Seb 10 - Ndebele Bible (iBhayibhili Elingcwele) 1978

Umbono kaKorneliya

1Kwakukhona eKesariya indoda ethiwa nguKorneliya, eyinduna yekhulu yebutho elithiwa elaseItaliya;

2wayeyindoda ekholwayo lemesabayo uNkulunkulu kanye lendlu yayo yonke, inika abaJuda abangabayanga iziphiwo ezinengi, ikhuleka futhifuthi kuNkulunkulu.

3Kwathi ngesikhathi semini yantambama, yabona embonweni isithunywa sikaNkulunkulu singena kuyo sisithi: Korneliya!

4Wasijolozela esesaba, wathi: Kuyini, Nkosi? Sathi kuye: Imikhuleko yakho leziphiwo zakho kufinyelele kuNkulunkulu kwaba yisikhumbuzo phambi kwakhe.

5Ngakhoke thuma amadoda eJopha alande uSimoni othiwa nguPetro;

6yena ungenisile kuSimoni, umkhuhli, ondlu yakhe ingasolwandle.

7Sesihambile isithunywa ebesikhuluma laye, wabiza ababili kwabendlu yakhe lowebutho okholwayo kulabo ababehlala laye,

8walandisa konke, wabathuma eJopha.

UPetro wehlelwa yisiyezi

9Kusasa besahamba sebesondela emzini, uPetro wenyukela phezu kwendlu ukuyakhuleka; kwakusemini.

10Walamba, wafuna ukudla; kwathi besamlungisela wehlelwa yisiyezi,

11wabona izulu livulekile lolutho olunjengengubo enkulu, lusehliselwa ngamasondo amane emhlabeni.

12Kwakukhona kulo zonke inhlobo zezidalwa, ezihambayo lezihuquzelayo leziphaphayo.

13Kwezwakala ilizwi, lisithi kuye: Petro, vuka, uhlabe, udle.

14Kodwa uPetro wathi: Atshi, Nkosi, ngoba kangizake ngidle into embi lengcolileyo.

15Ilizwi laphinda ngokwesibili lathi kuye: Lokho uNkulunkulu akuhlambululeyo, ungatsho wena ukuthi kubi.

16Lokhu kwaphindwa kathathu; ulutho lolo lwabuyiselwa ezulwini.

17UPetro esadidekile engqondweni yakhe ngokuthi ngabe uyini lowombono awubonileyo, kwafika amadoda ayethunywe nguKorneliya, esebuzile indlu kaSimoni, ema ngasesangweni,

18amemeza ebuza ukuthi uSimoni othiwa nguPetro ungenisile lapho yini.

19Kwathi uPetro esanakana ngombono, uMoya wathi kuye: Khangela, amadoda amabili ayakufuna;

20sukuma, wehle, uhambe lawo, ungathandabuzi, ngoba yimi engiwathumileyo.

21UPetro wasesehlela kuwo, wathi: Yimi elimfunayo; yindaba bani eliza ngayo na?

22Bathi: UKorneliya induna yekhulu, indoda elungileyo lemesabayo uNkulunkulu, ehlonitshwa yiso sonke isizwe sabaJuda, walayelwa yisithunywa esingcwele ukuba akubizele endlini yakhe, ezwe amazwi kuwe.

23Wasebangenisa endlini, bahlala laye. Kusasa wasuka wahamba labo, labazalwane abathile baseJopha bamphelekezela.

Ukufika kukaPetro endlini kaKorneliya

24Ngosuku olulandelayo bangena eKesariya. UKorneliya wayebalindele esebizile izihlobo zakhe labangane bakhe.

25Kwathi ukuba uPetro angene, uKorneliya wamhlangabeza, wawela phansi ngasenyaweni zakhe, wamkhonza.

26Kodwa uPetro emphakamisa wathi: Sukuma, lami ngingumuntu nje.

27Esakhuluma layo wangena, wafumana abantu abanengi bebuthene.

28Wathi kubo: Liyazi ukuba kakuvunyelwa ukuba umuntu ongumJuda ahlangane, ahambelane lomuntu wesinye isizwe; kodwa uNkulunkulu ungitshengisile ukuthi ngingatsho ukuba omunye umuntu mubi ingabe ungcolile.

29Yikho lokhu ngizile nxa ngibizwa, kangalanga. Ngakho sengibuza ukuba ungibizeleni na?

30UKorneliya wathi: Ngensuku ezine ezidlulileyo ngalesisikhathi ngangikhuleka endlini yami ngesikhathi semini yantambama; ngasengibona indoda imi phambi kwami yambethe ingubo ezikhazimulayo,

31yathi kimi: Korneliya, ukukhuleka kwakho kuzwakele, lokupha kwakho iziphiwo kukhunjulwe phambi kukaNkulunkulu.

32Ngakho thumela eJopha, ubize uSimoni othiwa nguPetro; yena ungenisile endlini kaSimoni umkhuhli, ngasolwandle.

33Ngasengithumela kuwe ngalesosikhathi; wenze kuhle ufike. Ngakho sesikhona lapha sonke phambi kukaNkulunkulu ukuba sizwe konke okulayelwe yiNkosi.

Intshumayelo kaPetro

34Kwang’khona uPetro wavula umlomo wakhe, wathi: Impela ngiyabona ukuthi uNkulunkulu kakhangeli ubuso bomuntu,Dute 10:17

35kodwa ezizweni zonke omesabayo lowenza ukulunga uyamukeleka kuye.

36Yilo ilizwi alithumela kuIsrayeli, etshumayela ivangeli lokuthula ngoJesu Kristu; yena uyiNkosi yabo bonke.

37Liyalazi ilizwi elamenyezelwa eJudiya lonke, kusukela eGalili emva kobhaphathizo olwatshunyayelwa nguJohane

38lokuthi: UNkulunkulu wammisa uJesu waseNazaretha ngoMoya oNgcwele langamandla, lokuthi wahamba esenza okulungileyo, esilisa bonke labo ababesemandleni kaSathane, ngoba uNkulunkulu wayelaye.

39Lathi singofakazi bezinto zonke azenzayo elizweni labaJuda laseJerusalema, bambulala ngokumphanyeka esiphambanweni.

40Kodwa uNkulunkulu wamvusa ngosuku lwesithathu, wambonakalisa,

41kungesikho kubo bonke abantu kodwa kithi esasikhethwe ngaphambili nguNkulunkulu ukuba ngofakazi, thina esadla sanatha kanye laye emva kokuvuka kwakhe kwabafileyo.

42Wasilayela ukuba sitshumayele ebantwini, sifakaze ukuthi nguye omiswe nguNkulunkulu ukuba nguMthonisisi wabasilayo labafileyo.

43Ngaye bonke abaprofethi bafakaza ukuthi ngebizo lakhe bonke abakholwa kuye bazakwamukela ukuthethelelwa kwezono.

Ukubhaphathizwa kukaKorneliya labendlu yakhe

44Kwathi uPetro esakhuluma lawomazwi, uMoya oNgcwele wehlela phezu kwabo bonke abalizwayo ilizwi.

45AbaJuda abakholwayo ababefike loPetro bamangala, ngoba isiphiwo sikaMoya oNgcwele sathelwa laphezu kwabezizwe.

46Ngoba babezwa bekhuluma ngendimi, bedumisa uNkulunkulu. Kwang’khona uPetro wathi:

47Ukhona yini ongala lamanzi ukuba lababantu bangabhaphathizwa abamukele uMoya oNgcwele njengathi na?

48Waselayela ukuba babhaphathizwe ebizweni likaJesu Kristu. Bamcela ukuba ahlale labo insukwana.