Hubo 21 - Ndebele Bible (iBhayibhili Elingcwele) 1978

Ukubonga uNkulunkulu ngokukhululwa

1Nkosi, inkosi iyajabula ngamandla akho,

iyathaba kakhulu ngokusiza kwakho.

2Uyinikile isifiso senhliziyo yayo,

kawalanga ukucela kwayo.

3Wayihlangabeza ngezibusiso zokuhle,

wayethwesa umqhele wegolide elihle ekhanda layo.

4Yacela ukuphila kuwe, wayinika khona,

insuku ezinengi kuze kube nini lanini.

5Lukhulu udumo lwayo ngenxa yokusiza kwakho,

ubukhosi lobukhulu wabubeka phezu kwayo.

6Yebo, uyayibusisa kuze kube nini lanini,

uyayithokozisa ngenjabulo yokubakhona kwakho.

7Ngoba inkosi iyathemba kuNkulunkulu,

langenxa yothando olungapheliyo loPhezukonke kayizukunyikinywa.

8Isandla sakho, nkosi, sizakuzifumana zonke izitha zakho,

lesandla sakho sokunene sizakubafumana labo abakuzondayo.

9Uzakubabhubhisa njengomlilo ovuthayo ekufikeni kwakho.

INkosi izakubaginya ekuthukutheleni kwayo,

lomlilo uzakubaqothula.

10Uzakuchitha inzalo yabo emhlabeni,

labantwana babo phakathi kwabantu.

11Nxa belungisela okubi ngawe,

beceba okubi, bazakwahluleka;

12ngoba uzakubachitha,

uzakubakhomba ebusweni ngemitshoko yakho.

13Vuka, Nkosi, ngamandla akho!

Thina sizakuhlabela sidumise amandla akho.