Isa 32 - Ndebele Bible (iBhayibhili Elingcwele) 1978

Inkosi elungileyo

1Khangela, kuzakuba khona inkosi ebusa ngokulunga,

lezikhulu ezibusa ngokufaneleyo.

2Yileso laleso sibe yindawo yokucatshela umoya lesivikelo sesiphepha,

sibe njengemifula yamanzi endaweni eyomileyo,

lanjengomthunzi wedwala elikhulu elizweni elilugwadule.

3Amehlo ababonayo kawayikuvaleka,

lezindlebe zabezwayo zizakulalela.

4Lengqondo zabalamawala zizakuba lengqondo yokuhle,

lolimi lwabalamalimi luzakhuluma kuhle.

5Isithutha kasisayikubizwa ngokuthi sihloniphekile,

lomkhohlisi athiwe uthembekile.

6Ngoba isithutha sikhuluma ubuthutha,

lengqondo yaso isebenza okubi,

ukuba senze izinto ezimbi lokuba siqambe amanga ngeNkosi,

lokuba singamniki ukudla olambileyo,

simncitshe amanzi owomileyo.

7Inkohliso zomkhohlisi zimbi;

wenza amacebo amabi ukuba achithe abayanga ngamazwi amanga,

abamuke okufaneleyo.

8Kodwa oqotho wenza ubuqotho,

uqiniswa yizinto eziqotho.

Ukuxwayiswa kwabesifazana abaseJerusalema

9Vukani, lina besifazana abachelesileyo,

lizwe ilizwi lami;

lina madodakazi angananziyo, lalelani ukukhuluma kwami.

10Khathesi kalinanzi lutho,

kodwa ngemva komnyaka lizakuthuthumela,

ngoba ukuvunwa kwevini kuzakuphela,

kungabuthwenga zithelo.

11Thuthumelani, lina besifazana abachelesileyo,

liqhuqhe, lina abangananziyo;

khumulani izigqoko, lisale lize,

lizibophe ngamasaka enkalweni zenu.

12Lizitshaye ezifubeni ngenxa yamasimu amahle,

langenxa yezithelo zevini,

13langenxa yomhlabathi wabantu bami osumile ukhula lameva,

langenxa yazo zonke izindlu ezazigcwele ukujabula,

lomuzi owawugcwele abantu.

14Ngoba isigodlo sizasala size,

lomuzi ogcwele abantu utshiywe uze;

amaqaqa lenziqaba zokulinda kuzasala kuyimihome kokuphela,

kube yindawo yabobabhemi beganga, lamadlelo emihlambi,

15umoya uze uthelwe phezu kwethu uvela phezulu.

Inkangala izakuba yindawo evundileyo,

lendawo evundileyo ibe lihlathi.

16Kuthi okufaneleyo kuhlale enkangala,

lokulunga kuhlale endaweni evundileyo.

17Ukulunga kuzaletha ukuthula

lokuvikeleka, kuze kube nininini.

18Abantu bami bazahlala endaweni yokuthula,

ezindaweni ezivikelekileyo, bengahlupheki.

19— Ihlathi lizakwehliselwa phansi,

lomuzi udilizelwe phansi —

20Lina lonke lizakuthokoza,

lihlanyele kuhle ngoba amanzi azaba manengi,

likhulule inkabi lobabhemi kuzihambele.