1 Kho 3 - Ndebele Bible (iBhayibhili Elingcwele) 1978

USolomoni uthatha indodakazi kaFaro

1USolomoni wenza isivumelwano loFaro inkosi yaseGibithe ngokuthatha indodakazi kaFaro, wayiletha emzini kaDavida engakaqedi ukwakha eyakhe indlu lethempeli lomduli ozingelezele iJerusalema.2 Lan 1:3–12

2Abantu babelokhu benikela imihlatshelo endaweni eziphakemeyo zokukhonzela, ngoba yayingakakhiwa indlu lapho iNkosi ingadunyiselwa khona.

USolomoni ucela ukuba anikwe ingqondo yokuqedisisa

3USolomoni wayithanda iNkosi, wahamba ngezimiso zikayise uDavida, kodwa laye wanikela imihlatshelo watshisa impepha endaweni eziphakemeyo zokukhonzela.

4Waya eGibeyoni ukunikela umhlatshelo khona, ngoba leyo yayiyindawo yokukhonzela enkulu. Wayenikela iminikelo yokutshiswa eyinkulungwane phezu kwealtare lakhona.

5EGibeyoni iNkosi uNkulunkulu yabonakala kuSolomoni ephupheni ebusuku. Yathi: Cela lokho ofisa ukuba ngikunike khona.

6USolomoni wathi: Wenzele ubaba uDavida inceku yakho umusa omkhulu, ngoba wahamba phambi kwakho ngobuqotho langokulunga langokuthembeka; waqhubeka ngokumenzela umusa lo omkhulu, wamnika indodana yokubusa esikhundleni sakhe lamuhla.

7Ngakhoke, Nkosi Nkulunkulu wami, uyenzile inceku yakho yaba yinkosi esikhundleni sikababa uDavida, lanxa mina ngingumntwana nje ongakwaziyo ukuziphatha.

8Inceku yakho iphakathi kwabantu bakho owabakhethayo, abantu abanengi abangelakubalwa ngobunengi babo.

9Akunike inceku yakho ingqondo yokuqedisisa ukubusa abantu bakho, ukuze ngazi umahluko phakathi kokuhle lokubi; ngoba ngubani olamandla okubusa lababantu bakho abakhulu kangaka na?

10Kwayithokozisa iNkosi uNkulunkulu ukuthi uSolomoni ucele lokhu.

11Yathi kuye: Ngoba ucele lokhu ungazicelelanga ukuphila isikhathi eside lenotho lokubhubha kwezitha zakho, kodwa uzicelele ukuqedisisa ukuba wazi okulungileyo,

12khangela, ngiyenza njengokucela kwakho. Ngiyakunika ingqondo ehlakaniphileyo leqedisisayo, ukuze kungabi khona onjengawe ngaphambi kwakho, kungaveli lonjengawe ngemva kwakho.

13Ngizakukunika futhi longakucelanga, inotho lodumo, ukuba kungabi khona enye inkosi engalinganiswa lawe kuzo zonke insuku zakho.

14Uba uhamba ngendlela zami, ugcina izimiso zami lemilayo yami njengoyihlo uDavida, ngizakuzandisa insuku zakho.

15USolomoni wasephaphamake; kanti kwakuliphupho nje. Wasebuyela eJerusalema, wema phambi komtshokotsho wesivumelwano seNkosi, wanikela iminikelo yokutshiswa leminikelo yokuthula, wenzela inceku zakhe zonke idili.

Ukuhlakanipha kukaSolomoni ekwahluleleni

16Kwasekufika amawule amabili enkosini, ema phambi kwayo.

17Omunye owesifazana wathi: E nkosi yami, mina lalumfazi sihlala ndlunye; ngabeletha umntwana, laye ekhona endlini.

18Kwathi ngemva kwensuku ezintathu ngibelethe, umfazi lo wabeletha; kwakuyithi sodwa, kungekho muntu kanye lathi endlini.

19Umntwana walumfazi wafa ebusuku, ngoba walala phezu kwakhe.

20Wasevuka phakathi kobusuku, wathatha umntanami eceleni kwami, incekukazi yakho ilele, wamlalisa kuye, wasemlalisa umntanakhe ofileyo kimi.

21Lapho ngivuka ekuseni ukuba ngimmunyise umntanami, ngamfumanisa esefile; kodwa kwathi ngimkhangelisisa sekusile, kwakungesuye umntwana engamzalayo.

22Kodwa lowo omunye owesifazana wathi: Atshi bo, umntwana ophilayo ngowami, ofileyo nguye owakho. Owesifazana wokuqala wathi: Atshi, ofileyo ngowakho, ophilayo ngowami. Batsho njalo phambi kwenkosi.

23Inkosi yasisithi: Omunye uthi: Lumntwana ophilayo ungowami, ofileyo ngowakho; lomunye athi: Atshi bo, ngowakho ofileyo, owami ngophilayo.

24Inkosi yasisithi: Ngilethelani umhedla. Wasulethwa umhedla enkosini.

25Yasisithi: Dabulani umntwana ophilayo phakathi, linike omunye ingxenye, lomunye limnike ingxenye.

26Owesifazana okwakungowakhe umntwana ophilayo ngoba elesihelo ngomntanakhe wathi enkosini: E nkosi yami, kabamnike umntwana ophilayo, bangambulali loba sekunjani. Kodwa lowo omunye wathi: Kayikuba ngowami kumbe abe ngowakho, kadatshulwe phakathi.

27Inkosi yasisithi: Nikani owesifazana wokuqala lumntwana ophilayo, lingambulali, ngoba nguye ongunina.

28Bonke abakoIsrayeli bezwa ngokwahlulela kwenkosi, bayesaba inkosi, ngoba babona ukuthi yayilokuhlakanipha kukaNkulunkulu kokuba yahlulele.