Ingoma Yezingoma 2 - Ndebele Bible (iBhayibhili Elingcwele) 1978

1Ngililuba laseSharoni lomduze wasesigodini.

Umyeni:

2Njengomduze phakathi kwameva,

sinjaloke isithandwa sami phakathi kwezintombi.

Umlobokazi:

3Njengesihlahla somqokolo phakathi wezihlahla zesandle,

sinjaloke isithandwa sami phakathi kwamajaha.

Ngithanda ukuhlala emthunzini waso,

lezithelo sazo zimnandi kimi.

4Wangisa endlini yedili,

lophawu lwakhe phezu kwami luluthando.

5Ngisekelani ngezithelo zevini ezomisiweyo,

lingiqinise ngomqokolo,

ngoba ngiguliswa luthando.

6Ingalo yakhe yasekhohlo ingaphansi kwekhanda lami,

lengalo yakhe yokunene iyangigona.

Umyeni:

7Ngiyalifungisa, lina madodakazi aseJerusalema,

ngezimpala langemiziki yeganga,

ukuba lingasiphazamisi lisivuse singakazivukeli isithandwa sami.

Umlobokazi:

8Zwanini, isithandwa sami nansiyana siyeza!

Siyeqa phezu kwezintaba, siqolotsha emaqaqeni.

9Isithandwa sami sinjengempala lanjengegogo.

Nanso simi ngemva komduli wethu,

silunguza emawindini, sikhangele ngawo.

10Isithandwa sami siyakhuluma sithi kimi:

Vuka, sithandwa sami, wena omuhle,

woza, sihambe.

11Ngoba ubusika sebudlulile,

isikhathi sezulu sesiphelile.

12Amaluba ayahluma emhlabeni,

isikhathi sokuhlabela sesifikile,

lokukhala kwejuba kuyezwakala elizweni lakithi.

13Isihlahla somkhiwa sesithela,

lamavini asekhupha impoko ezinuka kuhle.

Vuka, sithandwa sami, wena omuhle,

woza, sihambe.

Umyeni:

14Wena juba lami, elisengoxweni yedwala

lasekusithekeni kweliwa akengibone ubuso bakho,

ngizwe ilizwi lakho, ngoba lihle,

lobuso bakho buyabukeka.

Abakhaphi:

15Sibambeleni amakhanka, amakhanka amancinyane,

onayo izivini zethu, ngoba sezilempoko.

Umlobokazi:

16Ungowami othandekayo wami, lami ngingowakhe,

uthokoziswa yimiduze.

17Emadabukakusa kusapholile, kusesemnyama.

phenduka, wena sithandwa sami,

uziveze njengempala lanjengegogo phezu kwezintaba ezimakhelekethe.