Ingoma Yezingoma 6 - Ndebele Bible (iBhayibhili Elingcwele) 1978

Abakhaphi:

1Siye ngaphi isithandwa sakho.

wena omuhle phakathi kwabesifazana na?

Sitshone ngaphi isithandwa sakho ukuba thina sikudingise na?

Umlobokazi:

2Isithandwa sami siye esivandeni saso, endimeni yamakha,

ukwalusa umhlambi waso emasimini, sikhe imiduze.

3Mina ngingowesithandwa sami, lesithandwa sami singesami,

salusela umhlambi waso phakathi kwemiduze.

Umyeni:

4Umuhle njengeTiriza, sithandwa sami,

uyabukeka njengeJerusalema.

Uqhathisa inkevane njengempi ephethe izimpawu.

5Susa amehlo akho kimi ngoba ayangidungula.

Inwele zakho zinjengomhlambi wembuzi

zisehla emawatheni aseGileyadi.

6Amazinyo akho amhlophe anjengomhlambi wezimvukazi

ezisand’ ukugeziswa;

zilamaphahla zonke,

kayikho leyodwa efelweyo.

7Izihlathi zakho phakathi kweveli lakho zinjengepomegranati elidatshuliweyo.

8Kukhona amakhosikazi angamatshumi ayisithupha,

labanye abafazi abangamatshumi aficaminwembili,

lezintombi ezingelakubalwa;

9kodwa ijuba lami, opheleleyo wami munye nje kuphela,

nguye yedwa kunina,

ongokhethiweyo wakhe owamzalayo.

Intombi zambona zathi ubusisiwe,

amakhosikazi labanye abafazi labo bayambabaza.

10Ngubani lo oqhamuka njengokusa

omuhle njengenyanga, okhanya njengelanga,

oqhathisa inkevane njengempi ephethe izimpawu na?

11Ngaya ensimini elemidlawuzo ukubona okuhlumayo esigodini,

lokubona ukuba amavini aseqalile ukuhluma

lokuba amapomegranati asekhahlele yini;

12ngingakazi isifiso sami sangikhweza enqoleni

phansi kwesikhulu sami.

Abakhaphi:

13Buya, buya, wena ntombi yaseShulami,

buya, buya, ukuba sikubuke.

Umyeni:

Lithandelani ukubukela intombi yaseShulami

isina phakathi kwezinhla ezimbili zabasinayo na?