1Kwathi emva kwalokho inkosi yamaAmoni yafa, uHanuni indodana yayo waba yinkosi esikhundleni sayo.1 Lan 19:1–19
2UDavida wathi: Ngizamenzela umusa uHanuni indodana kaNahashi njengoba uyise wangenzela umusa. UDavida wasethuma inceku zakhe ukuyamkhalela ngoyise. Zafikake elizweni lamaAmoni.
3Izikhulu zamaAmoni zathi kuHanuni inkosi yazo: Kambe ucabanga ukuthi uDavida uthumele abaduduzi kuwe ukuba ahloniphe uyihlo na? Kazithumanga yini inceku zakhe kuwe ukuba ziphenye umuzi, ziwuhlole, ziwuchithe na?
4UHanuni wasezibamba inceku zikaDavida, wazigela indevu nganxanye, waquma ingubo zazo zafika ezinqeni, wasezixotsha.
5Esekubikelwe lokho uDavida wathumela umuntu ukuzihlangabeza ngoba ayeselenhloni kakhulu lawomadoda; wasesithi: Hlalani eJeriko zize zihlume indevu zenu, beselibuyake.
6Lapho amaAmoni esebonile ukuba aseyisinengiso kuDavida, aqatsha amaSiriya aseBeti‐Rehobi lawaseZoba, amabutho ahamba ngenyawo ayeyizinkulungwane ezingamatshumi amabili, lenkosi yaseMahaka ilabantu abayinkulungwane, labantu baseTobi abazinkulungwane ezilitshumi lambili.
7Kwathi lapho uDavida esekuzwile lokho wathumela uJowabi layo yonke impi yamaqhawe.
8AmaAmoni aphuma amisa impi ngasesangweni lomuzi; amaSiriya eZoba lawaseRehobi, labantu baseTobi labaseMahaka babebodwa egangeni.
9Lapho uJowabi esebonile ukuba impondo zempi zimhanqile ngaphambili langemuva, wakhetha abanye kwabakhethiweyo koIsrayeli, wabahlela ukuba balwe lamaSiriya.
10Abanye abaseleyo wabanikeza kuAbishayi umfowabo, owabahlela ukuba balwe lamaAmoni.
11UJowabi wathi kuye: Uba amaSiriya engahlula, uzengisiza; uba amaAmoni ekwahlula, ngizakuza ukukusiza.
12Mana isibindi; asidode ngenxa yabantu bakithi, langenxa yemizi kaNkulunkulu wethu; intando yeNkosi uNkulunkulu kayenziwe.
13UJowabi labantu ababelaye basebesondela ukuba balwe lamaSiriya; abaleka phambi kwabo.
14Lapho amaAmoni ebona ukuba amaSiriya ayabaleka, abaleka lawo phambi kukaAbishayi, angena emzini. UJowabi wasebuya ekulweni lamaAmoni, waya eJerusalema.
15AmaSiriya esebonile ukuthi ahluliwe nguIsrayeli, abuthana ndawonye.
16UHadadezeri wathumela ilizwi ukubiza amaSiriya ayengaphetsheya kweYufrathi, afika eHelamu eholwa nguShobaki induna yempi kaHadadezeri.
17Lapho uDavida ebikelwa lokho, wabuthanisa wonke uIsrayeli, wachapha iJordani, wafika eHelamu. AmaSiriya azihlelela ukulwa loDavida.
18AmaSiriya abaleka phambi kukaIsrayeli; uDavida wabulala amaSiriya ezinqola zokulwa angamakhulu ayisikhombisa, labamabhiza abazinkulungwane ezingamatshumi amane, walimaza uShobaki induna yempi, wafela khona lapho.
19Lapho wonke amakhosi ayebuswa nguHadadezeri esebonile ukuba ahlulwe nguIsrayeli, axolisana loIsrayeli, athela. Ngakho amaSiriya asesesaba ukusiza amaAmoni futhi.
Who We AreWhat We EelieveWhat We Do
2025 by iamachristian.org,Inc All rights reserved.
