Hubo 74 - Ndebele Bible (iBhayibhili Elingcwele) 1978

Ukucela kuNkulunkulu ukuba asize abantu bakhe

1Nkulunkulu, usilahleleni kokuphela na?

Ulaka lwakho luvuthelani ngakuzo izimvu zedlelo lakho na?

2Khumbula ibandla lakho owalikhetha endulo,

abantu owabahlenga baba ngabakho,

lentaba yaseZiyone ohlala kuyo.

3Ngena ezindongeni ezingalungisekiyo;

izitha zibhidlize konke endaweni engcwele.

4Izitha zakho zibhongile phakathi kwendawo engcwele,

zamisa ezazo impawu ukuba zibe yizimpawu zokunqoba.

5Izitha zazinjengabantu abagamula izihlahla zesandle ngamahloka.

6Konke okubaziweyo kwayo zakuphohloza ngamahloka langezando.

7Zayitshisa indlu yakho engcwele,

zayidilizela phansi indlu yebizo lakho, zayidumaza.

8Zakhulumisana zisithi: Sizakubachitha impela.

Zatshisa zonke indawo zokubuthanela zikaNkulunkulu elizweni.

9Izimpawu zethu kazisekho; kakusekho mprofethi;

kakho kithi owaziyo ukuthi koze kube nini.

10Koze kube nini, Nkulunkulu, izitha zikloloda na?

Izitha zizahlambaza ibizo lakho kokuphela na?

11Usifinyezeleni isandla sakho na?

Ugodleleni isandla sakho sokunene ohlangothini lwakho na?

12Kanti uNkulunkulu uyiNkosi yami kusukela endulo,

eyenza inkululeko emhlabeni.

13Nguwe owahlukanisa ulwandle ngamandla akho;

wafohloza amakhanda ezilo ezesabekayo zasemanzini.

14Nguwe owafohloza amakhanda kaLeviyathani,

wamenza waba yikudla kwezidalwa zasenkangala.

15Nguwe owavulela amanzi emithombo lezifudlana,

womisa imifula egobhozayo.

16Usuku ngolwakho, lobusuku ngobakho;

nguwe owamisa inyanga lelanga.

17Wamisa yonke imikhawulo yomhlaba;

wenza ihlobo lobusika.

18Khumbula lokhu, Nkosi, ukuthi izitha ziyakloloda,

labantu ababi bayalithuka ibizo lakho.

19Ungawunikeli umphefumulo wejuba lakho ezinyamazaneni;

ungakukhohlwa ukuphila kwezihlupheki zakho kokuphela.

20Khumbula isivumelwano sakho;

ngoba zonke indawo ezimnyama zomhlaba zigcwele ububi.

21Ungavumi bayangeke abacindezelweyo;

abahluphekayo labaswelayo kabalidumise ibizo lakho.

22Vuka, Nkulunkulu! uyimele indaba yakho,

ukhumbule ukuthi ababi bayakuklolodela insuku zonke.

23Ungakhohlwa ukuvungama kwezitha zakho,

ukuxokozela kwabakuvukelayo okwenyukela kuwe kokuphela.