupha ukuthi uyanatha,

aphaphame abe lokhu esomile,

lizakuba njalo ixuku lazo zonke izizwe ezilwa lentaba yaseZiyone.

Ukuphumputheka kukaIsrayeli

9Mangalani, lithithibale,

phumputhekani, libe yiziphofu,

dakwani, kodwa lingadakwa liwayini,

dayizelani, kodwa lingadayizeliswa butshwala.

10Ngoba iNkosi ilehlisele umoya wobuthongo obunzima,

yavula amehlo enu, baprofethi,

yagubuzela amakhanda enu, baboni.

11Yonke imibono yabaprofethi isibe njengencwadi enanyekiweyo, enikwa owazi ukubala, kuthiwa: Bala lokhu; yena athi: Ngingekubale, ngoba kunanyekiwe.

12Incwadi ibisinikwa ongakwazi ukubala, kuthiwa: Bala lokhu; yena athi: Kangikwazi ukubala.

13INkosi yathi:

Ngenxa yokuba lababantu besondela kimi

bangidumise ngemilomo yabo, langezindebe zabo,

kodwa inhliziyo zabo zikhatshana lami,

lokholo lwabo luyimilayo yabantu abayifundisiweyo nje,

14ngakhoke ngizakubuya ngethuse lababantu ngezinto ezimangalisayo;

lokuhlakanipha kwabahlakaniphileyo babo kuzakuphela,

lokuqedisisa kwabaqedisisayo babo kuphele.Ukukhululwa kukaIsrayeli

15Maye kulabo abafihlela iNkosi amacebo abo,

ebenza imisebenzi yabo emnyameni besithi:

Ngubani osibonayo na? Ngubani osaziyo na?

16Ligomonqisa izinto!

Umbumbi kangcono kulebumba na?

Okubunjiweyo kungatsho yini ngombumbi wakho ukuthi:

Yena kangenzanga;

loba imbiza ithi ngombumbi: Kalakuqedisisa?

17Kuselesikhatshana nje ukuba iLebanoni liphendulwe libe yinsimu,

lensimu iphendulwe ibe lihlathi.

18Ngalolosuku izacuthe zizakuzwa ukubalwa kwencwadi,

lamehlo eziphofu abone emnyameni omkhulu.

19Abathobileyo bazakwandiswa yikuthokoza kwabo eNkosini,

labangabayanga ebantwini bathokoze ngoNgcwele koIsrayeli.

20Ngoba abalesihluku kabasayikuba khona,

labadelelayo bazakuphela,

labo bonke abadinga ukwenza okubi bazachitheka,

21abantu ababesethwesa umuntu icala ngokufakaza amanga

bethiya lowo othetha amacala enkundleni,

abaphambukisa olungileyo ngamanga.

22Ngakhoke iNkosi eyahlenga uAbrahama ithi ngendlu kaJakobe:

UJakobe kasayikuba lanhloni,

lobuso bakhe kabusayikunyukumala.

23Ngoba lapho ebona abantwana bakhe,

umsebenzi wezandla zami phakathi kwakhe,

bazalihlonipha ibizo lami;

bazamhlonipha oNgcwele kaJakobe,

bamesabe uNkulunkulu kaIsrayeli.

24Abaduhayo bazakuqedisisa,

labasolayo bazavuma ukufundiswa.