Hubo 56 - Ndebele Bible (iBhayibhili Elingcwele) 1978

Ukuthemba kuNkulunkulu

1Nkulunkulu, woba lomusa kimi,

ngoba abantu bafuna ukungifihliza;

usuku lonke izitha ziyangicindezela;

2usuku lonke izitha zami zifuna ukungifihliza,

ngoba zinengi ezilwa lami ngokuzikhukhumeza.

3Lapho ngisesaba,

ngiyathemba wena.

4KuNkulunkulu olizwi lakhe engilidumisayo,

kuNkulunkulu ngiyathemba ngingesabi.

Umuntu angenzani kimi na?

5Usuku lonke bazama ukona indaba yami;

imicabango yabo yonke imelana lami ngokubi.

6Bayabuthana, bagugube,

baqaphelise izinyathelo zami,

bezingela ukuphila kwami.

7Baphindisele ngokubi kwabo;

ekuthukutheleni badilizele phansi abantu, Nkulunkulu.

8Ukuhlupheka kwami ukubalile;

thana izinyembezi zami embizeni yakho;

kazikho encwadini yakho na?

9Ng’khona izitha zami zizakuxotshwa

mhla ngikhulekayo.

Ngiyakwazi lokhu ukuthi uNkulunkulu ulami.

10KuNkulunkulu olizwi lakhe engilidumisayo,

eNkosini elizwi layo engilidumisayo,

11KuNkulunkulu ngiyathemba ngingesabi.

Umuntu angenzani kimi na?

12Nkulunkulu, izithembiso zami kuwe ngizakuzigcwalisa;

ngizakunikela kuwe iminikelo yokubonga.

13Ngoba uwukhulule umphefumulo wami ekufeni,

lenyawo zami ekuweni,

ukuze ngihambe phambi kukaNkulunkulu

ekukhanyeni kwabaphilayo.