2 Kho 3 - Ndebele Bible (iBhayibhili Elingcwele) 1978

Ukubusa kukaJehoramu koIsrayeli

1Ngomyaka wetshumi lesificaminwembili wokubusa kukaJehoshafati inkosi yakoJuda uJehoramu indodana kaAhabi waba yinkosi yakoIsrayeli eSamariya; wabusa iminyaka elitshumi lambili.

2Wenza okubi phambi kweNkosi lanxa engafanananga loyise lonina, ngoba yena wasusa insika kaBali eyayenziwe nguyise.

3Kodwake wanamathela esonweni sikaJerobowamu indodana kaNebati esenza uIsrayeli one, kasukanga kuso.

UElisha uthi iMowabi lizakunqotshwa

4UMesha inkosi yaseMowabi wayengumfuyi wezimvu, wayeletha enkosini yakoIsrayeli iminyaka yonke amawundlu azinkulungwane ezilikhulu, loboya bezinqama ezizinkulungwane ezilikhulu.

5Kodwa kwathi esefile uAhabi, inkosi yaseMowabi yavukela inkosi yakoIsrayeli.

6Inkosi uJehoramu yaphuma eSamariya, yahlomisa wonke uIsrayeli.

7Yathumela ilizwi kuJehoshafati inkosi yakoJuda yathi: Inkosi yaseMowabi isingivukele; uzahamba lami ukulwa leMowabi na? Yena wathi: Ngizahamba. Okwami ngokwakho, lami uqobo labantu bami kanye lamabhiza ami.

8Yasisithi: Sizahamba ngayiphi indlela na? UJehoramu waphendula wathi: Ngendlela yasenkangala yaseEdoma.

9Yasihamba inkosi yakoIsrayeli lenkosi yakoJuda lenkosi yaseEdoma. Sebehambe insuku eziyisikhombisa, kwaphela amanzi empi lawezifuyo ezithwalayo.

10Inkosi yakoIsrayeli yasisithi: Maye! INkosi uNkulunkulu isihlanganisile thina makhosi amathathu ukusinikela ezandleni zamaMowabi.

11UJehoshafati wasesithi: Kakulamprofethi weNkosi lapha esingabuza ngaye iNkosi na? Enye yezinceku zenkosi yakoIsrayeli yathi: Kukhona lapha uElisha indodana kaShafati owayeyinceku kaElija.

12UJehoshafati wathi: Ilizwi leNkosi likuye. Inkosi yakoIsrayeli loJehoshafati lenkosi yaseEdoma baya kuye.

13UElisha wathi enkosini yakoIsrayeli: Ufunani kimi na? Hamba kubaprofethi bakayihlo labakanyoko. Kodwa inkosi yakoIsrayeli yathi kuye: Atshi, yiNkosi uNkulunkulu ehlanganise lamakhosi amathathu ukuwanikela ezandleni zamaMowabi.

14UElisha wathi: Ngifunga iNkosi yamabandla engiyikhonzayo, uba bengingahloniphi uJehoshafati inkosi yakoJuda, bengingayikukukhangela lokuwukhangela.

15Kodwake ngibizelani umtshayi wechacho. Kwathi umtshayi wechacho eselitshaya, amandla eNkosi ehlela kuElisha.

16Wasesithi: INkosi ithi: Yenzani imithombo eminengi kulesisifula esomileyo,

17lanxa lingayikubona umoya lezulu, kodwa lesisifula sizagcwala amanzi ukuze linathe lina, lenkomo zenu lezifuyo zenu.

18Kodwa lokhu kuyinto encinyane nje eNkosini. Izanikela lamaMowabi ezandleni zenu;

19lizanqoba yonke imizi ebiyelweyo lemizi yonke emihle, ligamule zonke izihlahla ezinhle, ligqibele yonke imithombo yamanzi, lone ngamatshe amasimu wonke avundileyo.

20Kwathi kusisa ngesikhathi sokunikelwa komnikelo kwafika amanzi evelela eEdoma, ilizwe lonke lagcwala amanzi.

21Wonke amaMowabi esezwile ukuthi amakhosi afikile ukuwahlasela, wonke ayengahloma kusukela kwamancinyane kusiya kwamadala abuthwa, ayamisa ngasemngceleni.

22Avuka ekuseni kakhulu. Kwathi ilanga selikhanya emanzini, amaMowabi abona amanzi phambi kwawo ebomvu njengegazi,

23athi: Ligazi leli; amakhosi alwile impela aze abulalana. Ziphangele, Mowabi!

24Kodwa kwathi efika ezihonqweni zabakoIsrayeli, abakoIsrayeli bawasukela bawatshaya, aze abaleka; bangena elizweni lamaMowabi baqhubekela phambili bewabulala.

25Bayichitha imizi, kuwo wonke amasimu avundileyo abantu bonke baphosela amatshe aze agcwala, bagqibela yonke imithombo yamanzi, bagamula zonke izihlahla ezinhle, kwaze kwasala izindlu eKiri‐Haresethi kuphela, abaphosa ngezavutha baligombolozela iKiri‐Haresethi, balichitha.

26Inkosi yaseMowabi isibonile ukuba iyehlulwa empini, yathatha abantu abahlome ngemihedla abangamakhulu ayisikhombisa ukuba ifohle maqondana lenkosi yaseEdoma, kodwa behluleka.

27Yasithatha indodana yayo elizibulo eyayizakuba yinkosi esikhundleni sayo, yayinikela yaba ngumnikelo wokutshiswa phezu komduli womuzi. Bethuswa kakhulu yilokho abakoIsrayeli, basuka babuyela elizweni lakibo.