Isa 17 - Ndebele Bible (iBhayibhili Elingcwele) 1978

Ilizwi ngeDamaseko

1Leli yilizwi ngeDamaseko.

Khangela, iDamaseko lizakuphela, lingabe lisaba ngumuzi,

libe lunxiwa oludilikileyo.

2Imizi yaseSiriya izatshiywa kokuphela,

ibe yindawo yokulala imihlambi, ingethuswa lutho.

3Inqaba izaphela koEfrayimi, lombuso eDamaseko;

labaseleyo eSiriya bazakudelelwa njengabakoIsrayeli,

kutsho iNkosi yamabandla.

Ukwahlulelwa kukaIsrayeli

4Kuzakuthi ngalolosuku udumo lukaJakobe lwehliselwe phansi,

kunciphe lokuzimuka kwakhe,

5kube njengalapho umvuni ebamba ngengalo yakhe amabele emiyo,

aqume izikhwebu zawo;

loba njengalapho umuntu edobha izikhwebu esigodini saseRefayimi,

6kungasali lutho khona, kuphela izikhwebu ezidojiweyo;

loba njengesihlahla seoliva esijikijelwayo esilezithelo ezimbili

loba ezintathu ezisegqongeni yaso,

ezine loba ezinhlanu engatsheni zesihlahla sezithelo,

kutsho iNkosi uNkulunkulu kaIsrayeli.

7Ngalolosuku abantu bazamkhumbula uMenzi wabo, amehlo abo akhangele koNgcwele kaIsrayeli;

8kabayikukhathalela ama‐altare, umsebenzi wezandla zabo; kabayikuthemba kokwenziweyo ngezandla zabo, insika ezimiselwe unkulunkulukazi uAshera loba ama‐altare empepha.

9Ngalolosuku imizi yabo eqinileyo izakuba njengezindawo ezideliweyo zamaHivi lamaAmori, azidela ekungeneni kwabakoIsrayeli; izakuba yinkangala.

10Ngoba wena Israyeli umkhohliwe uNkulunkulu wokukhululwa kwakho,

kawulikhumbulanga leDwala, isiphephelo sakho.

Ngoba uyahlanyela izithombo ezinhle,

ugxumeke amahlumela abonkulunkulu bezizwe,

11uwenze ukuba ahlume mhlalokho,

kuthi lapho sekusile usaba lukhuphe impoko;

kodwa konke okuzuzayo kuzanyamalala mhla wosuku lokuhlupheka lobuhlungu obungelakuphela.

12Yeka ukuhlokoma kwabantu abanengi abahlokoma njengolwandle!

Yeka ukuduma kwezizwe eziduma njengamanzi amanengi!

13Izizwe ziduma njengamanzi amanengi,

kodwa uNkulunkulu uzakuzikhuza zibaleke,

zizaphephuka njengamakhoba aphetshulwa ngumoya ezintabeni,

lanjengothuli olubangwa yisiphepha.

14Ngezikhathi zokuhlwa zibanga ukwesaba,

kungakasi kazisekho.

Yiso isabelo salabo abasiphangayo lalabo abasihlaselayo.