Jer 26 - Ndebele Bible (iBhayibhili Elingcwele) 1978

Abantu bathi uJeremiya ufanele ukubulawa

1Ekuqaleni kokubusa kukaJehoyakimi indodana kaJosiya, inkosi yakoJuda, kwafika lelilizwi leNkosi lathi:

7Abapristi labaprofethi labo bonke abantu bamuzwa uJeremiya ekhuluma lamazwi ethempelini;

8lapho eseqedile ukukhuluma konke iNkosi eyayimlayile ukukukhuluma ebantwini, abapristi labaprofethi labo bonke abantu bamdumela bathi: Sizakukubulala!

9Kungani utshumayela ngebizo leNkosi usithi: Lindlu izakuba njengeShilo, lomuzi lo uzakuba yinkangala, kungabi lamuntu na? Bonke abantu bambuthanela uJeremiya ethempelini.

10Kwathi izikhulu zakoJuda sezizwile lezizinto zafika ethempelini, zivela esigodlweni senkosi, zahlala ngaseSangweni elitsha.

11Abapristi labaprofethi basebesithi kuzo izikhulu lakubo bonke abantu: Umuntu lo ufanele ukubulawa, ngoba utshumayele ngalumuzi njengoba lizizwele lani.

12Wasekhuluma uJeremiya kuzo zonke izikhulu lakubo bonke abantu esithi: INkosi yangithuma ukutshumayela ngalindlu langalumuzi wonke amazwi eliwezwileyo.

13Ngakho lungisani indlela zenu lezenzo zenu, lilalele ilizwi leNkosi uNkulunkulu wenu, izayekela ukwenza okubi konke ekukhulume ngani.

14Kodwa mina ngisezandleni zenu. Yenzani kimi njengokuthanda kwenu lanjengokufanele kini.

15Kodwa lazi isibili ukuthi uba lingibulala, lizakwehlisela igazi elingelacala phezu kwenu laphezu kwalumuzi labakhileyo kiwo, ngoba impela iNkosi yangithuma ukukhuluma lamazwi kini.

16Izikhulu labo bonke abantu basebesithi kubapristi labaprofethi: Lumuntu kafanelanga ukubulawa, ngoba ukhulumile kithi ebizweni leNkosi, uNkulunkulu wethu.

17Kwasekusukuma abanye abadala belizwe, bakhuluma kubo bonke abantu ababutheneyo besithi:

18UMika waseMoreshethi watshumayela ensukwini zikaHezekiya, inkosi yakoJuda, wathi kibo bonke abantu bakoJuda: INkosi yamabandla ithi:

IZiyone lizalinywa njengensimu;

iJerusalema libe lunxiwa oludilikileyo,

lentaba okwakhiwe kuyo ithempeli ibe lisandle.

19Kambe inkosi yakoJuda uHezekiya labo bonke abakoJuda bambulala yena yini? Angithi bayesaba iNkosi, bayincenga, kayiyekelanga yini iNkosi ukukwenza okubi eyayikukhulume ngabo na? Sizakwehlisela phezu kwethu ububi obukhulu na?

20Kwakukhona lomunye umuntu owatshumayela ebizweni leNkosi, uUriya indodana kaShemaya owaseKiriyathi‐Jeyarimi. Laye watshumayela ngalumuzi langalelilizwe ngamazwi afanana lamazwi kaJeremiya.

21Kwathi lapho inkosi uJehoyakimi, lawo wonke amaqhawe akhe, lezikhulu zakhe, besizwa amazwi akhe, inkosi yafuna ukumbulala; kodwa kwathi uUriya esekuzwile lokhu, wesaba, wabalekela eGibithe.

22Inkosi uJehoyakimi yasithuma eGibithe amadoda athile, uElinathani indodana kaAkibori, kanye labanye,

23bamthatha uUriya eGibithe, bamletha enkosini uJehoyakimi, owambulalayo, lesidumbu sakhe wasiphosela endaweni yokungcwabela abantukazana.

24Kodwa uAhikamu indodana kaShafani wamvikela uJeremiya ukuba anganikelwa ebantwini ukubulawa.