Jobe 36 - Ndebele Bible (iBhayibhili Elingcwele) 1978

UElihu ukhuluma ngobukhulu bukaNkulunkulu

1UElihu waqhubeka wathi:

2Ake ungibekezelele kancinyane, ngizakukubonisa,

ngoba ngiselelizwi lokumela uNkulunkulu.

3Ngizathatha izinto ezinengi ukusekela ukukhuluma kwami,

lapho ngimela ukulunga koMenzi wami.

4Ngoba impela amazwi ami kawasiwo amanga,

ulawe yena olokwazi okupheleleyo.

5Ngithi uNkulunkulu uyabalahla abakhulu labalamandla,

6kamyekeli omubi aphumelele,

kodwa uyabanika okulungileyo abayanga labahluphekayo,

7kamamuki ilungelo lakhe ohluphekayo.

Ake ukhangele amakhosi ezihlalweni zawo zobukhosi,

lapho uNkulunkulu ewanika amandla, ayazikhukhumeza.

8Kuthi usuwabona futhi esebotshiwe ngezibopho,

esebotshwe ngamaketane abathunjiweyo;

9uNkulunkulu abesewabonisa izenzo zawo leziphambeko zawo zokuthi aziphakamisile.

10Ukhuluma amazwi okulaya endlebeni zawo,

awalaye ukuba asuke ebubini.

11Uba elalela, amkhonze,

ayaqeda insuku zawo ephumelela,

leminyaka yawo phakathi kokunengi.

12Kodwa uba engalaleli ayabhujiswa,

afe engelakwazi.

13Abangamesabiyo uNkulunkulu bahlala bethukuthele,

kabaceli ukusizwa nxa ebabopha.

14Bayafa ebutsheni babo,

ukuphila kwabo kuphelele phakathi kwabangcolileyo.

15Ukhulula abahluphekayo ngokuhlupheka kwabo,

abafundise ngenkathazo.

16Lawe wakukhupha osizini,

ukuba ulondolozeke;

ube lokudla okunengi okumnandi esithebeni sakho.

17Kodwa khathesi wena wehlelwe yikuthonisiswa komubi,

ukuthonisisa lokulunga kukubambile.

18Qaphela, funa ulaka lukuhugele ekuklolodeni,

lobukhulu benhlawulo bukuphambukise.

19Inotho yakho leyo loba inengi ingakusiza yini,

kanye lawo wonke amandla esikhundla sakho esiphakemeyo na?

20Ungesabi nxa ubona izinto ezesabekayo ebusuku,

labantu bechithwa endaweni zabo.

21Qaphela, ungaphambukeli ebubini,

ngoba ngenxa yalokho uyahlolwa ngokuhlupheka.

22UNkulunkulu mkhulu ngamandla akhe,

ngubani ongafundisa njengaye na?

23Ngubani ommisele indlela yakhe na?

Ngubani ongatsho kuye ukuthi: Wena wonile?

24Khumbula ukukhulisa izenzo zakhe,

abahlabela ngazo abantu.

25Bonke abantu bazibonile,

bazibona bekhatshana.

26UNkulunkulu mkhulu, kasimazi,

leminyaka yakhe kayilakubalwa.

27Uyakhupha amathonsi amanzi olwandle,

anise izulu enkungwini ayenzileyo;

28amayezi alehlisele phansi,

litheleke kakhulu ebantwini.

29Kukhona ongaqedisisa ukwendlaleka kwamayezi,

lokuduma okuvela endaweni yakhe na?

30Uyendlala inkungu azizingelezele ngayo,

agubuzele ingqonga zentaba ngayo.

31Ngoba ngakho uyondla abantu,

aphane kakhulu ngokudla,

32Uyathatha umbane ngezandla zakhe,

akhethe indawo angatshaya kuyo.

33Ekuthukutheleni kwakhe ubiza isiphepha,

lokuduma kubika ukuza kwaso.