Josh 17 - Ndebele Bible (iBhayibhili Elingcwele) 1978

Ilizwe elanikwa isizwe sakoManase

1Kwasekusabelwa abakoManase, ngoba uManase wayelizibulo likaJosefa. UMakiri izibulo likaManase uyise kaGileyadi wanikwa iGileyadi leBashani, ngoba wayengumuntu wempi.

2Abaseleyo esizweni sakoManase ngosendo lwabo babengabakoAbiyezeri labakoHeleki labakoAsiriyeli labakoShekema labakoHeferi labakoShemida. Laba babengabantwana besilisa bakaManase indodana kaJosefa ngosendo lwabo.

3UZelofehadi indodana kaHeferi kaGileyadi kaMakiri kaManase wayengelamadodana, kodwa wayelamadodakazi wodwa; nanka amabizo amadodakazi akhe, oMahla loNowa loHogila loMilka loTiriza.

4Wona eza kuEleyazare umpristi lakuJoshuwa indodana kaNuni lakubakhokheli, athi: INkosi yalaya uMose ukusinika ilizwe kanye labafowethu. Njengokulaya kweNkosi asenikwa ilizwe phakathi kwabafowabo bakayise wawo.

5Ngakho abakoManase basebezuza izabelo ezilitshumi ngaphandle kwelizwe leGileyadi leBashani, elingaphetsheya kweJordani,

6ngoba amadodakazi kaManase ayenikwe ilizwe kanye lamadodana akhe. Ilizwe laseGileyadi lanikwa abanye abakoManase.

7Umngcele wabakoManase wasukela eAsheri, waya eMikimethathi ngasempumalanga kweShekema, wasuqonda eningizimu ngaseEni‐Tapuwa.

8Ilizwe laseTapuwa lalingelakoManase, kodwa umuzi waseTapuwa owawusemngceleni wakoManase wawungowabakoEfrayimi.

9Umngcele wasusehlela esifuleni iKana. Imizi yalapho engaseningizimu kwesifula phakathi kwemizi yakoManase ngeyakoEfrayimi. Umngcele wakoManase udlula ngasenyakatho kwesifula, uphelele olwandle.

10Ilizwe laseningizimu ngelakoEfrayimi, elasenyakatho ngelakoManase, ulwandle lungumngcele wawo. Bafinyelela kwelakoAsheri ngasenyakatho, lakwelakoIsakari ngasempumalanga.

11Futhi koIsakari lakoAsheri uManase wabelwa iBeti‐Sheyani lemizana yalo, leIbileyamu lemizana yalo, labaseDori lemizana yalo, labaseEni‐Dori lemizana yalo, labaseTanaki lemizana yalo, labaseMegido lemizana yalo — owesithathu uyisigaba saseDori —

12Kodwa abakoManase bahluleka ukuthatha leyomizi, ngakho amaKanani ahlala njalo kulelolizwe.Hlu 1:27–28

13Kodwa lapho abakoIsrayeli sebelamandla bawasebenzisa nzima amaKanani, kabawaxotshanga aphela nya.

14AbakoJosefa bakhuluma loJoshuwa bathi: Usinikeleni isabelo saba sinye nje ukuba sibe yilifa lethu lokhu siyisizwe esikhulu, leNkosi isibusisile kuze kube lamuhla na?

15UJoshuwa wathi kubo: Uba liyisizwe esikhulu, yanini eguswini, lizicentele khona indawo elizweni lamaPerizi lamaRefa, lokhu izintaba zakoEfrayimi ziminyene.

16AbakoJosefa bathi: Izintaba kazisanelanga, kanti amaKanani ahlala emagcekeni alezinqola zokulwa zensimbi, wonke aseBeti‐Sheyani kanye lemizi yalo lawesigodini seJezereli.

17UJoshuwa wasesithi kwabakoJosefa abangabakoEfrayimi labakoManase: Lina liyisizwe esikhulu, futhi lilamandla amakhulu; kaliyikuphiwa isabelo sibe sinye,

18kodwa lezintaba zizakuba ngezenu; lanxa zingamagusu lizakuzicenta zibe ngezenu kuze kube semikhawulweni yazo, liwaxotshe amaKanani lanxa elenqola zokulwa zensimbi, lanxa elamandla.