Hubo 118 - Ndebele Bible (iBhayibhili Elingcwele) 1978

Ukubonga iNkosi ngokukhulula kwayo

1Bongani iNkosi, ngoba ilungile;

uthando lwayo olungapheliyo lumi kuze kube nininini.

2Katsho uIsrayeli athi:

Uthando lwayo olungapheliyo lumi kuze kube nininini.

3Kayitsho indlu kaAroni ithi:

Uthando lwayo olungapheliyo lumi kuze kube nininini.

4Kabatsho abayesabayo iNkosi bathi:

Uthando lwayo olungapheliyo lumi kuze kube nininini.

5Osizini lwami ngakhuleka eNkosini;

iNkosi yangiphendula yangikhulula.

6INkosi ingakimi, kangiyikwesaba;

umuntu angenzani kimi na?

7INkosi ingakimi ukungisiza;

ngizakubona engikufisayo ngalabo abangizondayo.

8Kuhle ukuphephela eNkosini

kulokuthemba umuntu.

9Kuhle ukuphephela eNkosini

kulokuthemba izikhulu.

10Zonke izizwe zangihanqa;

ebizweni leNkosi ngazichitha.

11Zangihanqa inxa zonke;

ebizweni leNkosi ngazichitha.

12Zangihanqa njengenyosi,

zavutha njengomlilo wameva;

ebizweni leNkosi ngazichitha.

13Zangihlasela ngamandla, ngaze ngaphos’ ukuwa;

kodwa iNkosi yangisiza.

14INkosi ingamandla ami lengoma yami,

ingumkhululi wami.

15Lalelani ingoma zokuthokoza lezokunqoba

emathenteni abalungileyo besithi:

Esokunene seNkosi siyanqoba,

16esokunene seNkosi siphakanyisiwe,

esokunene seNkosi siyanqoba.

17Kangiyikufa, kodwa ngizakuphila,

ngilandise izenzo zeNkosi.

18INkosi ingitshayile kakhulu,

kodwa kayinginikelanga ekufeni.

19Ngivulelani amasango okulunga

ukuba ngingene kuwo, ngibonge iNkosi.

20Yileli isango leNkosi;

abalungileyo bazakungena ngalo.

21Ngiyakubonga ngoba ungiphendule,

waba ngumkhululi wami.

22Ilitshe elaliwa ngabakhi seliyinhloko yengonsi.

23Lokhu kwenziwa yiNkosi,

kuyamangalisa emehlweni ethu.

24Lolu lusuku olumiswe yiNkosi,

asithabe sithokoze kulo.

25Sikhulule, siyakuncenga, Nkosi;

Nkosi, siyakuncenga sinike impumelelo.

26Ubusisiwe yena ongena ngebizo leNkosi.

Siyalibusisa sisendlini yeNkosi.

27INkosi inguNkulunkulu, yona isinikile ukukhanya.

Qalisani ukugida, lizunguze ingatsha,

libhode ialtare.

28Wena unguNkulunkulu wami, ngizakukubonga;

wena unguNkulunkulu wami, ngizakukudumisa.

29Bongani iNkosi, ngoba ilungile;

ngoba uthando lwayo olungapheliyo lumi kuze kube nininini.