Hez 39 - Ndebele Bible (iBhayibhili Elingcwele) 1978

1Wenake, ndoda, tshumayela ngoGogi uthi: INkosi uNkulunkulu ithi: Ngimelene lawe, Gogi, sikhulu esikhulu saseRoshi leMesheki leTubali.

2Ngizakukuphendula, ngikuqhube, ngikukhuphe endaweni ezikhatshana zasenyakatho, ngikuse entabeni zakoIsrayeli.

3Besengitshayela phansi idandili elisesandleni sakho sekhohlo, ngiwisele phansi imitshoko esandleni sakho sokunene.

4Uzawela phezu kwezintaba zakoIsrayeli, wena lamaxuku akho wonke labantu abalawe. Ngizakukunikela emanqeni lezilweni zeganga ukuba kukudle.

5Uzafela egangeni, ngoba ngikhulumile, kutsho iNkosi uNkulunkulu.

6Ngizathumela umlilo kuMagogi lakulabo abahlala ngokulondolozeka emazweni angasolwandle. Bazakwazi ukuba ngiyiNkosi.

7Ngizakwenza ukuba ibizo lami laziwe phakathi kwabantu bami uIsrayeli, kangisayikuyekela ibizo lami elingcwele lingcoliswe futhi; lezizwe zizakwazi ukuba ngiyiNkosi, oNgcwele kaIsrayeli.

8Khangelani, kuyeza kuzakwenzeka, kutsho iNkosi uNkulunkulu; yilo lolosuku engakhuluma ngalo.

9Kuzakuthi labo abahlala emizini yakoIsrayeli baphume, babuthe izikhali, babase umlilo ngazo, izihlangu lamahawu lamadandili lemitshoko lezinduku lemikhonto, bakubase iminyaka eyisikhombisa,

10ukuba bangathezi inkuni egangeni, loba bazigamule eguswini, ngoba bazabasa imililo yabo ngezikhali; bazakwamuka labo ababamukayo, baphange labo ababaphangayo, kutsho iNkosi uNkulunkulu.

11Ngalolosuku ngizanika uGogi indawo yokungcwabela koIsrayeli isihotsha seseAbarimi, esingasempumalanga kolwandle. Bazangcwatshelwa lapho uGogi lawo wonke amaxuku akhe, ligcwale lonke iAbarimi, balibize ngokuthi yisiHotsha samaxuku kaGogi.

12UIsrayeli uzabangcwaba inyanga eziyisikhombisa ukuze ilizwe lihlambuluke.

13Bonke abantu belizwe bazasiza ukubangcwaba, kubalethele udumo mhla ngibonakalisa inkazimulo yami, kutsho iNkosi uNkulunkulu.

14Bazamisa abantu abazahambahamba phakathi kwelizwe, bangcwabe labo abaseleyo elizweni ukuze lihlambuluke. Ekupheleni kwenyanga eziyisikhombisa bazaqalisa ukuhlola.

15Nxa behambahamba phakathi kwelizwe, omunye abone ithambo lomuntu, uzamisa isibonakaliso phansi kwalo, baze balingcwabe abangcwabayo esiHotsheni samaxuku kaGogi.

16— Kukhona umuzi lapho othiwa iHamona — Bazakuhlambulula ilizwe ngokunjalo.

17Wenake, ndoda, kutsho iNkosi uNkulunkulu, khuluma lenyoni zenhlobo zonke lenyamazana zonke zeganga, uthi: Hlanganani lize, buthanani livela indawo zonke lize edilini lomhlatshelo engililungiselele lona, idili elikhulu lomhlatshelo eliphezu kwentaba zakoIsrayeli, lizakudla inyama linathe igazi.Isam 19:17–18

18Lizakudla inyama yamaqhawe, linathe igazi lezikhulu zomhlaba; banjengezinqama, lamawundlu, lezimbuzi, lezinkunzi, lezinonileyo zaseBashani.

19Lizakudla amahwahwa lize lisuthe, linathe igazi lize lidakwe, edilini lomhlatshelo engililungisela lona.

20Lizasutha etafuleni yami amabhiza labagadi lamaqhawe lamadoda wonke empi, kutsho iNkosi uNkulunkulu.

21Ngizakumisa inkazimulo yami phakathi kwezizwe; izizwe zonke zizabona ukuthonisisa engikwenzileyo, lesandla sami engisehlisele phezu kwabo.

22AbakoIsrayeli bazakwazi ukuba ngiyiNkosi uNkulunkulu wabo kusukela kulolosuku.

23Lezizwe zizakwazi ukuba abakoIsrayeli bathunjwa ngenxa yesono sabo, ngoba bangikhohlisa kakhulu ngaze ngafihla ubuso bami kibo, ngabanikela ezandleni zezitha zabo, babulawa empini.

24Ngabaphatha ngokufanele ukungcola kwabo leziphambeko zabo, ngabafihlela ubuso bami.

25Ngalokhoke iNkosi uNkulunkulu ithi: Sengizabuyisa abantu bakaJakobe, ngibe lesihawu kuye wonke uIsrayeli, ngibe lomona langebizo lami elingcwele.

26Bazakhohlwa ihlazo labo lokungikhohlisa kwabo konke, nxa sebehlale elizweni labo kungasekho lobethusayo,

27lapho sengibakhuphile ebantwini, ngabaqoqa emazweni ezitha zabo, ngabonakalisa ubungcwele bami ngabo phambi kwezizwe.

28Bazakwazi ukuba ngiyiNkosi uNkulunkulu wabo ngoba ngabaxotshela phakathi kwezizwe, ngabuye ngabaqoqela elizweni labo. Kangisayikutshiya loyedwa wabo phakathi kwezizwe.

29Kangisayikubafihlela ubuso bami nxa sengithela umoya wami phezu kukaIsrayeli, kutsho iNkosi uNkulunkulu.