Isa 9 - Ndebele Bible (iBhayibhili Elingcwele) 1978

Inkosi yokuthula

1Esikhathini esidlulileyo waliyangisa ilizwe lakoZebuluni lelizwe lakoNafitali; kodwa esikhathini esizayo uzakuyenza ibe lodumo indlela ehamba ngasolwandle, eyilizwe elingaphetsheya kweJordani, iGalili lezizwe.

2Abantu ababehamba emnyameni bakubonile ukukhanya okukhulu;

ababehlala elizweni elilomnyama omkhulu ukukhanya kubakhanyisele.

3Nkosi, ubanikile ukujabula, wakhulisa ukuthokoza kwabo;

bayathokoza phambi kwakho njengokuthokoza kwasesikhathini sokuvuna,

bathokoza njengabantu lapho besahlukaniselana impango.

4Ngoba ijogwe labo elinzima abaletshata emahlombe,

lentonga yomhluphi wabo,

ukuqedile njengasosukwini lokuchitheka kukaMidiyani.

5Ngoba wonke amanyathelo afakwa ngesikhathi sokulwa,

lezigqoko ezigcwele igazi, kuzakuba ngokokutshiswa.

6Ngoba sizalelwe umntwana, sinikiwe indodana:

izanikwa amandla obukhosi,

ibizwe ngokuthi: UMluleki omangalisayo,

uNkulunkulu olamandla, uBaba ongelakuphela,

iNkosi yokuthula.

7Umbuso wayo uzakuba mkhulu, lokuthula kakuyikuphela kuwo,

lapho isihlezi esihlalweni sobukhosi sikaDavida.

Izakuwumisa, iwuqinise ngokufaneleyo langokulunga,

kusukela kulesisikhathi kuze kube nininini.

Ukutshisekela kweNkosi yamabandla kuzakukwenza lokhu.INkosi ithukuthelela uIsrayeli

8INkosi ithume ilizwi lokwahlulela ngoJakobe,

lizakwehlela koIsrayeli;

9abantu bonke bazakwazi,

uEfrayimi labaseSamariya abathi ngokuzigqaja langokuzikhukhumeza:

10Izitina zidilikile, kodwa sizakwakha ngamatshe abaziweyo;

amaphane aganyuliwe, sesizakwakha ngomkusu.

11Ngenxa yalokhu iNkosi ibavusela izitha,

ibathumele abafo;

12amaSiriya ngasempumalanga lamaFilistiya ngasentshonalanga ayadla uIsrayeli ngomlomo wawo.

Kukho konke lokhu ukuthukuthela kwayo kakupheli,

isiphakamisile isandla sayo ukutshaya futhi.

13Abantu kababuyelanga kulowo owabatshayayo,

futhi kabayidinganga iNkosi yamabandla.

14Ngakho iNkosi yaquma koIsrayeli ikhanda lomsila,

ugatsha lomhlanga ngasuku lunye.

15Ikhanda lingohloniphekayo lesikhulu,

lomsila ungumprofethi otshumayela amanga.

16Ngoba labo abakhokhela lababantu bayabaduhisa,

lalabo abakhokhelwa yibo bayachitheka.

17Ngakhoke iNkosi kayiyekeli izinsizwa zabo,

kayilasihawu ngezintandane labafelwakazi babo;

ngoba bonke kabesabi uNkulunkulu, benza okubi,

bonke baqamba amanga.

Kukho konke lokhu ukuthukuthela kwayo kakupheli,

isiphakamisile isandla sayo ukutshaya futhi.

18Ngoba ububi butshisa njengomlilo, buqeda ukhula lameva;

buthungela izihlahla zehlathi, zize zithunqe intuthu.

19Ngolaka lweNkosi yamabandla ilizwe litshisiwe,

abantu banjengezinkuni zomlilo;

kakho oyekela umfowabo.

20Bayahluthuna ngakwesokunene, kodwa babe belokhu belambile,

badle ngakwesokhohlo, kodwa kabasuthi;

lowo lalowo udla abantwana bakhe,

21uManase udla uEfrayimi, loEfrayimi udla uManase,

bobabili basukela uJuda kanyekanye.

Kukho konke lokhu ukuthukuthela kwayo kakupheli,

isiphakamisile isandla sayo ukutshaya futhi.