Zaga 30 - Ndebele Bible (iBhayibhili Elingcwele) 1978

Amazwi kaAguri

1Nanka amazwi kaAguri indodana kaJake owaseMasa. Lowomuntu wathi:

Sengidiniwe, Nkulunkulu, sengidiniwe, ngaphela amandla.

2Impela ngiyisithutha kulabanye abantu,

kangilakuqedisisa komuntu.

3Kangifundanga ukuhlakanipha,

kangilakwazi ngoNgcwele.

4Ngubani owake wenyukela ezulwini, wabuye wehla na?

Ngubani oqoqe umoya ngezandla zakhe na?

Ngubani ogoqele amanzi engutsheni na?

Ngubani omise yonke imikhawulo yomhlaba na?

Ngubani ibizo lakhe, ngubani ibizo lendodana yakhe, uba ulazi na?

5Wonke amazwi kaNkulunkulu athembekile;

uyisihlangu kubo bonke abaphephela kuye.

6Ungengezeleli emazwini akhe,

funa akukhuze, ufunyaniswe wena ungoqamba amanga.

Umkhuleko kaAguri

7Ngiyacela kuwe, Nkulunkulu, izinto ezimbili,

ungangincitshi zona ngisaphila.

8Susa khatshana lami inkohliso lamanga;

ungangiphi ubuyanga loba inotho;

ungiphe kuphela ukudla okwaneleyo,

9funa ngisuthe, ngikuphike ngithi: Ngubani iNkosi?

Kodwa uba ngingumyanga, ngingeba,

ngilone ibizo likaNkulunkulu wami.

10Ungahlebi inceku enkosini yayo,

funa ikuthuke, uhlupheke.

11Kukhona labo abathuka oyise,

abangabongi onina.

12Kukhona labo abathi bahlambulukile,

kodwa bengahlanjululwanga emanyaleni abo.

13Kukhona labo abazikhukhumezayo,

yebo, bayazikhukhumeza sibili!

14Kukhona labo abalamazinyo ayimihedla,

lemihlathi yabo ilezingqamu,

ukuba badle bonke abayanga emhlabeni,

labaswelayo bonke phakathi kwabantu.

15Umkhaza ulamadodakazi amabili athi: Siphe, siphe.

Kukhona izinto ezithile ezingasuthiyo,

yebo, ezine ezingatsho ukuthi: Kwanele.

16Ziyindawo yabafileyo, lenyumba, lelizwe elingelamanzi,

lomlilo ongatsho ukuthi: Kwanele.

17Amehlo omuntu oklolodela uyise lodelela ubudala bukanina

azakukhutshwa ngamawabayi, loba adliwe ngamanqe.

18Kukhona izinto ezithile ezingimangalisayo kakhulu,

yebo, ezine engingaziqedisisiyo;

19ziyikuphapha kokhozi phezulu,

lomzila wenyoka edwaleni,

lokuhamba komkolo olwandle,

lothando lwejaha entombini.

20Kunjaloke ukuhamba kwesifebe;

siyadla, besesisesula umlomo waso,

sithi: Kangonanga.

21Kukhona izinto ezithile ezizamazamisa umhlaba,

yebo, ezine ongezithwale wona;

22ziyisigqili esiba yinkosi,

lesithutha esisuthiyo,

23lowesifazana oyisaliwakazi,

lencekukazi ethatha isikhundla senkosikazi yayo.

24Kukhona emhlabeni izinto ezine ezincinyane kakhulu,

kanti zihlakaniphile kakhulu;

25ziyibunyonyo obuyisizwe esingelamandla,

kanti bubutha ukudla kwabo ehlobo;

26lezimbila eziyisizwe esibuthakathaka,

kanti zakhela emadwaleni;

27lezintethe ezingelankosi,

kanti zonke zibekelela udwendwe;

28lombankwa ongawuphakamisa ngesandla,

kanti ukhona ezigodlweni.

29Kukhona izinto ezithile ezihamba ngokuziqhenya,

yebo, ezine ezihamba zilesithunzi;

30ziyisilwane esilesibindi kulazo zonke inyamazana esingabalekeli lutho;

31leqhude elikhonyayo, lempongo ekhokhela umhlambi,

lenkosi ekhokhela impi yayo.

32Uba ube yisithutha, waziphakamisa, waceba okubi,

vala umlomo wakho;

33ngoba ukuphehla uchago kuveza iphehla,

lokutshaya impumulo kuveza igazi,

lokuvusa intukuthelo kuveza ukuxabana.