Dan 2 - Ndebele Bible (iBhayibhili Elingcwele) 1978

Iphupho likaNebukadineza

1Ngomnyaka wesibili wokubusa kwakhe uNebukadineza waphupha amaphupho, lomoya wakhe wakhathazeka waze waswela ubuthongo.

2Inkosi yasilaya ukuba kubizwe izanuse lezangoma labavumisayo lamaKaladiya ukuba bayichasisele amaphupho ayo. Bangenake, bema phambi kwayo.

3Yathi kibo: Ngiphuphile, lomoya wami ukhathazekile ukuba ulazi iphupho.

4AmaKaladiya athi enkosini ngesiAramu: Bayethe nkosi! Ake uzitshele inceku zakho iphupho, thina sizakutshela incazelo yalo.

5Inkosi yathi kumaKaladiya: Engikutshoyo nanku; uba lingangitsheli iphupho lencazelo yalo, lizaqunywaqunywa iziqa, kudilizwe lemizi yenu.

6Kodwa uba lingitshela iphupho lencazelo yalo, ngizalinika izipho lomvuzo lodumo olukhulu. Ngakhoke ngitshelani iphupho lencazelo yalo.

7Baphendula okwesibili bathi: Inkosi ake itshele inceku zayo iphupho, lathi sizayitshela incazelo yalo.

8Inkosi yaphendula yathi: Ngiyazi sibili ukuthi lizama ukuchitha isikhathi, ngoba liyabona ukuba ilizwi lami liqinisile,

9ukuthi uba lingangitsheli iphupho, isigwebo senu sinye nje. Livumelene ukukhuluma amanga lamazwi amabi phambi kwami kuze kudlule izikhathi. Ngakhoke ngitshelani iphupho, lami ngizakwazi ukuthi sibili lingangitshela incazelo yalo.

10AmaKaladiya ayiphendula inkosi athi: Kakukho muntu emhlabeni ongayitshela inkosi lokho ekufunayo; ngoba kayikho inkosi enkulu lombusi olamandla owake wabuza into enje esanuseni lesangomeni lakumaKaladiya.

11Into inkosi eyibuzayo ilukhuni, kakho loyedwa ongayitshela inkosi ngaphandle kwabonkulunkulu abangahlali labantu.

12Ngenxa yalokho inkosi yazonda, yathukuthela kakhulu, yalaya ukuba bonke abahlakaniphileyo baseBabiloni babulawe.

13Kwasekuphuma isimemezelo sokuthi bonke abahlakaniphileyo kababulawe; basebedinga uDaniyeli labangane bakhe ukuba labo babulawe.

14UDaniyeli wasehamba ngokunanzelela langokuqonda, waya kuAriyoki induna yabalindi benkosi owayephumile ukubulala abahlakaniphileyo baseBabiloni.

15Wathi kuAriyoki induna yenkosi: Kungani sinzima kangaka isimemezelo senkosi na? UAriyoki wasemtshelake uDaniyeli indaba.

16UDaniyeli wasengena, wayicela inkosi ukuba imnike isikhathi ukuba ayitshele incazelo yephupho.

17UDaniyeli wasesiya endlini yakhe, wabatshela indaba oHananiya loMishayeli loAzariya abangane bakhe;

18wabatshela ukuba bacele isihawu sikaNkulunkulu ophezulu ngalimfihlakalo, ukuze uDaniyeli kanye labangane bakhe bangabhujiswa kanye labo bonke abahlakaniphileyo baseBabiloni.

19Imfihlakalo yambulelwa uDaniyeli embonweni ebusuku. UDaniyeli wasembonga uNkulunkulu ophezulu.

20UDaniyeli wathi:

Kalibongwe ibizo likaNkulunkulu kuze kube nininini,

ngoba ukuhlakanipha konke lamandla wonke kungokwakhe.

21Uyaphendula izikhathi lezibanga,

uyakhupha amakhosi, abeke amakhosi,

anike abahlakaniphileyo ukuhlakanipha,

lokwazi kulabo abalokuqedisisa.

22Uyambula okuzikileyo lokufihlakeleyo,

uyakwazi okusemnyameni,

lokukhanya kuhlala laye.

23Ngiyakubonga ngikudumise, wena Nkulunkulu wabokhokho,

ngoba unginikile ukuhlakanipha lamandla,

usungazisile lokho esikucelileyo kuwe,

ngoba usitshengisile indaba yenkosi.

24UDaniyeli wasesiya kuAriyoki owayemiswe yinkosi ukuba abulale abahlakaniphileyo baseBabiloni, wathi kuye: Ungababulali abahlakaniphileyo baseBabiloni; ngisa phambi kwenkosi, mina ngizayitshela inkosi incazelo.

25UAriyoki wasemusa uDaniyeli enkosini ngokuphangisa, wathi kuyo: Ngifumene kwabathunjiweyo bakoJuda ongayitshela inkosi incazelo.

26Inkosi yasisithi kuDaniyeli, obizo lakhe lalinguBeliteshazari: Wena ungangitshela yini iphupho engiliphuphileyo kanye lencazelo yalo na?

27UDaniyeli wayiphendula inkosi wathi: Imfihlakalo inkosi eyibuzayo, abahlakaniphileyo lezangoma lezanuse labafunda inkanyezi bangeyichasisele inkosi;

28kodwa ukhona uNkulunkulu ophezulu owambula izimfihlakalo, uyitshengisile inkosi uNebukadineza okuzakwenzeka ensukwini zokucina. Iphupho lakho lemibono eyafika engqondweni yakho ulele embhedeni yile;

29kuwe nkosi, usalele embhedeni kwafika imicabango yalokho okuzakwenzeka emva kwalokhu, lalowo owambula izimfihlakalo ukwazisile wena lokho okuzakwenzeka.

30Minake, kungesikho ukuthi ngihlakaniphile ukwedlula bonke abaphilayo ngiyambulelwe limfihlakalo, kodwa ukuze incazelo itshengiswe wena nkosi, ukuba wazi imicabango yengqondo yakho.

31Wena nkosi, wabona isithombe esikhulu. Isithombe lesi sasisikhulu, sikhazimula, sema phambi kwakho, lesimo saso sasisesabeka.

32Ikhanda laso lalenziwe ngegolide elihle, isifuba saso lengalo zaso kwenziwe ngesiliva, isisu saso lamathangazi aso kwenziwe ngethusi,

33imilenze yaso yenziwe ngensimbi, inyawo zaso zenziwe ngengxenye yensimbi lengxenye yebumba.

34Wasubona ilitshe liqephuka entabeni, kodwa lingaqetshulwa muntu, latshaya inyawo zesithombe ezenziwe ngensimbi lebumba, lazichoboza.

35Kwathi insimbi lebumba lethusi lesiliva legolide, konke kwaba yizicucu, kwafanana lomule lwesiza ehlobo. Kwaphetshulwa ngumoya, kwanyamalala, kakwaze kwasala lutho lwakho. Kodwa ilitshe elatshaya isithombe laba yintaba enkulu, lagcwalisa umhlaba wonke.

36Yilo lelo iphupho; sesizakuyitshela inkosi incazelo yalo.

37Wenake, nkosi, uyinkosi yamakhosi enikwe umbuso nguNkulunkulu ophezulu lamandla lodumo lobukhosi,

38okunikelwe esandleni sakho endaweni zonke abantu lenyamazana zeganga lenyoni zaphezulu, wenziwa waba ngumbusi wazo zonke; wena ulikhanda elenziwe ngegolide.

39Emva kwakho kuzavela omunye umbuso omncinyane kulowakho, kuvele lomunye owesithathu owethusi ozabusa umhlaba wonke.

40Kuzakuba khona umbuso wesine oqinileyo njengensimbi; ngoba njengoba insimbi ichoboza ibulale zonke izinto lawo uzachoboza, ubulale yonke imibuso yakuqala!

41Njengoba wabona inyawo lamazwane enziwe ngengxenye yebumba lombumbi lengxenye yensimbi, uzakuba ngumbuso odabukileyo phakathi. Kodwa ingxenye yawo izakwenziwa njengensimbi njengoba wabona insimbi ihlanganiswe lebumba elibuthakathaka.

42Njengoba amazwane enyawo ayenziwe ngengxenye yensimbi lengxenye yebumba, ngakhoke lowombuso uzakuba lamandla nganxanye, ube buthakathaka nganxanye.

43Njengoba wabona insimbi ihlanganiswe lebumba elibuthakathaka, bazaxubana ngokuthathana; kodwa kabayikunamathelana njengoba insimbi ingahlangani lebumba.

44Ensukwini zalawomakhosi uNkulunkulu ophezulu uzamisa umbuso ongayikuchithwa, lobukhosi bawo kabuyikuthathwa ngabanye abantu. Uzachoboza yonke limibuso, uyiqede, ume njalo kuze kube nininini,

45njengoba wabona ilitshe liqephuka entabeni, lingaqetshulwa muntu, laphohloza insimbi lethusi lebumba lesiliva legolide. UNkulunkulu omkhulu uyazisile inkosi okuzakwenzeka emva kwalokho. Iphupho liqinisile, lencazelo yalo iliqiniso.

46Inkosi uNebukadineza yasisithi mbo ngobuso phansi, yakhuleka kuDaniyeli, yalaya ukuba kunikelwe kuye umnikelo lempepha.

47Inkosi yathi kuDaniyeli: Isibili uNkulunkulu wakho unguNkulunkulu wabonkulunkulu, leNkosi yamakhosi, lomambuli wezimfihlakalo, ngoba uyambule limfihlakalo.

48Inkosi yasimnika uDaniyeli udumo olukhulu leziphiwo ezinengi ezinkulu, yambeka umbusi welizwe lonke laseBabiloni lenduna enkulu yabo bonke abahlakaniphileyo baseBabiloni.

49UDaniyeli wasecela enkosini ukubeka oShadraki loMeshaki loAbedinego babe ngabaphathi belizwe laseBabiloni; kodwa yena uDaniyeli wahlala esigodlweni senkosi.