1 Kho 9 - Ndebele Bible (iBhayibhili Elingcwele) 1978

INkosi izibonakalisa kuSolomoni ngokwesibili

1Kwathi uSolomoni eseqedile ukwakha ithempeli lendlu yakhe lakho konke ayefisa ukukwakha,2 Lan 7:11—8:18

2iNkosi yabonakala kuye ngokwesibili njengokubonakala kwayo kuye eGibeyoni,1 Kho 3:5; 2 Lan 1:7

3yathi kuye: Ngizwile ukukhuleka kwakho lokucela kwakho okwenzileyo phambi kwami. Sengiyenze yaba ngcwele lindlu oyakhileyo ukuba ibizo lami lidunyiselwe khona kuze kube nininini; amehlo ami lenhliziyo yami kuzakuba kuyo isikhathi sonke.

4Wenake, uba uhamba phambi kwami njengoyihlo uDavida ngobuqotho benhliziyo langokuqonda, wenze konke engikulaye khona, ugcine izimiso zami lemithetho yami,

5ngizaqinisa umbuso wakho koIsrayeli kuze kube nininini njengokuthembisa kwami kuDavida uyihlo ngisithi: Kawuyikuswela muntu ozabusa uIsrayeli.1 Kho 2:4

6Kodwa uba lidela ukungilandela, lina labantwana benu, lingayigcini imilayo yami lezimiso zami engilinike zona, lisuke liyekhonza abanye onkulunkulu, libasebenzele,

7ngizakumqeda uIsrayeli elizweni engimnike lona, lendlu engiyahlukanisele ibizo lami ngizayichitha phambi kwami, uIsrayeli abe yisiga lento yokuhaywa phakathi kwezizwe zonke.

8Lindlu izakuba lunxiwa, kuthi wonke umuntu odlulayo kiyo amangale ancife, athi: INkosi ikwenzeleni okunje kulelilizwe lakulindlu na?2 Kho 25:9; 2 Lan 36:19

9Impendulo izakuthi: Kungoba bayidelile iNkosi uNkulunkulu wabo eyakhupha okhokho babo elizweni laseGibithe, banamathela kwabanye onkulunkulu, babakhonza babasebenzela. Ngalokhoke iNkosi uNkulunkulu ibehlisele bonke lobububi.

Ezinye izenzo zikaSolomoni

10Emva kweminyaka engamatshumi amabili uSolomoni akhile izindlu ezimbili, ithempeli lendlu yakhe,

11loHiramu inkosi yaseTire imnika izigodo zemikusu lezamaphane legolide, njengokufisa kwakhe, uSolomoni wamnika uHiramu imizi engamatshumi amabili elizweni laseGalili.

12Kodwa kwathi uHiramu esuka eTire ukuyabona leyomizi uSolomoni ayemnike yona, kayimthokozisanga.

13Ngakho wasesithi: Yimizi bani le onginike yona, mfowethu na? Basebeyibiza ngokuthi ilizwe laseKabuli, okuyikuthi amahalihali, kuze kube lamuhla.

14UHiramu wayethumele enkosini igolide elingamathalenta alikhulu lamatshumi amabili.

15Nansi indaba yezibhalwa inkosi uSolomoni ayezibuthele ukwakha ithempeli, lendlu yakhe, ledundulu elithiwa yiMilo, lomduli weJerusalema leHazori leMegido leGezeri.

16— IGezeri lalihlaselwe lathunjwa nguFaro inkosi yaseGibithe, walitshisa, wabulala amaKanani ayehlala kilo, wasecola ngalo indodakazi yakhe, umkaSolomoni;

17uSolomoni wabuya walakha — Wakha leBeti‐Horoni elingaphansi,

18leBalathi leTamari enkangala,

19lemizi yonke yokugcinela amabele, leyokugcinela inqola zakhe lamabhiza akhe, loba kuyini ayefisa ukukwakha eJerusalema, laseLebanoni, lakulo lonke ilizwe lombuso wakhe.

20Abantu bonke ababesele kumaAmori lakumaHethi lakumaPerizi lakumaHivi lakumaJebusi, ababengeyisibo abakoIsrayeli,

21inzalo yabo eyayisele elizweni abangayibulalanga abakoIsrayeli, uSolomoni wayibutha izibhalwa; bayizo kuze kube lamhla.

22Kodwa abakoIsrayeli uSolomoni kabenzanga izigqili, wabenza amabutho, lezinduna zakhe, labaphathi bezimpi, lezinduna zakhe zamabutho, labaphathi bezinqola zokulwa, labagadi bamabhiza akhe.

23Labo baba zinduna ezinkulu ezaziphethe umsebenzi kaSolomoni babengamakhulu amahlanu lamatshumi amahlanu, bephethe abantu abasebenzayo.

24Ngemva kokusuka kwendodakazi kaFaro emzini kaDavida isiya endlini yayo uSolomoni ayeyakhele yona wakha idundulu elithiwa yiMilo.

25Kathathu ngomnyaka uSolomoni wayenikela iminikelo yokutshiswa leminikelo yokuthula phezu kwealtare ayelakhele iNkosi, atshise impepha phambi kwayo. Waseyiqedake indlu.Eks 23:17; 34:23; Dute 16:16

26Inkosi uSolomoni yakha imikolo eminengi eEziyoni‐Geberi eliphansi kweElathi okhunjini loLwandle oluBomvu elizweni laseEdoma.

27UHiramu wathumela kulimikolo inceku zakhe, amadoda alwejwayeleyo ulwandle, ukusebenza kanye lenceku zikaSolomoni.

28Baya eOfiri, balanda khona igolide elingamathalenta angamakhulu amane lamatshumi amabili, baliletha enkosini uSolomoni.