Hlu 14 - Ndebele Bible (iBhayibhili Elingcwele) 1978

USamsoni lowesifazana waseTimina

1USamsoni waya eTimina, wabona khona enye yezintombi zamaFilistiya.

2Wasebuya ukutshela uyise lonina wathi: Ngibone enye yezintombi zamaFilistiya eTimina. Ake lingizuzele yona ibe ngumkami.

3Kodwa uyise lonina bathi: Kakulantombi yini phakathi kwezihlobo zakho laphakathi kwabo bonke abakithi ukuba uyethatha umfazi kumaFilistiya angasokanga na? Kodwa uSamsoni wathi kuyise: Ngithathele yena ngoba ngiyamthanda.

4Uyise lonina babengazi ukuba lokho kuvela eNkosini eyayifuna ithuba lokulwa lamaFilistiya ayebabusa abakoIsrayeli ngalesosikhathi.

5USamsoni wasehamba esiya eTimina, wafika ezivinini zakhona; wabona isilwane sisiza kuye sibhonga.

6Umoya kaNkulunkulu wehlela ngamandla phezu kwakhe; wasidabula isilwane ngezandla zakhe njengomuntu edabula izinyane. Kodwa kabatshelanga oyise lonina lokho akwenzileyo.

7Wasesiya ukukhuluma lowesifazana, wamthanda kakhulu.

8Ngemva kwesikhathi wabuyela ukuyamthatha abe ngumkakhe; waphambuka ukuba abone isidumbu sesilwane, wafumanisa inyosi esidunjini sesilwane kanye loluju.

9Wazithapha ngezandla zakhe, wadlula, wahamba esidla, wafika kuyise lonina, wabanika ezinye, badla. Kodwa kabatshelanga ukuthi wayethaphe inyosi esidunjini sesilwane.

10Uyise wayibona intombi, loSamsoni wenza idili khona, ngoba zazisenza njalo insizwa.

11Kwathi lapho abantu bembona bamlethela abanakwabo abangamatshumi amathathu ukuba bahlale laye.

12USamsoni wathi kibo: Ake ngililibhe, uba lingangitshela ukuthi kuyini ensukwini eziyisikhombisa zedili, likufumane, ngizalinika izambatho zelembu elihle ezingamatshumi amathathu lengubo ezintsha ezingamatshumi amathathu.

13Kodwa uba lisehluleka ukungitshela ukuthi kuyini, lizanginika lina izambatho zelembu elihle ezingamatshumi amathathu lengubo ezintsha ezingamatshumi amathathu. Bathi kuye: Tshono ilibho lakho ukuba silizwe.

14Wathi kubo:

Kokudlayo kwaphuma ukudla,

kokulamandla kwavela okumnandi.

Behluleka ukuliqamba ilibho ensukwini ezintathu.

15Ngosuku lwesine bathi kumkaSamsoni: Huga umkakho ukuba asitshele ilibho, funa sikutshise ngomlilo kanye lendlu kayihlo. Lisimemele ukuba lisiphange na?

16UmkaSamsoni wakhala phambi kwakhe wathi: Uyangizonda, kawungithandi; ubalibhile abantu bakithi, kawungitshelanga ukuba ilibho liyini. Yena wathi kuye: Kangibatshelanga ubaba lomama, ngizatshela wena na?

17Umkakhe wakhala phambi kwakhe insuku eziyisikhombisa zedili labo. Ngosuku lwesikhombisa uSamsoni wasemtshela ngoba wamcindezela. Yena wasebatshela abakibo ilibho.

18Ngosuku lwesikhombisa engakangeni endlini yomthimba, abantu bomuzi bathi kuye:

Kuyini okumnandi ukwedlula uluju?

Kuyini okulamandla kulesilwane na?

Yena wathi kibo:

Uba belingalimanga ngethokazi lami,

belingayikuliqamba ilibho lami.

19Umoya kaNkulunkulu wehlela ngamandla phezu kwakhe, wasuka waya eAshikeloni, wabulala khona amadoda omuzi angamatshumi amathathu, wathatha impango, wababika ingubo ezintsha labo ababeqambe ilibho lakhe. Ngokuthukuthela okukhulu wabuyela endlini kayise.

20Umkakhe wanikwa umngane kaSamsoni, owayengumkhaphi wakhe.