Jobe 8 - Ndebele Bible (iBhayibhili Elingcwele) 1978

Inkulumo yokuqala kaBilidadi: uthi uNkulunkulu uphatha abantu ngokufaneleyo

1Wasephendula uBilidadi waseShuhi esithi:

2Koze kube nini ukhuluma lezizinto,

lamazwi akho abe njengomoya omkhulu na?

3Kambe uNkulunkulu uyakuhlanekela okufaneleyo na?

USomandla uyahlanekela ukulunga na?

4Uba abantwana bakho bonile kuye,

yena ubanikela emandleni eziphambeko zabo.

5Uba umdinga uNkulunkulu, ucele kuSomandla,

6uhlambulukile, uqotho,

impela yena uzakuvuka ngenxa yakho,

akubuyisele umuzi wakho ube ngumvuzo wakho.

7Lanxa ukuqala kwakho bekukuncinyane,

insuku zakho zokucina zizakuba zinkulu kakhulu.

8Ake ubuze ezizukulwaneni zakuqala,

ubone lokho okwafunyaniswa ngobaba;

9ngoba thina singabezolo nje,

kasazi lutho,

lensuku zethu emhlabeni ziyisithunzi.

10Bona kabayikukufundisa, bakutshele,

bakhulume amazwi okwazi kwabo na?

11Kambe imihlanga ingahluma lapho kungelaxhaphozi khona na?

Lebhuma likhule lapho kungelamanzi khona na?

12Nxa liseluhlaza lingakakhiwa,

liyabuna kuqala kwazo zonke izihlahlana.

13Injaloke indlela yabo bonke abamkhohlwayo uNkulunkulu,

ithemba longamesabiyo uNkulunkulu lizaphela.

14Ithemba lakhe kaliqinanga,

lesisekelo sakhe sinjengendlu yobulembu.

15Uyeyama endlini yakhe, kodwa kayimi,

abambelele kiyo, kodwa kayiqini.

16Njengesihlahlana esiluhlaza ekukhanyeni kwelanga

wamilisela amahlumela akhe okuqala ensimini,

17kodwa impande zakhe zazithandele ematsheni,

waphila phakathi kwamadwala.

18Uba echithwa endaweni yakhe,

leyondawo izakumphika ithi: Kangizange ngikubone.

19Injaloke indlela yokuthokoza kwakhe;

kuzavela abanye emhlabathini.

20Khangela, uNkulunkulu kayikumlahla umuntu ongelasici,

kazelekeleli izandla zabenza okubi.

21Impela uzagcwalisa umlomo wakho ngohleko,

lezindebe zakho ngokumemeza kokuthokoza;

22kuthi labo abakuzondayo babanjwe zinhloni,

lethente lababi lingabe lisaba khona.