Jobe 34 - Ndebele Bible (iBhayibhili Elingcwele) 1978

UElihu uvikela ukulunga kukaNkulunkulu

1Wasesithi uElihu:

2Zwanini amazwi ami, lina zihlakaniphi,

lingilalele, lina zazi;

3ngoba indlebe iyawezwa amazwi njengolwanga lusizwa ukudla.

4Asikhetheni okulungileyo,

sazi phakathi kwethu okuhle.

5Ngoba uJobe usethe: Ngilungile,

Kodwa uNkulunkulu ungithathele ilungelo lami;

6lanxa ngiqondile, ngitshaywa olamanga,

inxeba lami kalipholi, loba ngingelasiphambeko.

7Nguwuphi umuntu onjengoJobe,

onatha ukuklolodelwa njengamanzi,

8ohamba labangane abenza okubi,

avakatshe labantu ababi.

9Ngoba uthi: Kakumsizi umuntu ukwazana loNkulunkulu.

10Ngakhoke, ngizwani, lina bantu abaqedisisayo:

kakube khatshana loNkulunkulu ukuba enze okubi,

lakuSomandla ukuba one.

11Ngoba ubuyisela umuntu njengokwenza kwakhe,

amnike okufanele ukuhamba kwakhe.

12Impela uNkulunkulu kenzi okubi,

uSomandla kahlanekeli ukulunga.

13Ngubani owabeka uNkulunkulu ukulondoloza umhlaba na?

Angithi nguye yedwa owamisa umhlaba wonke na?

14Uba ewubuyisa umoya wakhe kuye,

abuyisele lomphefumulo wakhe,

15konke okuphilayo bekuzakufa,

umuntu abuyele othulini.

16Uba lilokuqedisisa, zwanini lokhu,

lilalele engikutshoyo.

17Lembala ozonda ukulunga uzabusa na?

Lizamlahla olungileyo lolamandla,

18othi enkosini: Muntu ongelamsebenzi;

lakuzikhulu: Bantu ababi;

19ongazazisi izikhulu,

engananzi isinothi ukwedlula umyanga,

ngoba bonke bengumsebenzi wezandla zakhe na?

20Bayafa ngesikhatshana;

phakathi kobusuku abantu bayatshaywa, baphele,

labalamandla banyamalala bengathintwanga langesandla.

21Ngoba amehlo akhe akuzo indlela zabantu,

uyazibona zonke izinyathelo zabo.

22Kakulandawo elomnyama omkhulu lapho ababi bangacatsha khona.

23Kakukho insuku ezimiselwe abantu ukuma phambi kukaNkulunkulu, bahlulelwe.

24Uyaphahlaza abalamandla kungahlolwanga,

amise abanye endaweni zabo.

25Ngoba eyazi imisebenzi yabo uyabagenqula ebusuku, bachobozeke.

26Uyabatshaya phambi kwabantu ngenxa yobubi babo,

27ngoba bephambukile ekumlandeleni,

bengananzanga leyodwa yezindlela zakhe,

28baze benza ukukhala komyanga kufinyelele kuye,

wakuzwa ukukhala kwabahluphekayo.

29Lapho yena ethula, ngubani ongamlahla na?

Lalapho efihla ubuso bakhe,

ngubani ongambona na?

30Kuzakuba njani lapho ebeka umuntu ongamesabiyo uNkulunkulu abe yinkosi yesizwe esilukhuni leyabo bonke abantu baso na?

31Uba umuntu esithi kuNkulunkulu:

Ngaduhiswa, kangisayikona futhi;

32uba ngonile, ungitshele ngakho,

uba ngenze okubi kangisayikukwenza futhi.

33Kokunje lithi ufanele ukumtshaya,

lina elala izimiso zakhe na?

Ngoba yini elikhetha lokhu, kungeyisimi;

asihlanganyele sonke ukwazi kwenu.

34Kodwa abantu abalokuqedisisa bazakutsho kimi,

lezihlakaniphi lapho zingizwa zitsho zithi:

35UJobe ukhuluma engelakwazi,

lamazwi akhe kawalakuqonda.

36Kungathi ngabe uJobe uyahlolwa kuze kube sekupheleni!

ngoba ephendula njengabantu ababi.

37Ngoba esonweni sakhe uyengezelela ukuhlamuka,

esola ukwahlulelwa phakathi kwethu,

esandisa ukuthuka kwakhe uNkulunkulu.