Seb 14 - Ndebele Bible (iBhayibhili Elingcwele) 1978

UPawuli utshumayela eIkoniyuma

1Kwathi eIkoniyuma bangena esinagogeni labaJuda, bakhuluma kwaze kwakholwa ixuku elikhulu labaJuda lamaGriki.

2Kodwa abaJuda abangakholwayo bavusa abezizwe, babafaka umoya omubi ngabazalwane.

3Bahlala isikhathi eside, bekhuluma ngesibindi ngeNkosi eyafakazela ilizwi lomusa wayo, ibanika ukuba kwenziwe izibonakaliso lezimangaliso ngezandla zabo.

4Kodwa abantu bomuzi behlukana phakathi, abanye baba ngakubaJuda labanye baba ngakubaphostoli.

5Kwathi ukuba kuvele umzamo kwabezizwe labaJuda kanye lababusi babo wokubaphatha kubi lokubakhanda ngamatshe,

6sebekwazi lokhu, babalekela eListra leDerbe, imizi yaseLikawoniya, lasemazweni akhona,

7batshumayela khona ivangeli.

UPawuli utshumayela eListra

8EListra kwakuhlezi indoda ethile eyisilima enyaweni zayo, eyisiqhuli kusukela ekuzalweni kwayo, engazanga ihambe.

9Yona yamuzwa uPawuli ekhuluma. UPawuli eyijolozela wabona ukuba ilokukholwa kokuba isiliswe,

10wathi ngelizwi elikhulu: Sukuma, ume ngenyawo zakho. Yasukuma yathi lothu, yahamba.

11Kwathi ukuba amaxuku abone okwenziweyo nguPawuli, aphakamisa ilizwi esithi ngolimi lwaseLikawoniya: Onkulunkulu behlele kithi befana labantu.

12UBarnabasi bambiza bathi nguZewusi, loPawuli bathi nguHermesi, ngoba nguye owayekhokhela ekukhulumeni.

13Umpristi kaZewusi othempeli lakhe laliphambi komuzi waletha inkabi lemigaxo ngasesangweni, wafuna ukubahlabela ekanye labantu.

14Kodwa abaphostoli oBarnabasi loPawuli sebekuzwile, badabula ingubo zabo, baphoseka exukwini bememeza besithi:

15Madoda, likwenzelani lokhu na? Lathi singabantu abanjengani ngokwemvelo, sililethele ivangeli ukuze liphenduke kulokho okuyize, liphendukele kuNkulunkulu ophilayo owenza izulu lomhlaba, lolwandle, lakho konke okukukho,

16owathi ezizukulwaneni ezidlulileyo wayekela izizwe zonke zahamba ngendlela zazo.

17Kodwa kayekelanga ukuzifakazela ngokwenza okuhle, walinika izulu livela ezulwini lezikhathi zenala, esuthisa inhliziyo zenu ngokudla langokujabula.

18Ngalamazwi babayekelisa abantu ngokulukhuni ukuba babahlabele.

UPawuli utshumayela eAntiyoki

19Kodwa kwafika abaJuda abavela eAntiyoki leIkoniyuma, sebevumelene labantu bamkhanda uPawuli ngamatshe, bamhudulela ngaphandle komuzi besithi ufile.

20Kodwa kwathi abafundi bebuthana kuye, wasukuma, wangena emzini; kusasa wasuka loBarnabasi, baya eDerbe.

21Sebetshumayele ivangeli kulowomuzi, bezuzile abafundi abanengi, babuyela eListra, laseIkoniyuma, laseAntiyoki,

22beqinisa imimoya yabafundi bebaluleka ukuba babambelele ekukholweni, besithi: Simele ukungena embusweni kaNkulunkulu ngenhlupheko ezinengi.

23Sebebakhethele abadala emabandleni wonke, bakhuleka bezila ukudla, babanikela eNkosini asebekholwa kiyo.

24Basebedabula iPisidiya, baya ePamfiliya.

25Sebekhulumile ilizwi ePerga, behlela eAtaliya.

26Basuka lapho ngomkolo, baya eAntiyoki, lapho babenikezelwe khona emuseni kaNkulunkulu kulowo umsebenzi abasebewenzile.

27Kwathi sebefikile, balihlanganisa ibandla, balandisa konke uNkulunkulu abekwenzile ngabo lokuthi uvulele abezizwe umnyango wokukholwa.

28Basebehlala isikhathi eside labafundi.