Hubo 88 - Ndebele Bible (iBhayibhili Elingcwele) 1978

Ukukhala kohluphekayo

1Nkosi Nkulunkulu wami, ngiyacela emini ukusizwa;

ngiyakhala kuwe ebusuku.

2Umkhuleko wami kawufinyelele phambi kwakho,

uzwe ukukhala kwami.

3Ngoba umphefumulo wami ugcwele ukuhlupheka,

lokuphila kwami kusondele endaweni yabafileyo.

4Ngibalelwa kulabo abafayo;

ngingumuntu obuthakathaka,

5ngilahlelwe phakathi kwabafileyo,

nginjengababuleweyo abalele emalibeni

ongasabakhumbuliyo wena,

ngoba besusiwe esandleni sakho.

6Ungifakile enzikini yomgodi,

ezindaweni zomnyama ezitshonayo.

7Kuyangisinda kakhulu ukuthukuthela kwakho,

lamavinqo akho wonke ayangibandezela phansi.

8Wenze abanakwethu bangidele;

wangenza ngaba yinto eyesabekayo kubo;

ngivalelwa ukuba ngingaphumi,

9amehlo ami ayafiphala ngenxa yosizi.

Ngiyakhuleka kuwe insuku zonke, Nkosi,

ngizelulele izandla zami kuwe.

10Abafileyo uyabenzela izimangaliso na?

Izithunzi ziyavuka yini zikudumise na?

11Uthando lwakho olungapheliyo luyatshunyayelwa yini elibeni,

lobuqotho bakho endaweni yabafileyo na?

12Izimangaliso zakho ziyaziwa yini emnyameni,

lokulunga kwakho elizweni lokukhohlwa na?

13Kodwa mina, Nkosi, ngiyakhala kuwe,

ekuseni umkhuleko wami uyafinyelela phambi kwakho.

14Nkosi, ungilahleleni,

ubufihleleni ubuso bakho kimi na?

15Ngihluphekile ngaba seduze lokufa kusukela ebutsheni bami,

ngethukile kakhulu, sengiphele amandla.

16Ulaka lwakho ludlulile phezu kwami,

okwesabekayo kwakho kungiqedile.

17Kungizingelezile njengamanzi usuku lonke,

kuyangambesa.

18Wenze izihlobo labangane ukuba bangixwaye;

umnyama ungumngane wami.