Isa 14 - Ndebele Bible (iBhayibhili Elingcwele) 1978

Ukubuya kwabathunjiweyo

1INkosi izakumhawukela uJakobe, ibuye imkhethe futhi uIsrayeli, ibabeke elizweni lakibo; labezizwe bazahlangana labo, bahlale labo.

2Abantu bezizwe bazakubaphelekezela, babase endaweni zabo, abakoIsrayeli bazakubathumba elizweni leNkosi babe yizigqili zabo. Bazakuthumba abathumbi babo, babuse abacindezeli babo.

Inkosi yaseBabiloni endaweni yabafileyo

3Lapho iNkosi isiliphumuzile ebuhlungwini benu lasekuhluphekeni kwenu lasemsebenzeni onzima ebelisetshenziswa kiwo,

4lizakutsho lelilizwi lokukloloda ngenkosi yaseBabiloni lithi:

Yeka ukuphela komcindezeli!

Yeka ukuphela kokuzikhukhumeza kwakhe!

5INkosi ilwaphule udondolo lwababi lentonga yababusi,

6abatshaya abantu ekuthukutheleni ngokutshaya okungapheliyo,

bacindezela izizwe ngolaka bezicindezela ngokungapheliyo.

7Umhlaba wonke usuphumule, ulokuthula, uyahlabela kakhulu.

8Izihlahla zephane ziyathokoza ngawe, wena nkosi yaseBabiloni,

lezihlahla zomkusu zaseLebanoni zithi:

Selokhu wawiselwa phansi, kakukho umgamuli osigamulayo.

9Indawo yabafileyo ngaphansi iyanyakaziswa ukuba ikuhlangabeze lapho ufikayo,

ivusa imimoya yabafileyo ukuba ikubingelele,

imimoya yabo bonke ababebusa umhlaba,

isukumise ezihlalweni zobukhosi bonke ababengababusi bezizwe.

10Bonke bazakhuluma bathi kuwe:

Lawe usubuthakathaka njengathi; usufana lathi.

11Ubukhosi bakho sebehliselwe endaweni yabafileyo,

lokukhala kwamachacho akho;

izimpethu sezilicansi lakho lokulala,

lemihlavane isiyingubo yakho.

12Yeka ukuwa kwakho ezulwini,

wena Nkanyezi ekhanyayo, ndodana yoKusa!

Yeka ukudilizelwa kwakho phansi,

wena owathobisa izizwe!

13Wena wathi enhliziyweni yakho: Ngizakwenyukela ezulwini;

ngaphezu kwezinkanyezi zikaNkulunkulu ngibeke khona isihlalo sami sobukhosi;

ngizahlala entabeni yomhlangano wabonkulunkulu ekucineni ngasenyakatho;

14ngizakwenyukela ngaphezu kwendawo eziphakemeyo emayezini,

ngizenze ngibe njengoPhezukonke.

15Kodwa usuwehliselwe endaweni yabafileyo, enzikini yomgodi.

16Labo abakubonayo bazakujolozela, bakuqaphele bathi:

Kambe nguye lumuntu owenza ukuba umhlaba uthuthumele,

wanyakazisa imibuso,

17waphendula ilizwe laba njengenkangala,

wachitha imizi yalo,

ongavumelanga izibotshwa zakhe ukuba zibuyele emakhaya na?

18Wonke amakhosi ezizwe alahlwa ngodumo,

ileyo laleyo engewabeni layo;

19kodwa wena uphoselwe ngaphandle ungangcwatshwanga,

njengento enengekayo yesisu esiphumileyo,

welekwa ngabafileyo ababulewe empini,

abaphoselwa phansi emgodini olamatshe,

njengesidumbu esinyathelwe ngenyawo.

20Kawuyikuhlanganiswa kanye labo ekungcwatshweni,

ngoba ulichithile ilizwe lakini,

wabulala abantu bakini.

Inzalo yakho embi kayiyikuba khona futhi.

21Lungiselani abantwana babo ukubulawa ngenxa yobubi baboyise,

ukuze bangavuki balithumbe ilizwe,

bagcwalise imizi emhlabeni.

IBabiloni lizachitheka

22Ngizakubavukela, itsho iNkosi yamabandla, ngiqede iBabiloni labaseleyo kulo, indodana lomzukulu.

23Ngizakulenza libe yindawo yezinhloni lamatete amanzi, ngilithanyele ngomthanyelo wencithakalo, kutsho iNkosi yamabandla.

IAsiriya lizachitheka

24INkosi yamabandla ifungile yathi:

Njengokulungisa kwami kuzakuba njalo,

lanjengokumisa kwami kuzakuma ngokunjalo,

25ukuthi ngizamchitha uAsiriya elizweni lami,

ngimnyathele phezu kwezintaba zami;

beselisuka ijogwe lakhe ebantwini bami,

lomthwalo wakhe emahlombe abo.

26Yikho lokho okumisiweyo ngomhlaba wonke,

yiso lesi isandla esiphakanyiselwe izizwe zonke.

27Ngoba iNkosi yamabandla ikumisile,

ngubani ongakuchitha na?

Lesandla sayo siphakanyisiwe,

ngubani ongasibuyisela emuva na?

AmaFilistiya azachitheka

28Ngomnyaka wokufa kwenkosi uAhazi kwafika lelilizwi lathi:

29Ungathokozi, wena lizwe lonke laseFilistiya,

ngokuthi intonga ekutshayileyo yaphukile;

ngoba empandeni yenyoka kuzavela ibululu,

lenzalo yabo ibe yinyoka ephaphayo.

30Abayanga bazakwelusela emadlelweni ami,

labaswelayo baphumule bevikelekile;

kodwa ngizabulala inzalo yakho ngendlala,

ngibulale labaseleyo bakho.

31Khala wena sango, ulile lawe muzi.

Uthuthumele, lizwe lonke laseFilistiya.

Ngoba intuthu iyathunqa ngasenyakatho,

kuyimpi engelamagwala ebuthweni layo.

32Izithunywa zesizwe zizaphendulwa ngokuthini na?

Ngokuthi: INkosi ilimisile iZiyone,

labahluphekayo babantu bayo bazaphephela khona.