Jobe 37 - Ndebele Bible (iBhayibhili Elingcwele) 1978

1Ngenxa yalokho inhliziyo yami iyathuthumela,

isuke endaweni yayo.

2Zwana umdumo welizwi likaNkulunkulu,

lokuvungama okuphuma emlonyeni wakhe.

3Uyakukhupha ngaphansi kwalo lonke izulu,

lombane wakhe uyafika ezingonsini zomhlaba.

4Emva kwawo kuduma ilizwi lakhe,

uyaduma ngelizwi lobukhosi bakhe,

angawunqandi umbane lapho kuzwakala ilizwi lakhe.

5UNkulunkulu uyaduma ngelizwi lakhe ngokumangalisayo,

wenza izinto ezinkulu esingeke siziqedisise.

6Ngoba kungqoqwane uthi: Khithikela emhlabeni;

lakuzihlambo zezulu uthi: Yesabekani.

7Uyabavalela bonke abantu ukuba bangasebenzi,

ukuba bonke bazi ukusebenza kwakhe.

8Zonke inyamazana ziya ezikhundleni zazo,

zihlale emihomeni yazo.

9Isivunguzane siphuma endaweni yaso,

lomqando uphume enyakatho.

10Umoya kaNkulunkulu uveza ungqoqwane,

lamanzi abe lukhuni njengensimbi.

11Amayezi uyawagcwalisa ngamanzi,

amayezi ayaphazima umbane.

12Ayazulazula ngokuqondisa kwakhe,

ukuba enze konke awalaye khona,

emhlabeni wonke owakhiweyo.

13Wenza konke lokhu ukuba kufike,

kube yisiqondiso,

ingabe kufike ngenxa yelizwi lakhe loba ngenxa yomusa.

14Lalela lokhu, wena Jobe,

mana, ucabange ngemisebenzi emangalisayo kaNkulunkulu.

15Uyazi yini ukuba uNkulunkulu uwalawula kanjani,

enze umbane wamayezi akhe uphazime na?

16Uyazi yini ukuba amayezi uwalengisa kanjani,

ayisimangaliso sakhe yena ophelele ngokwazi,

17nxa izigqoko zakho zikhudumeza umzimba wakho,

lomhlaba uthule uthe zwi ngenxa yomoya waseningizimu na?

18Ungatshombulula isibhakabhaka njengaye,

siqine njengesibuko esibunjiweyo na?

19Sifundise ukuba sizakuthini kuye;

ngoba kumnyama, singeke silungise imicabango yethu.

20Umuntu angamlawula uNkulunkulu uba efuna ukukhuluma na?

Angamlaya ukuba atsho ilizwi lakhe na?

21Ngesinye isikhathi ukukhanya kakubonakali,

lisibekele ngamayezi lezulu,

umoya uyafika, uwaphephule aphele,

22lokukhanya kuqhamuke ngasenyakatho.

UNkulunkulu wambethe ubukhosi obesabekayo.

23uSomandla singemfumane,

mkhulu ngamandla langokulunga,

kayikuhlanekela ukulunga okukhulu.

24Ngakhoke abantu bayamesaba,

bonke abahlakaniphileyo bathembele kuye.