Jak 2 - Ndebele Bible (iBhayibhili Elingcwele) 1978

Abazalwane balaywa ukuba bangabandlululi abantu

1Bazalwane bami, njengabakholwayo iNkosi yethu uJesu Kristu, iNkosi yenkazimulo, kalingabandlululi abantu.

2Ngoba uba kungena enkonzweni yenu umuntu olamasongo egolide lezambatho ezinhle, kungene longumyanga olezambatho ezimbi,

3linanzelela kakhulu ogqoke izambatho ezinhle lithi: Hlala lapha kulindawo; beselisithi kongumyanga: Mana lapho wena; loba lithi: Hlala esigcabheni senyawo zami;

4kalibandlululi yini phakathi kwenu? Kalisibo abahluleli abangalunganga na?

5Zwanini, bazalwane bami abathandekayo; uNkulunkulu kabakhethanga yini abayanga emhlabeni ukuba babe ngabanothileyo ngokukholwa lezindlalifa zombuso awuthembisayo kulabo abamthandayo na?

6Kodwa lina libadumazile abayanga. Abanothileyo kabalicindezeli na? Kakusibo abalidonsela emacaleni na?

7Kabalihlambazi ibizo elihle elibizwa ngalo na?

8Lenza kuhle uba ligcina umlayo wobukhosi omayelana lombhalo othi: Wothanda umakhelwane wakho njengalokhu uzithanda wena.Levi 19:18

9Kodwa uba libandlulula abantu lenza isono, lomlayo ulilahla njengabaweqayo.

10Ngoba ogcina wonke umlayo kodwa akhubeke kokukodwa, ulecala lawo wonke.

11Ngoba yena owathi: Ungafebi; wathi futhi: Ungabulali. Ubake ungafebi kodwa ubulala, ungoweqa umlayo.Eks 20:13, 14; Dute 5:17, 18

12Khulumani, lenze njengokufanele abazakwahlulelwa ngomlayo wenkululeko.

13Ukwahlulela lokho kakulasihawu kulowo ongelasihawu; kodwa olesihawu uzakunqoba ekwahluleleni.

Ukukholwa kufanele kube lezenzo

14Bazalwane bami, kusizani uba umuntu esithi ulokukholwa, kodwa engelayo imisebenzi na? Ukukholwa kwakhe kungamsilisa na?

15Uba umzalwane loba umzalwanekazi behambaze, beswela ukudla,

16omunye wenu athi kibo: Hambani kuhle, lifudumale, lisuthe; kodwa engabaniki lokhu okudingwa ngumzimba, lokho kusizani na?

17Kunjaloke lokukholwa, uba kungelamisebenzi, kufile.

18Kodwa omunye uzakuthi: Wena ulokukholwa, mina ngilemisebenzi. Ngitshengisa ukukholwa kwakho ngaphandle kwemisebenzi yakho, lami ngemisebenzi yami ngizakukutshengisa ukukholwa kwami.

19Wena uyakholwa ukuba uNkulunkulu munye na? Wenza kuhle. Labomoya ababi bayakholwa, njalo bathuthumele.

20Sithuthandini, uyathanda ukwazi ukuthi ukukholwa okungelamisebenzi kuyize na?

21UAbrahama ubaba kalungisiswanga yini ngemisebenzi ekunikeleni kwakhe indodana yakhe uIsaka phezu kwealtare na?Gen 21:1–14

22Uyabona ukuthi ukukholwa kwakusebenza kanye lemisebenzi yakhe, lokuthi ukukholwa kwapheleliswa ngemisebenzi,

23kwagcwaliseka lombhalo othi: UAbrahama wakholwa uNkulunkulu, kwabalelwa kuye ukuthi kuyikulunga. Wabizwa ngokuthi ngumngane kaNkulunkulu.Gen 15:6; 2 Lan 20:7; Isa 41:8

24Liyabona ukuthi umuntu uyalungisiswa ngemisebenzi, kungesikho ngokukholwa kuphela.

25Ngokunjalo loRahabi iwule kalungisiswanga ngemisebenzi yini ekwamukeleni kwakhe izithunywa aziphumisa ngenye indlela na?Josh 2:1–21

26Ngoba njengalokhu umzimba ongelamoya ufile, ngokunjalo lokukholwa okungelamisebenzi kufile.