1 Sam 23 - Ndebele Bible (iBhayibhili Elingcwele) 1978

UDavida uya eKeyila lasenkangala yaseZifi

1Kwabikwa kuDavida kwathiwa: AmaFilistiya ahlasela iKeyila, aphanga lezibuya.

2UDavida wasebuza eNkosini uNkulunkulu esithi: Ngiye ukulwa lamaFilistiya na? INkosi yathi kuye: Hamba uyekulwa lawo, usize iKeyila.

3Kodwa abantu bakaDavida bathi kuye: Khangela, siyesaba khonapha koJuda; phoke, kuzakuba njani uba sisiya eKeyila, silwe lezimpi zamaFilistiya na?

4UDavida wasebuza futhi eNkosini. INkosi yamphendula yathi: Suka uye eKeyila; ngoba ngizawanikela amaFilistiya esandleni sakho.

5UDavida labantu bakhe baya eKeyila, balwa lamaFilistiya, bathumba inkomo zawo, babulala amanengi. Wabakhulula uDavida abaseKeyila.

6Kwathi lapho uAbiyatha, indodana kaAhimeleki ebalekela kuDavida eKeyila, wafika ephethe ingubo yamahlombe.

7Kwabikwa kuSawuli ukuthi uDavida ungenile eKeyila. USawuli wathi: UNkulunkulu umnikele esandleni sami; ngoba uzivalele ngokungena emzini olamasango lemigoqo.

8USawuli wasebiza bonke abantu ukuba bayehlasela iKeyila, bavimbezele uDavida labantu bakhe.

9UDavida wezwa ukuba uSawuli wenza icebo elibi ngaye; wathi kuAbiyatha umpristi: Letha lapha ingubo yamahlombe.

10UDavida wasesithi: Nkosi, Nkulunkulu kaIsrayeli, inceku yakho izwile impela ukuba uSawuli ufuna ukuza eKeyila ukuba alichithe ngenxa yami.

11Abantu baseKeyila bazanginikela kuye na? Uzafika uSawuli njengokuzwa kwenceku yakho na? Nkosi, Nkulunkulu kaIsrayeli, akuyitshele inceku yakho. INkosi yamphendula yathi: Uzafika.

12UDavida wasesithi: Abantu baseKeyila bazanginikela mina labantu bami kuSawuli na? INkosi yathi: Bazakulinikela.

13Wasesuka uDavida labantu bakhe ababengamakhulu ayisithupha, baphuma eKeyila, baya lapho ababengaya khona. Lapho uSawuli esetshelwa ukuthi uDavida usebalekile eKeyila, waseyekela ukuphuma.

14UDavida wahlala enkangala ezinqabeni, ezintabeni ezisenkangala yaseZifi. USawuli wayemdinga insuku zonke, kodwa uNkulunkulu kamnikelanga esandleni sakhe.

15UDavida wayesesaba ngoba uSawuli wayephumele ukumbulala. UDavida wayeseHoreshi enkangala yaseZifi.

16UJonathani, indodana kaSawuli, wasuka waya kuDavida, wammisa isibindi ngebizo likaNkulunkulu.

17Wathi kuye: Ungesabi, isandla sikaSawuli ubaba kasiyikukuthinta. Uzakuba yinkosi koIsrayeli, mina ngikulandele esikhundleni; lobaba uyakwazi lokho.

18Basebesenza isivumelwano bobabili phambi kweNkosi; uDavida wahlala eHoreshi, uJonathani wabuyela ekhaya.1 Sam 18:3

19AbaseZifi basuka baya kuSawuli eGibeya bathi: Sizwile ukuthi uDavida ucatshile kithi ezinqabeni zaseHoreshi, entabeni yaseHakila engaseningizimu kwaseJeshimoni.

20Ngakhoke woza, nkosi, uba kuyisifiso senhliziyo yakho ukuza; thina sizamnikela esandleni sakho.

21USawuli wathi: INkosi ilibusise ngoba lingizwele isihawu.

22Hambani, lihlolisise, liyibone impela indawo lapho akhona, lokuthi ubonwe ngubani lapho, ngoba ngitsheliwe ukuba ulobuqili impela.

23Dingani, lizazi zonke indawo lapho acatsha khona, libuyeke kimi selileqiniso. Ngizahambake lani; kuthike nxa ekhona elizweni, ngimdinge phakathi kwazo zonke inkulungwane zabantu bakoJuda.

24Basebesukake besiya eZifi phambi kukaSawuli. UDavida labantu bakhe babesenkangala yaseMahoni, eAraba, ngeningizimu kweJeshimoni.

25USawuli labantu bakhe bayamdinga. UDavida wakuzwa lokhu, waya eliweni elisenkangala yaseMahoni. Kwathi uSawuli esekwazile, waxotshana laye enkangala yaseMahoni.

26USawuli wahamba ngakolunye uhlangothi lwentaba, uDavida labantu bakhe bahamba ngakolunye. Kwathi uDavida esabaleka, loSawuli labantu bakhe besahanqa uDavida labantu bakhe, sebesondela ukuba bababambe,

27kwafika isithunywa kuSawuli sathi: Phangisa ubuye, ngoba amaFilistiya asengenile elizweni.

28Wasebuya uSawuli ekuxotsheni uDavida, wayakulwa lamaFilistiya. Ngakhoke basebeyibiza leyondawo bathi liDwala lokwahlukanisa.

29UDavida wasesuka lapho, wayahlala ezinqabeni zaseEngedi.