2 Sam 18 - Ndebele Bible (iBhayibhili Elingcwele) 1978

Ukufa kukaAbisalomu

1UDavida wabutha abantu ababelaye, wababekela izinduna zezinkulungwane lezinduna zamakhulu.

2Wahlukanisa amabutho aba yizigaba ezintathu, esinye isigaba saphathwa nguJowabi, lesinye saphathwa ngumfowabo kaJowabi, uAbishayi indodana kaZeruya, esesithathu saphathwa nguIthayi waseGiti. Inkosi yawazisa amabutho ukuba layo uqobo izaphuma impi.

3Kodwa abantu bathi: Kawuyikuphuma. Ngoba uba sibaleka, kabayikuba landaba lathi; loba kusifa ingxenye yethu, kabayikuba landaba. Kanti wena ulingana lenkulungwane ezilitshumi zethu; ngakho kuhle usisize uphakathi komuzi.

4Inkosi yasisithi kibo: Ngizakwenza lokho elikubona kulungile. Inkosi yasisima eceleni kwesango, wonke amabutho aphuma ngamakhulu langezinkulungwane.

5Inkosi yabalaya oJowabi loAbishayi loIthayi, yathi: Aliboliphatha kuhle ijaha uAbisalomu ngenxa yami. Bonke abantu bezwa lapho inkosi ilaya zonke izinduna ngoAbisalomu.

6Impi yaphumela egangeni ukuyakulwa loIsrayeli, kwalwelwa eguswini elakoEfrayimi.

7AbakoIsrayeli behlulwa lapho ngabantu bakaDavida, kwaba khona ukubulalana okukhulu ngalolosuku, kwafa abantu abazinkulungwane ezingamatshumi amabili.

8Impi yahlakazekela elizweni lonke, igusu laqeda abantu abanengi ngalolosuku ukwedlula umkhonto.

9UAbisalomu wahlangana lenceku zikaDavida. Wayegade imbongolo; kwathi isedlula ngaphansi kwengatsha zesihlahla esikhulu, ikhanda lakhe labanjwa zingatsha; imbongolo yadlula, yena wasala elenga emoyeni.

10Umuntu othile wambona, watshela uJowabi wathi: Ngibone uAbisalomu elenga esihlahleni esikhulu.

11UJowabi wathi kulowomuntu omtshelayo: Umbonile na? Kungani ungamjuqanga, wawela phansi na? Bengizakukunika inhlamvu ezilitshumi zesiliva kanye lebhanti.

12Kodwa lowomuntu wathi kuJowabi: Loba bengizanikwa inhlamvu eziyinkulungwane zesiliva, bengingayikusiphakamisela isandla sami endodaneni yenkosi, ngoba inkosi yakulaya wena loAbishayi loIthayi sisizwa yathi: Lilondolozeni ijaha uAbisalomu ngenxa yami.

13Uba bengenze inkohliso ngokuphila kwakhe, inkosi ibizakukwazi lokho ngoba yona kayicatshelwa lutho, lawe uqobo ubungayikwenza lutho.

14UJowabi wasesithi: Kangiyikuchitha isikhathi ngokunjalo lawe. Wasethatha imikhonto emithathu, wamhlaba uAbisalomu enhliziyweni esezwa esabanjiwe yisihlahla esikhulu.

15Insizwa ezilitshumi ezaziphatha izikhali zikaJowabi, zamzingelezela uAbisalomu, zamtshaya zambulala.

16UJowabi wasetshaya uphondo, abantu babuya ekuxotshaneni loIsrayeli, ngoba uJowabi esebatshele ukuba bayekele.

17Basithatha isidumbu sikaAbisalomu, basiphosela emgodini omkhulu eguswini, babuthelela inqwaba yamatshe phezulu; bonke abakoIsrayeli babalekela emakhaya abo.

18UAbisalomu esekhona wayemise insika esigodini senkosi, ngoba wathi: Angilandodana yokukhumbula ibizo lami. Leyonsika wayitha ibizo lakhe, kuthiwa yisikhumbuzo sikaAbisalomu kuze kube lamuhla.

19UAhimazi indodana kaZadoki wasesithi: Ake ngigijime, ngiyibikele inkosi ukuthi iNkosi uNkulunkulu iyikhulule ezitheni zayo.

20Kodwa uJowabi wathi kuye: Kawuyikubika indaba lamuhla, kodwa uzazibika ngolunye usuku; lamhla kawuyikubika lutho, ngoba indodana yenkosi ifile.

21UJowabi wasesithi kumEtiyopiya: Hamba uyebikela inkosi okubonileyo. UmEtiyopiya wakhothama phambi kukaJowabi, wasuka wagijima.

22UAhimazi indodana kaZadoki wabuya wathi kuJowabi: Loba kunjani, ake ngigijime lami, ngimlandele umEtiyopiya. Kodwa uJowabi wathi: Uzagijimelani, mntanami, lokhu kawuyikuzuza umvuzo ngombiko wakho na?

23Yena wathi: Loba kunjani, ngizagijima. Wathi: Gijima. Wasegijima uAhimazi ngendlela edabula esigodini saseJordani, wamdlula emEtiyopiya.

24UDavida wayehlezi phakathi kwamasango womabili; umlindi wakhwela waya ophahleni lwesango emdulini, wahle wabona umuntu egijima yedwa.

25Umlindi wamemeza wayitshela inkosi. Yathi inkosi: Uba eyedwa uletha indaba ezinhle. Umuntu lowo wayelokhu esondela njalo.

26Umlindi wabuya wabona omunye umuntu egijima; wabiza umlindisango wathi: Nanguya omunye umuntu ugijima yedwa. Inkosi yathi: Laye uletha indaba ezinhle.

27Umlindi wasesithi: Ngibona kungathi owokuqala ugijimisa uAhimazi indodana kaZadoki. Inkosi yathi: Ngumuntu olungileyo yena, uletha indaba ezinhle.

28UAhimazi wasekhuleka esithi enkosini: Bayethe! Wakhothama phambi kwenkosi, wakhangela phansi wathi: Kayibongwe iNkosi, uNkulunkulu wakho, enikele esandleni sakho abantu abavukela inkosi yami.

29Inkosi yathi: Injani insizwa uAbisalomu na? UAhimazi wathi: Ngibone ukuphithizela okukhulu lapho uJowabi inceku yenkosi engithuma, kodwa kangazanga ukuba bekwenze njani.

30Inkosi yathi: Buyela eceleni, ume khona. Wasebuyela eceleni esima.

31Kwasekufika umEtiyopiya wathi: Kuzindaba ezinhle, nkosi yami! INkosi uNkulunkulu ikuphindisele lamuhla kubo bonke abakuvukelayo.

32Inkosi yasisithi kumEtiyopiya: Injani insizwa uAbisalomu na? UmEtiyopiya wathi: Kungathi izitha zenkosi yami labo bonke abayivukelayo ukuba bayilimaze bangaba njengaleyonsizwa.

33Yadabuka kakhulu inkosi, yakhwela yaya endlini engaphezu kwesango, yahamba ikhala isithi: Hawu, ndodana yami Abisalomu, ndodana yami, ndodana yami, Abisalomu! Kungathi ngabe kufe mina endaweni yakho! Hawu, Abisalomu, ndodana yami, ndodana yami!