2 Lan 24 - Ndebele Bible (iBhayibhili Elingcwele) 1978

Ukubusa kukaJowashi koJuda

1UJowashi wayeleminyaka eyisikhombisa lapho eqalisa ukubusa; wabusa iminyaka engamatshumi amane eJerusalema. Ibizo likanina lalinguZibiya waseBerisheba.2 Kho 12:1–16

2UJowashi wenza okulungileyo phambi kweNkosi, insuku zonke zikaJehoyada umpristi.

3UJehoyada wamdingela abafazi ababili, uJowashi wazala amadodana lamadodakazi.

4Emva kwalokho uJowashi wazimisela ukulungisa ithempeli.

5Wabuthanisa abapristi lamaLevi, wathi kubo: Yanini kuyo yonke imizi yakoJuda, liqoqe kubo bonke abakoIsrayeli imali yokulungisa indlu kaNkulunkulu wenu umnyaka ngomnyaka, lenze masinyane. Kodwa amaLevi kawenzanga masinyane.

6Inkosi yasibiza uJehoyada umpristi omkhulu, yathi kuye: Kungani ungatshelanga amaLevi ukuba baqoqe koJuda laseJerusalema umthelo owamiswa nguMose inceku yeNkosi ebandleni lakoIsrayeli ukuba ube ngowethente loBufakazi?Eks 30:11–16

7Ngoba uAthaliya owesifazana omubi lamadodana akhe babefohlele endlini kaNkulunkulu, futhi babesebenzise zonke izinto ezingcwele zayo ekukhonzeni oBali.

8Inkosi yasilaya ukuba kwenziwe ibhokisi, libekwe ngasesangweni lethempeli.

9Kwenziwa isimemezelo kulo lonke lakoJuda laseJerusalema ukuba kulethwe eNkosini uNkulunkulu umthelo uMose inceku kaNkulunkulu ayewumisele uIsrayeli enkangala.

10Zonke izikhulu labo bonke abantu bathokoza, baletha umthelo wabo, bawufaka ebhokisini laze lagcwala.

11Kwakusithi lapho ibhokisi lilethwa ngamaLevi ezinduneni zenkosi, nxa ebona ukuthi imali isinengi kulo, umabhalane wenkosi lenduna yompristi omkhulu beze bayithulule ebhokisini, balibuyisele endaweni yalo. Benza njaloke insuku ngensuku, baqoqa imali enengi.

12Inkosi loJehoyada bayinika abaphathi bomsebenzi wethempeli, baqatsha ngayo abakha ngamatshe lababazi labasebenza ngensimbi langethusi ukulungisa ithempeli.

13Labo ababeqatshiwe basebenza, umsebenzi waqhubekela phambili, bayilungisa indlu kaNkulunkulu, yabuyela esimeni sayo esifaneleyo, bayiqinisa.

14Kwathi sebeqedile bayiletha imali eseleyo enkosini lakuJehoyada, kwenziwa ngayo izitsha zethempeli, ezenkonzo lezeminikelo yokutshiswa, lemiganu yempepha, lezinye izitsha zegolide lezesiliva. Banikela njalonjalo iminikelo yokutshiswa ethempelini insuku zonke zikaJehoyada.

15UJehoyada waluphala, wafa; wayeseleminyaka elikhulu lamatshumi amathathu ekufeni kwakhe.

16Bamngcwabela emzini kaDavida phakathi kwamakhosi, ngoba wayenze okulungileyo koIsrayeli lakuNkulunkulu lasendlini yakhe.

17Ngemva kokufa kukaJehoyada izikhulu zakoJuda zaya enkosini uJowashi, zafika zakhuleka kuyo, inkosi yazilalela.

18Bayidela indlu yeNkosi, uNkulunkulu wabokhokho babo, bakhonza insika zikankulunkulukazi uAshera lezithombe. Ulaka lukaNkulunkulu lwehlela phezu kwabakoJuda labaseJerusalema ngenxa yalesisono sabo.

19Kodwa iNkosi yathumela abaprofethi phakathi kwabo ukubabuyisela kuyo; bona babaxwayisa, kodwa kababalalelanga.

20Umoya kaNkulunkulu wasusehlela kuZekariya indodana kaJehoyada umpristi; wema phambi kwabantu, wathi kibo: UNkulunkulu uthi: Kungani lisaphula imilayo yami ukuba lingaphumeleli na? Ngoba lingilahlile mina Nkosi, lami ngililahlile.Mat 23:35; Luka 11:51

21Basebemenzela icebo; belaywe yinkosi uJowashi, bamkhanda uZekariya ngamatshe egumeni lethempeli.

22UJowashi inkosi kawukhumbulanga umusa kaJehoyada uyise kaZekariya ayemenzele wona, kodwa wabulala indodana yakhe. Lapho esesifa uZekariya wathi: INkosi uNkulunkulu kayibone iphindisele.

23Ekupheleni komnyaka impi yamaSiriya yamhlasela uJowashi, yafika koJuda laseJerusalema, yazibulala zonke izikhulu zabantu, yathumela yonke impango enkosini yaseDamaseko.

24Lanxa impi yamaSiriya yayilabantu abalutshwana, iNkosi uNkulunkulu yanikela kuyo impi enkulu kakhulu, ngoba abakoJuda babeyilahlile iNkosi, uNkulunkulu wabakhokho babo. Ngalokho uJowashi wehlelwa ngokumfaneleyo.

25Kwathi amaSiriya esesukile kuye, emtshiye egula kakhulu, inceku zakhe zamenzela icebo ziphindisela ukubulawa kwendodana kaJehoyada umpristi, zambulalela embhedeni wakhe. Wafa, bamngcwabela emzini kaDavida, kodwa kabamngcwabanga emalibeni amakhosi.

26Labo ababemenzele icebo babengoZabadi indodana kaShimeyathi owesifazana womAmoni, loJehozabadi indodana kaShimirithi owesifazana womMowabi.

27Indaba zamadodana akhe, lamazwi amanengi ngaye, langokulungiswa kwendlu kaNkulunkulu, kulotshiwe endabeni esogwalweni lwamakhosi. UAmaziya indodana yakhe waba yinkosi esikhundleni sakhe.