Eks 8 - Ndebele Bible (iBhayibhili Elingcwele) 1978

Inhlupheko yesibili: Amaxoxo

1INkosi yasisithi kuMose: Yana kuFaro uthi kuye: INkosi ithi: Vumela abantu bami ukuba bayengikhonza.

2Uba ungabavumeli bahambe, ngizakuhlupha ilizwe lakho lonke ngamaxoxo;

3umfula uzakugcwala amaxoxo, aphume, angene endlini yakho, lasendaweni yakho yokulala, lasembhedeni wakho, lezindlini zenceku zakho, laphezu kwabantu bakho, lasemaziko akho, lasemiganwini yakho yokuxovela izinkwa;

4azakuba phezu kwakho, laphezu kwabantu bakho lezinceku zakho zonke.

5INkosi yathi kuMose: Tshono kuAroni uthi: Yelula isandla sakho lentonga yakho phezu kwemifula lezifula leziziba, ukhuphele amaxoxo elizweni laseGibithe.

6UAroni waselula isandla sakhe phezu kwamanzi aseGibithe; amaxoxo aphuma, agcwala ilizwe laseGibithe.

7Lezangoma zenza njalo ngamalumbo azo, zakhuphela amaxoxo elizweni laseGibithe.

8UFaro wasebabiza oMose loAroni wathi: Ncengani iNkosi ukuba isuse amaxoxo kimi lasebantwini bami; ngizabavumela abantu ukuba bayehlabela iNkosi.

9UMose wathi kuFaro: Ngitshela ukuba ngizakukukhulekela ngasiphi isikhathi wena lenceku zakho, labantu bakho, ukuba amaxoxo asuswe kuwe lasezindlini zakho, asale emfuleni kuphela.

10Wathi: Kusasa. UMose wathi: Kakube njengelizwi lakho ukuze wazi ukuthi kakho onjengeNkosi uNkulunkulu wethu.

11Amaxoxo azakusuka kuwe, ezindlini zakho lasencekwini zakho lasebantwini bakho, asale emfuleni kuphela.

12UMose loAroni baphuma kuFaro. UMose wakhala eNkosini ngamaxoxo eyayiwalethe kuFaro.

13INkosi yenza njengelizwi likaMose; amaxoxo afa ezindlini lasemagumeni lasemasimini.

14Bawabuthelela izinqwaba; ilizwe lanuka.

15Kodwa uFaro esebonile ukuthi kukhona ukuthula, wayenza yaba lukhuni inhliziyo yakhe, kazabalalela, njengokutsho kweNkosi.

Inhlupheko yesithathu: Imiyane

16INkosi yasisithi kuMose: Tshono kuAroni uthi: Yelula intonga yakho, utshaye phansi ubange uthuli ukuba luphenduke lube yimiyane kulo lonke ilizwe laseGibithe.

17Benza njalo; uAroni welula isandla sakhe lentonga yakhe, watshaya phansi wabanga uthuli; imiyane yaba khona ebantwini lasezifuyweni; lonke uthuli lwaphenduka lwaba yimiyane kulo lonke ilizwe laseGibithe.

18Lezangoma zazama ukuveza imiyane ngamalumbo azo, kodwa zahluleka. Kwaba khona imiyane ebantwini lasezifuyweni.

19Izangoma zasezisithi kuFaro: Lokhu kungumunwe kaNkulunkulu. Kodwa inhliziyo kaFaro yajinga iba lukhuni, kazabalalela, njengokutsho kweNkosi.Inhlupheko yesine: Izibawu

20INkosi yathi kuMose: Vuka ekuseni, umlindele uFaro; lapho ephuma esiya emanzini, uthi kuye: INkosi ithi: Vumela abantu bami ukuba bahambe ukuyangikhonza.

21Uba ungabavumeli ukuba bahambe, ngizathumela kuwe izibawu lasencekwini zakho lasebantwini bakho lasezindlini zakho; izindlu zamaGibithe zizagcwala izibawu kanye lomhlabathi ezikuwo.

22Kodwa ngalesosikhathi ngizakwahlukanisa ilizwe laseGosheni abahlala kulo abantu bami, ukuba kungabi khona lapho izibawu, ukuze wazi ukuthi ngiyiNkosi emhlabeni.

23Ngalokhu ngizakwahlukanisa abantu bami labantu bakho; kusasa kuzakubonakala isibonakaliso lesi.

24INkosi yenza njalo; kwangena endlini kaFaro izibawu ezinengi lasezindlini zenceku zakhe; lonke ilizwe laseGibithe lachitheka ngenxa yezibawu.

25UFaro wasebabiza oMose loAroni, wathi: Hambani, liyehlabela uNkulunkulu wenu kulelilizwe.

26Kodwa uMose wathi: Kakulunganga ukwenza njalo, ngoba sizakuyihlabela iNkosi uNkulunkulu wethu lokho okunengekayo kuwo amaGibithe; uba sihlaba lokho okunengekayo emehlweni awo, kawayikusikhanda ngamatshe na?

27Sizahamba ummango wensuku ezintathu siye enkangala, siyihlabele iNkosi uNkulunkulu wethu njengokusilaya kwayo.

28UFaro wathi: Ngizalivumela ukuba liye enkangala ukuyihlabela iNkosi uNkulunkulu wenu; kodwa lingayi khatshana; futhi kalibongikhulekela.

29UMose wathi: Ngiyasuka kuwe, ngizakuyincenga iNkosi ukuba izibawu zisuke kusasa kuFaro lasencekwini zakhe lasebantwini bakhe; kodwa uFaro angaphindi akhohlise ngokungavumeli abantu bahambe, bayihlabele iNkosi.

30UMose wasephuma kuFaro, wayayincenga iNkosi.

31INkosi yenza njengelizwi likaMose; yazisusa izibawu kuFaro lasencekwini zakhe lasebantwini bakhe; kakusalanga lesisodwa.

32Kodwa uFaro wabuya wayenza yaba lukhuni inhliziyo yakhe, kabavumelanga abantu ukuba bahambe.