Isa 8 - Ndebele Bible (iBhayibhili Elingcwele) 1978

Ibizo lendodana yomprofethi

1INkosi yasisithi kimi: Thatha ilitshe eliyisibhebhedu, ulobe kilo ngamabala alula ukuthi: Maherishalali‐Hashibazi,

2ubusudinga ofakazi abathembekileyo, uUriya umpristi loZekariya indodana kaJeberekiya, bakufakazele.

3Ngalala lomkami, wathatha isisu, wazala indodana. INkosi yasisithi kimi: Umuthe ibizo lokuthi uMaherishalaliHashibazi.

4Ngoba umntwana engakakwazi ukuthi Baba, lokuthi Mama, inotho yaseDamaseko lempahla yaseSamariya izathunjwa yinkosi yaseAsiriya.

5INkosi yabuya yathi kimi:

6Ngenxa yokuba lababantu bawalile amanzi aseShilowa ageleza kancinyane, bathuthumela ngenxa yokwesaba uRezini lendodana kaRemaliya,

7ngakho mina Nkosi ngizabalethela amanzi eYufrathi amanengi lalamandla, okuyinkosi yaseAsiriya labo bonke ubukhosi bayo; azahamba phezu kwemigelo yonke lenkumbi zonke zalo,

8aze afohlele koJuda, akhukhule, adlule, afinyelele lasentanyeni, agcwale endaweni zonke zelizwe; ngoba uNkulunkulu ulathi, impiko zakhe zelulekele ilizwe.

9Yazini, lina bantu, ukuthi lizakuchitheka;

lalelani, lina zizwe ezikhatshana;

lihlome, kodwa lizachitheka.

10Yenzani icebo, kodwa lizakwahluleka;

khulumani ilizwi, kodwa kaliyikuma, ngoba uNkulunkulu ulathi.

YiNkosi efanele ukwesatshwa

11INkosi yangibamba ngesandla sayo, yangixwayisa ukuba ngingahambi endleleni yalababantu, yathi:

12Ungatsho ukuthi kungamacebo amabi konke abakutshoyo lababantu ukuthi kungamacebo amabi; ungesabi lokho abakwesabayo, utshaywe luvalo.1 Pet 3:14–15

13Kodwa iNkosi yamabandla yiyo engcwele, yiyo ofanele ukuyesaba, utshaywe luvalo ngayo.

14Yona izakuba yisifu lelitshe elikhubekisayo, ibe lidwala eliwisa zombili izindlu zakoIsrayeli, ibe ngumjibila lesifu kwabakhileyo eJerusalema.1 Pet 2:8

15Abanengi bazakhubeka kulo, bawe bephuke, bathiywe, babanjwe.

16Abafundi bami kabagoqe umqulu wobufakazi, banameke imfundiso yami.

17Ngizalindela iNkosi efihlela indlu kaJakobe ubuso bayo, ngithembe kiyo.Heb 2:13

18Mina labantwana iNkosi enginike bona siyizibonakaliso lezimangaliso koIsrayeli, ezivela eNkosini yamabandla ehlala entabeni yaseZiyone.Heb 2:13

19Abantu bazakuthi kuwe: Buza emadlozini, lakubathakathi abatshaya imilozwi, banyenyeze; angithi abantu bangabuza kubonkulunkulu babo, babuze kwabafileyo ngabaphilayo na?

20Yebo, abantu bazakutsho njalo; kodwa amazwi abo ayize.

21Bazazula lelizwe behlupheka kakhulu belambile; ukulamba kubavuse ulaka, bathuke inkosi yabo loNkulunkulu wabo, kuthi lapho bekhangela phezulu,

22loba phansi emhlabeni babone ukuhlupheka lomnyama, umnyama owesabekayo, baxotshelwe kuwo. Kabayikuphepha kukho konke lokho.