Zaga 2 - Ndebele Bible (iBhayibhili Elingcwele) 1978

Umvuzo wokuhlakanipha

1Mntanami, uba usamukela amazwi ami,

ugcine imilayo yami enhliziyweni yakho,

2ulalele ukuhlakanipha, ubeke ingqondo yakho ekuqedisiseni,

3yebo, uba ubiza ukuzwisisa,

ememeze ukuqedisisa,

4uba ukudinga njengesiliva,

ukuphenye njengempahla eligugu efihliweyo,

5ng’khona uzakwazi ukuyesaba iNkosi,

ufumane ukumazi uNkulunkulu.

6Ngoba yiyo enika ukuhlakanipha,

efundisa ukwazi lokuqedisisa.

7Iyagcinela abaqotho amandla,

iyisihlangu kubo abahamba ngeqiniso;

8iyalinda indlela zokulunga,

ilondoloze ukuhamba kwabathembekileyo bayo.

9Ng’khona uzakwazi okufaneleyo lokulungileyo,

lokuqonda, lendlela zonke ezilungileyo;

10ngoba ukuhlakanipha kuzangena engqondweni yakho,

lokwazi kube mnandi enhliziyweni yakho.

11Ingqondo ehlakaniphileyo izakukugcina,

lokuqedisisa kukulondoloze,

12kukukhulule endleleni ezimbi,

lasebantwini abakhuluma amazwi akhohlisayo,

13abatshiya indlela yobuqotho,

ukuba bahambe ngendlela zomnyama,

14bethokoza ngokwenza okubi,

bejabula ngezenzo ezikhohlisayo,

15abalezindlela ezingaqondanga,

lemikhondo ephambukileyo.

16Kuzakukukhulula kowesifazana oyisifebe,

kowesifazana omubi olamazwi akhohlisayo,

17otshiye indoda yobutsha bakhe,

wakhohlwa isivumelwano sikaNkulunkulu wakhe;

18ngoba ukungena endlini yakhe kuholela ekufeni,

lemikhondo yakhe endaweni yabafileyo.

19Bonke abaya kuye kababuyi,

kababuyeli endleleni zokuphila.

20Ngakhoke hamba endleleni yabalungileyo,

uhambe ngendlela yabaqotho.

21Ngoba abaqotho bazakuhlala elizweni,

labaqondileyo basale kulo;

22kodwa ababi bazakususwa elizweni,

labakhohlisayo bakhutshwe kulo.