1 Lan 22 - Ndebele Bible (iBhayibhili Elingcwele) 1978

1UDavida wasesithi: Le izakuba yindlu yeNkosi uNkulunkulu, laleli libe lialtare lomnikelo wokutshiswa kaIsrayeli.

UDavida ulungiselela ukwakhiwa kwethempeli

2UDavida waselaya ukuba kubuthaniswe abezizweni ababekhona koIsrayeli; wakhetha abanye babo ukuba babaze amatshe okwakha indlu kaNkulunkulu.

3UDavida wadinga insimbi enengi kakhulu yokwenza izipikili zezivalo lensimbi zokuhlanganisa, wadinga lethusi elinengi elingelakulinganiswa,

4lezigodo zemikusu ezingelakubalwa; abaseSidoni labaseTire bamlethela imikusu eminengi.

5UDavida wathi: USolomoni indodana yami usengumfana, kakabi lakwazi, indlu ezakwakhelwa iNkosi uNkulunkulu kumele ibe nkulu, ibatshazwe ibe lodumo emazweni wonke. Ngakhoke mina ngizakwenza amalungiselelo ngayo. Ngakho uDavida wasedingake impahla ezinengi zokwakha engakafi.

6Wasebiza uSolomoni indodana yakhe, wamlaya ukuba akhele iNkosi uNkulunkulu kaIsrayeli indlu.

7Wathi kuSolomoni: Mntanami, ngangizimisele ukwakhela ibizo leNkosi uNkulunkulu kaIsrayeli indlu.2 Sam 7:1–16; 1 Lan 17:1–14

8Kodwa ilizwi leNkosi lafika kimi lisithi: Wena uchithe igazi elinengi, walwa izimpi ezinkulu; ngakho kawuyikwakhela ibizo lami indlu, ngoba uchithe igazi elinengi kangaka emhlabeni.

9Kodwa, uzazala indodana ezakuba ngumuntu othanda ukuthula; ngizakuyiphumuza ezitheni zayo zonke inxa zonke. Izakuthiwa nguSolomoni okutsho umuntu othanda ukuthula, ngizamphumuza uIsrayeli ngimnike ukuthula ensukwini zakhe.

10Yena uzakwakhela ibizo lami indlu. Uzakuba yindodana yami, mina ngibe nguyise, ngiqinise ubukhosi bakhe koIsrayeli kuze kube nininini.

11Wena mntanami, iNkosi ibe lawe ukuze uphumelele ukwakha indlu yeNkosi uNkulunkulu wakho, njengokutsho kwayo ngawe.

12INkosi ikunike ukuhlakanipha lokuqedisisa, ukuba kuthi lapho ikunika amandla koIsrayeli, uwulondoloze umlayo weNkosi uNkulunkulu wakho.

13Uzakuphumelelake uba unanzelela ukugcina izimiso lemithetho iNkosi uNkulunkulu eyayinika uIsrayeli ngoMose. Qina, ube lesibindi, ungesabi utshaywe luvalo.Josh 1:6–9

14Ngayo yonke imizamo yami ngilungisele indlu yeNkosi amathalenta egolide ayizinkulungwane ezilikhulu, lamathalenta esiliva ayizinkulungwane eziyinkulungwane, lethusi lensimbi engelakulinganiswa, ngoba yinengi kakhulu; ngiyilungisele lezigodo lamatshe. Wenake uzakwengezelela kulokho.

15Ulezisebenzi ezinengi, ababazi bamatshe, labakha ngamatshe, lababazi bezigodo, lazo zonke inhlobo zezingcitshi ezingelakubalwa,

16ezikwaziyo ukusebenza ngegolide lesiliva lethusi lensimbi. Qalisake ukusebenza; iNkosi ibe lawe!

17UDavida waselaya zonke izinduna zakoIsrayeli ukumsiza uSolomoni indodana yakhe,

18wathi: INkosi uNkulunkulu wenu kayilani na? Kayilinikanga ukuthula inxa zonke na? Ngoba inikele abantu belizwe esandleni sami, lelizwe linqotshelwe iNkosi labantu bayo.

19Vusani ingqondo zenu lenhliziyo zenu ukudinga iNkosi uNkulunkulu wenu. Qalisani ukwakha indlu yeNkosi uNkulunkulu, ukuze umtshokotsho wesivumelwano seNkosi lezitsha zikaNkulunkulu ezingcwele zingeniswe endlini eyakhelwe ibizo layo.